Aallaqqaasiut
Isumaqatigiissut Qaasuitsup Kommunani Kommunalbestyrelse-p aammalu (Nunaqarfiit tamarmik) Nunaqarfinni Aqutsisut akornanni isumaqatigiissutaavoq. Isumaqatigiissummi suliassaqarfinnut, aningaasaqarnermut ingerlatsinermullu pisussaaffiliinerit pisinnaatitsinerillu pineqarput.
Isumaqatigiissut 1. januar 2010-miit atuutilissaaq qinigaaffiullu naanerata tungaanut atuutissalluni imaluunniit Kommunalbestyrelse allatut aalajangernissaata tungaanut.
Isumaqatigiissummi suliassat pingaarnerit pineqarput suliassalli nutaat annerusullu Ataatsimiititaliat ataavaartuniit tunngavilersorneqarlutik. Suliassat ingerlanneqarnissaat aningaasaliissutaasut sinaakkusiunneqartut iluini ingerlanneqassapput.
Isumaqatigiissutip siunertaraa Kommunalbestyrelse-p Nunaqarfinnilu Aqutsisut akornanni ingerlatseqatigiinnerup ersarissarnissaa. Isumaqatigiissummi suliassaqarfiit ingerlataasut siunissamilu ingerlatassat aningaasatigut atugarisatigullu tunngavilersorneqarnissaannut isummersoqatigiinnissamut tunngavigineqassalluni. Isummersoqatigiinneq ammasuusariaqarpoq makkunanngalu siunertaqassalluni:
• Akisussaaffiit, pisussaaffiit suliarinninnissallu ersarissassallugit
• Killiliussat aammalu najoqqutassat paasiuminarsarneqarnissaat ersarissisinneqarnissaallu
• Suliassaqarfinni nalimmassaanerup assigiissaarinerullu ersarissarneqarnissaa
• Ineriartonermut tunaartat ersarissarnissaat
Kommunalbestyrelse-miit aningaasaliissutaasut ersarissarnissaat
Isumaqatigiissut una inatsisini tunngavittut atorneqarsinnaanngilaq taamaalillunilu eqqartuussivilersuussinermi tunngavissatut atorneqarsinnaanani. Qaasuitsup Kommuniani Kommunalbestyrelse-p inatsisinut tunngasut aningaasaliissutinullu tunngasut suli akisussaaffigai. Nunaqarfinni Aqutsisut sunik anguniaqassanersoq sunalu anersaaralugu sulissanersoq isumaqatigiissummi uani taamaallaat erseqqissarneqarpoq; soorlu sullissinerup pitsaasumik kiffartuussivigineqarnissaannik politikkikkut piumasaqaataasut aamma isumaqatigiissummi uani erseqqissarneqarput.
Kommunalbestyrelsep isumaqatigiissut sukkulluunniit atorunnaarsisinnaavaa imaluunniit allannguiffigisinnaavaa.
Nunaqarfinni Aqutsisut naammassisimasaanik naliliinermi – anguniakkat, suliassat naammasseqqusat, aningaasaqarnerup malinnaagivineqarnera assigisaasaluunniit – naammaginartumik suliarineqarsimanngippata siunissami suliassat allannguiffigeqquneqarsinnaapput.
Sillissinermut siunertat piumasaqaatillu
Siunertat
Nunaqarfinni Aqutsisut Kommunalbestyrelse-p politikkikkut siunniussaat aammalu anguniagaat tunngavigalugit ingerlatsissapput tassani nalimmassaaneq assigiissaarinerlu sullissinermi ataavaartumik ingerlanneqassalluni. Isumaqatigiissut marloqiusaavoq. Tunngaviusumik isumaqatigiissut una aammalu Nunqarfinni Aqutsisut ukiumut pilersaarutaat. Ukiumut pilersaarut Nunaqarfinni Aqutsisut akisussaaffigissavaat Kommunalbestyrelse-miillu akuersissutigineqassalluni.
Ukiumut pilersaarummi Kommunalbestyrelse-p politikkikkut anguniagai aammalu najoqqutassiai aallaavigineqassapput. Ukiumut pilersaarummi Nunaqarfimmi Aqutsisut namminneq siunniussaat anguniagaallu taakkulu qaqugukkut naammassineqarnissaat aamma ilanngunneqassapput. Ukiut siuliini siunniussat aammalu anguniakkat killiffii ukiumut pilersaarutip nalilersorneqarneranut ilanngunneqassapput. Killiffinnik naliliineq Nunaqarfinni Aqutsisut akisussaaffigaat ukiullu tamaasa januar-imi Kommunalbestyrelse-mut tunniunneqartassalluni. Kommunalbestyrelse-mut nalunaarusiap ukiumut pilersaarusiap akuerineqarsimasoq aallaavigissavaa.
Nunaqarfinni allaffissornikkut sullissinermut naatsorsuutigineqartut
Nunaqarfinni allaffissornikkut sullissinermi makku naatsorsuutigineqarput:
• Ilinniagaqarsimanissaq ilinniakkamillu nutarsaanissaq
• Inuiaqatigiinni pissutsinut aammalu sullissinermut piumasaqaatinut malinnaaneq
• Suliassaqarfinnut tunngassutilinnut inatsisitigut malinnaaneq
• Ineriartortitserusunneq siumullu isigisinnaaneq
• Sullitanut pingaartitsineq sullissinerullu pitsaassusianut nakkutiginnilluarneq
• Aningaasaliissutaasunut eqqummaarinneq aammalu atuilluarnissamut sillimaneq
• Suleqatigiinnikkumassuseqarneq, tassanilu ilinnikkat suliassaqarfiillu akimorlugit suleqataasinnaaneq
• Politikkikkut aalajangiussanut ataqqinninneq
• Ingerlatassat siunertanut anguniakkunut siunniussanullu naapertuuttumik ingerlaniissaat
• Politikkikkut kissaateqartoqarpat Ataatsimiititaliat ataavaartut ataatsimiinnerini peqataanissamut pisussaaffeqarneq
Allaffissornermi ingerlatsinermi pisussaaffiit akisussaaffiillu
Akisussaaffiit pisussaaffiillu Nunaqarfinni Aqutsisunut Kommunalbestyrelse-miit tunniunneqarput. Taamaalillutik Nunaqarfinni Aqutsisut isumaqatigiissutip naapertuuttumik ingerlanneqarneranut aammalu ukiumut pilersaarutit malinneqarnerannut akisussaasuullutik.
Nunaqarfinni Aqutsisut aningaasanik killiliussat malillugit ingerlanneqarnerat akisussaaffigaat taamaalillutillu Kommunalbestyrelse-mut akisussaaffeqarlutik. Aningaasaliissutaasut iluini atuisinnaanermut Nunaqarfinni Aqutsisut pisinnaatitaapput (takuuk aallaqqaasiut).
Allaffissornikkut ingerlatsisut akisussaaffii
Allaffissornikkut sulisut ukiumut pilersaarutip suliarineqarnera akisussaaffigaat. Tassani Nunaqarfimmi Aqutsisut anguniagaat, siunertaat aammalu ingerlatsinermut pilersaarutaat ilaatinneqassallutik. Nunaqarfimmi Aqutsisut ukiumut pilersaarut akuersissutigissavaat Kommunalbestyrelse-mullu akuerisassanngorlugu nassiutissavaat. Nunaqarfimmi Siulersuisut qulakkiissavaat ukiumut pilersaarummi ilanngunneqartut Kommunalbestyrelse-p politikkikkut anguniagaanut najoqqutassiaanullu naapertuuttuunissaa.
Allaffissornikkut sulisut ukiumut pilersaarummi politikkikkut aalajangiussat piviusunngortinnissaat suliarinissaallu akisussaaffigaat. Allaffissornikkut sulisut ilanngullugu ukiumut suliat ingerlanneqarsimanerisa nalunaarusiornissaat.
Allaffissornikkut sulisut Qaasuitsup Kommuniani sulisut allat peqatigalugit suleqatigiinnermut ilaapput. Suleqatigiinnermi Qaasuitsup Kommuniani politikkikkut siunertat, anguniakkat suliassaqarfinnilu allani ingerlatsinerit anguneqarnissaat qulakkeerniarneqarpoq.
Allaffissornikkut sulisut Nunaqarfimmi Aqutsisut peqatigalugit ataatsimiinnerit Kommunalbestyrelse-p maleruagassiaat malillugit ingerlanneqartarnissaat. Allffissornikkut sulisut Nunaqarfinni Aqutsisunut siunnersuinissamut pisussaapput aammalu Nunaqarfimmi Aqutsisut aalajangiussaasa apuunneqartarnissaat akisussaaffigalugu.
Allaffissornikkut sulisut Nunaqarfimmi Aqutsisut sinnerlugit aalajangiussat aammalu apeqquteqaatissat ingerlateqqittassavaat.
Nunaqarfimmi Aqutsisut naatsorsuutaat Kommunalbestyrelse-miit toqqakkamik kukkunersiorneqartassapput.
Nunaqarfimmi allaffissornikkut sulisut
Nunaqarfimmi allaffissornikkut sulisut suliassat ataasiakkaat suliarineqarneri akisussaaffigaat. Suliassat inatsisit Kommunalbestyrelse-miillu najoqqutassiat malillugit suliarineqartarnissaat akisussaaffigaat.
Nunaqarfimmi Aqutsisut suliat inatsisit malillugit suliat ingerlanneqarnerat nakkutigissavaat taamaattorli sulianut ataasiakkaanut aammalu ulluinnarni ingerlatsinermut aalajangiisinnaassuseqaratillu akulerussunnaanatik.
Allaffimmi sulisut suliat Nunaqarfimmi Aqutsisunut saqqummiunneqarnissaasa suliarineqarnerat akisussaaffigaat aammalu Nunaqarfimmi Aqutsisuni ilaasortaniit siunnersuutigineqartut saqqummiunneqarnissaasa suliarinerat akisussaaffigalugu.
Sullissiveqarimmi aningaasaqarnermut immikkoortortaqarfiit qanimut suleqatigineqassapput. Aningaasaqarnermut immikkoortortaqarfiit nunaqarfimmi allaffissornikkut ingerlatsisut sinnerlugit aningaasartuutaasimasunut naqiterinerit (bogholderi), missingersuutit aammalu naatsorsuutit ingerlanneqarneri suliarineqassapput.
Sullissiveqarfimmi pisortaq (Områdechef) sulisoqarnermut qullersaavoq. Pisortap sulisunik atorfinititsinerit soraarsitsinerillu Qaasuitsup Kommuniani najoqqutassat aammalu sulisoqarnermut inatsisit malillugit ingerlanneqarneri akisussaafigai.
Nunaqarfimmi allaffissornikkut sulisut sukkulluunniit suliassaqarfinnut immikkoortortaqarfinniit siunnersorneqarsinnaapput. Suliassanut annertuunut Sullissiveqarfimmi pisortaq peqatigalugu sulisunik allanik atuisinnaanissaq ingerlanneqarsinnaavoq.
Nunaqarfimmi allaffissornikkut sulisut Sullissiveqarfimmi pisortaq taassumaluunniit tullersortaa qullersaraat.
Nunaqarfimmi Aqutsisut nunaqarfimmi allaffissornikkut ingerlatsinerup nakkutigineqarnissaanut pisariaqartitsigunik Sullissiveqarfimmi pisortaq saaffigissavaat.
Aningaasatigut sinaakkusiussat
Aningaasanut sinaakkusiussat tassaapput ukiumi pineqartumi sinaakkusiussat ukiullu missingersorfiusunut aningaaliissutit kontot immikkoortiterneqarneri malillugit.
Kommunalbestyrelse-p aningaasaliissutissat kisitsisinut siullernut arfinilinnut aalajangersussavai. Nunaqarfimmi Aqutsisut aalajangiussaasut iluini (kisitsisit arfineq aappaanniit) aningaasanik nuussinnnaatitaapput. Erseqqissaatigineqassaaq aningaasarsianut aningaasaliissutit ingerlatsinermut atugassanngorlugit nuunneqarsinnaanngimmata taamatullu ingerlatsinermut aningaasaliissutit akissarsianut aningaasaliissutinut nuunneqarsinnaanatik.
Kommunalbestyrelse-p aningaasaliissutaasa nuunneqarnissaannut allannguiffigineqarnissaannulluunniit kissaateqarneq Aningaasaqarnermut Ataatsimiititaliamut qinnutigineqartassapput.
Nunaqarfimmi allaffissornikkut sulisut aningaasanik atuineq sioqqullugu aningaasartuutissap matussutissaqartitsinneqarnera qulakkiissavaat, takuuk Qaasuitsup Kommuniani karseqarnermut naatsorsuuserinermullu najoqqutassaq.
Illuutinik aserfallatsaaliineq
Illuutinik aserfallatsaaliinermi illuutit ilui silataallu pineqarput. Sanaartugassat aserfallatsaaliinerillu annertuut isumaqatigiissummut ilaatinneqanngillat.
Sullissiveqarfimmi Sanaartornermut immikkoortortaqarfik peqatigalugu minnerpaamik ukiumut ataasiarluni illuutit misissorneqartassapput. Misissuinermi siunertarineqassaaq annerusumik aserfallatsaaliinissamut aammalu sanaartugassanut tulleriiaarineq. Sanaartugassanut aammalu annertunersumik aserfallatsaaliinermut pingaarnersiuineq Kommunabestyrelse-miit aalajangersaavigineqassaaq. Suliassatut aalajangerneqarsimasut Sanaartornermut immikkoortortaqarfiup nunaqarfimmi allaffissornikkut sulisullu peqatigiillutik ingerlattassavaat. Sanaartugassanut annerusumillu aserfallatsaaliunissamut Kommunalbestyrelse-miit aningaasaliussat Sanaartornermut ingerlatsiveqarfiup aqussavai. Sanaartukkanut nakkutilliinermut atatillugu ikuallattoornermut sillimaniarnissamut nakkutilliineq ilanngullugu ingerlanneqartassaaq.
Ukiup ingerlanerani aserfallatsaaliinissamut suliassat pilersut aningaasaliissutaasuniit akilerneqartassapput.
Sillimmasiinerit
Sillimmasiinermut apeqqutit tamarmik nalunaarsorneqarnerallu Sullissivimmut nalunaarutigineqartassapput. Tunngaviatigut ajutoorutit tamarmik - inunnut pigisanullu – nalunaarutigineqartassapput nalilersorneqarnissaat siunertaralugu.
Isertitat attartortitsinerlu
Atortuutit atornikut taamaallaat taarsiisoqartillugu pisinnaavoq.
Najoqqutassat, inatsisit kommunillu akiliutinut aalangersagaat malinneqarpat Nunaqarfinni aqutsisut attartortitsinermut atuisussaq peqatigalugu akiliutaasussamik isumaqatigiissuteqarsinnaapput.
Nunaqarfimmi Aqutsisut missingersuutaasut avaqqullugit isertitaqarsinnaapput isertitsissutaasussaq missingersuutaasuni ilaatinneqarsimanngippat.
Isertitat nalunaarsorneqarnissaat paarineqarnissaallu qulakkeerneqarnissaat siunertaralugu Karseqarnermut naatsorsuuteqarnermullu malittarisassa innersuussutigineqarput.
Pisiniartarneq pisiniartarnermullu isumaqatigiissutit
Tamanut atuuttumik pisiniartarnermut isumaqatigiissuteqartoqarsimatillugu isumaqatigiissutit luini tunngaviatigut pisiniarsinnaanermut killeqartitsisoqanngilaq.
Qarasaasiaqarnermut atortunut pisiniarnermi tamatigut Sullissiveqarfimmi qarasaasiaqarnermut akisussaasoq peqatigalugu pisiniarnerit ingerlanneqartassapput.
Tamanut atuuttumik pisiniartarnermut isumaqatigiissutit pinngitsoorani malinneqartassapput.
Napparsimaneq sivisuumillu napparsimaneq
Napparsimasoqartillugu sivisuumillu napparsimasoqartillugu Nunaqarfimmi Aqutsisunut aningaasaliissutaasuniit matussuserneqartassapput.
Sulisitsinermi pisussaaffiit
Nunaqarfimmi allaffissornikkut sulisut pisussaaffigaat suliassaqarfinni makkunani sulisitsisinnaanissartik:
• Sulisinnaanermut misiliinerit, piginnaanngorsaanerit il. il.
• Ilinniartoqarnerit
Sulisinnaanermik misiliisussanik, piginnaanngorsaanerit il. il. nalilersorneqarnerat Sullissivinni inunnik isumaginninnermut suliffissarsiussisarfillu peqatigalugit nalilersorneqartassapput.
Ilinniartussanik naliliinerit isumaqatigiissusiornerillu Sullissivinniit akisussaaffigineqarput.
Aningaasaliissutinik ikaarsaartitsineq
Atuiniinnarneq atuinikiinerlu
Ukiup ingerlanerani ingerlatsinermut aningaasaliissutaasimasuni (nettobudget) ukiup tullianut sinneqartoorutit annerpaamik 10 %-ii ikaarsaartinneqarsinnaapput.
Tunngaviusumik aningaasaliissutini matussutissartaqanngitsumik aningaarsartuuteqartoqarsinnaanngilaq. Aningaasaliissutit atuivallaartoqalersillugu Nunaqarfimmi Aqutsisut pisussaapput aningaasanik nuussinissamik imaluunniit aningaasanik ilassutissanik qinnuteqarnissaminnut. Nunaqarfimmi Aqutsisut ingerlatsinermut naatsoruutaanni atuiniinnartoqarsimatillugu ukiup aningaasaliiffiusup tulliani taamaaqataanik ilanngaasoqartassaaq.
Atuinerit nalunaarsorneqarnerat
Aningaasanik atuiniinnarnernit atuinikinnerillu aningaasanik ingerlatsiveqarfimmiit ukiumut naatsorsuusiornermut atatillugu naatsorneqartassapput. Atinikinneq atuivallaarnerillu ukiup natsorsuutaasa inerat aallaavigalugu nalunaarsorneqassapput.
Aningaasaliissutinik ikaarsaartitsinerit aningaasanik ilassutissanik qinnuteqarnikkut ingerlanneqassapput. Aningaasanik ingerlatsiveqarfiup Kommunalbestyrelse-mut qinnuteqaatit suliarineqarnerat akisussaaffigissavaa tassanilu nunaqarfimmi allaffimmi sulisut suleqatigalugit suliarineqartassallutik. Ukiup naatsorsuiffiusup inernera aallaavigalugu qinnuteqaasiornissamut tunngavigineqartussat Nunaqarfimmi Aqutsisunut kingusinnerpaamik marts-ip naanerani aningaasanik ingerlatsiveqarfimmiit nalunaarutigineqartassapput.
Aningaasaliissutit allanngortinneqarneri
Ukiup naatsorsuiffiusup allanngortinneqarnera
Ukiup naatsorsuiffiusup ingerlanerani aningaasaliissutitut sinaakkusiussat taamaallaat allangortinneqarsinnaapput Kommunalbestyrelse-p politikkikkut aalajangiineratigut assersuutigalugu kommunip tamarmiusup aningaasaliissutaasa allanngortinneranut atatillugu assersuutigalugu aningaasartuutit nutaamik naatsorsorneqartariaqarneranut atatillugu imaluunniit sipaarniuteqartoqarneranut atatillugu.
Aningaasaliissutit qaffanneqarsinnaapput taamaallaat kommunalbestyrelse-p aalajangerneratigut.
Suliassaqarfiit allangortineqarnerinut atatillugu naqqiissusiornerit
Isumaqatigiissutip avataatigut Kommunalbestyrelse suliassaqarfinnut immikkut ittunut allanngortitsinernullu sukkulluunniit aningaasanik allannguisinnaapput ilassusiillutilluunniit.
Sulisoqarneq
Sulisut amerlassusilerneqarneri allanngortinneqarnerilu Kommunalbestyrelse-p ukiumut aningaasaliiffiusumut missingersuusiornerminut atatillugu aalajangersartassavai. Suliassaqarfinnut atorfeqarnermut piumasaqaateqarnissamut allanngortitsinerit nunaqarfimmi sulisut Sullissivimmi pisortaq peqatigalugu aalajangersaavigineqassapput.
Nalunaarusiorneq aqutsinerlu
Nunaqarfimmi Aqutsisut Kommunalbestyrelse-p piumasaqaatai malillugit aningaasat ingerlanneqarnerinut nakkutilliineq akisussaaffigaat.
Nunaqarfimmi Aqutsisut ataavaartumik suliniutinut anguniakkanullu nalilersuisussaatitaapput. Sullissiviit pisussaaffigaat Nunaqarfimmi Aqutsisut aningaasaqarnermut ingerlatsinermut nalilersuinerannut atortussanik tunniussaqarnissaa.
Anguniakkanut nalilersuinermi najoqqutassaritinneqartut aallaavigineqassapput. Nunaqarfimmi Aqutsisut ingerlatat anguniakkamut naapertuutinngippata aaqqiissusiornissaq akisussaaffigaat.
Aningaasaqarnerup ingerlanera minnerpaamik qaammammut ataasiarluni misissorneqartassaaq. Aningaasaqarnerup ingerlanerata nalilerneqarnera siunertanut angnuniakkanullu sanillersuunneqassaaq. Nunaqarfimmi Aqutsisuniit makku eqqumaffigineqassapput:
• Aningaasanik malunnaatilimmik atuivallaarneq atuinikinnerluunniit
Siunertanut anguniakkanullut tunngatillugu:
• Naatsorsuutiginngisamik annerusumik ingerlataqartariaqarneq / neqeroortariaqarneq
• Siunertat anguniakkallu inorlugit sipporlugilluunniit ingerlatsineq
Ingerlatsinermi allannguutaasut nalunaarusiornermi ilanngunneqartassapput tassungalu ilanngullugu ukiup naaneranut inernerisassatut naatsorsuutigisat.
Nalunaarusiat Sullissivimmi aningaasanut immikkoortortaqarfimmut ingerlanneqartassapput Aningaasaqarnermut Ataatsimiititaliamut nalunaarusiornissamut atugassanngorlugit.
Qulakkeerneqassaaq nunaqarfinni sulisut qarasaasiatigut aningaasaqarnerup ingerlaneranut malinnaanissaminnut periarfissaqarlutillu attaveqassasut.
Maalaarutit ingerlanneqartarneri
Nunaqarfimmi allaffimmi sulisuniit aalajangiinernut tamanut atatillugu maalaaruteqarnermut ilitsersuinermik malitseqartitsisoqartassaaq. Maalaarutit ajornanngippat nunaqarfimmi allaffimmi sulisuniit aaqqinneqassapput. Maalaarut nunaqarfimmi allaffimmi sulisuniit aaqqinneqarsinnaanngippat maalaarfissamut ingerlanneqartassaaq.
Inatsisitigut maalaarsinnaatitannermut malittarisassaqarput tamanna tamatigut malinneqartassaaq.
Taamaalilluni Kommunalbestyrelse-p 7. December 2009-imi ataatsimiinnerani akuersissutigineqarpoq.
Jess Svane
Borgmester
Henrik Rafn
Adm. Direktør