Qaasuitsup Kommuniata suliassaataanik aqutsineq pillugu ileqqoreqqusaq.
Kommunalbestyrelse
§ 1. Kommunalbestyrelse 21-inik ilaasortaqarpoq.
Imm. 2. Kommunalbestyrelse borgmesterimik ataatsimik taassuma tullianik siullermik aappaanillu qinersissaaq, tak. kommunit aqunneqarnerat pillugu inatsisartut inatsisaat nr. 22, 18. november 2010-meersoq (sinnerani aqutsinissamik inatsimmik taagorneqartoq) § 6.
§ 2. Kommunalbestyrelsemut piareersaanermut, ataatsimiigiaqqusinermut aamma ingerlatsinissaannut malittarisassat kommunalbestyrelsep ileqqoreqqusaani aalajangersarneqassapput, tak. aqutsinissamik inatsimmi § 1 imm. 3 aamma kapitali 2.
§ 3. Kommunalbestyrelsep ileqqoreqqusaani borgmesterip suliassaanik malittarisassat aalajangersarneqassapput, tak. aqutsinissamik inatsimmi kapitali 3.
Ataatsimiititalianik pilersitsineq aamma ataatsimiititaliat suliassaannut il.il. maleruagassat nalinginnaasut.
§ 4. Aqutsinissamik inatsimmiittoq § 24 naapertorlugu aningaasaqarnermut ataatsimiititaliaq pilersinneqassaaq.
Imm. 2. Aningaasaqarnermut ataatsimiititaliami borgmesteri, ataatsimiititaliami siulittaasutut kiisalu kommunalbestyrelsemi ilaasortat arfinillit ilaasortaassapput.
Imm. 3. Aqutsinissamik inatsimmi § 25-imi kiisalu kapitali 5-imi ataatsimiititaliamut suliassiissutigineqartut Aningaasaqarnermut ataatsimiititaliap suliassarai.
Imm. 4. Aningaasaqarnermut ataatsimiititaliap nammineerluni suleriaasissani aalajangersassavaa.
Imm. 5. Tamatuma saniatigut Aningaasaqarnermut ataatsimiititaliap makku suliassarai:
- Destionation Avannaa A/S-mut sullissinermut isumaqatigiissut (takornariaqarnermut tunngasut)
- Aatsitassarsiornermut inuussutissarsiornermullu tunngasut, matumani ilanngullugit Avatangiisinut tunngatillugu apeqqutit, eqqagassaqarneq, VVM, SIA, pilersaarutit, sinaakkutit iliuusissatullu pilersaarutit, tusarniaanerit ilaatigut atuartitaanermut ilinniartitaanermullu tunngatillugu, aatsitassarsiornermut ikummatissarsiornermullu tunngatillugu ingerlanneqartut kingunissai pillugit paasissutissiineq.
- Akileraartarnermut atugarissaarnermullu isumalioqatigiissitap isumaliuutissiissutaasa kingunissaat
Imm. 6. Aningaasaqarnermut ataatsimiititaliap Qaasuitsup Kommuniata immikkoortuinik pilersaarusiorneq isumagissavaa, tassa Kommunalbestyrelsep piginnaatitsissut Aningaasaqarnermut ataatsimiititaliamut tunniussavaa, immikkut inatsimmi toqqaannartumik allassimanngippat Kommunalbestyrelse “ataatsimiinnikkut” aalajangiissasoq.
Ataatsimiititaliat ataavartut
§ 5. Ataatsimiititaliat ataavartut makku pilersinneqassapput:
1) Isumaginninnermut Ilaqutareeqarnermullu Ataatsimiititaliaq tallimanik ilaasortalik.
2) Sanaartornermut, Avatangiisinut Angallannermullu Ataatsimiititaliaq tallimanik ilaasortalik.
3) Aalisarnermut Piniarnermullu Ataatsimiititaliaq tallimanik ilaasortalik.
4) Kulturimut Atuarfeqarnermut Sunngiffimmilu Ataatsimiititaliaq tallimanik ilaasortalik.
5) Inuussutissarsiornermut Aatsitassarsiornermut Takornariaqarnermullu Ataatsimiititaliaq tallimanik ilaasortalik
Imm. 2. Ataatsimiititalit siulittaasussartik namminneq qinissavaat, tak. Aqutsinissamik inatsimmi § 27.
Imm. 3. Ataatsimiititaliat namminneerlutik suleriaasissatik aalajangersassavaat.
Imm. 4. Ataatsimiititaliat ataatsimiinnerini tamani ataatsimiititalip aalajangiussai imaqarniliamut allanneqartassapput, ilaasortanillu ataatsimiinnermi peqataasimasunit ataatsimiinnerup naanerani atsiorneqartassalluni. Ilaasortap kialluunniit isummani aalajangiussinermi imaqarniliamut allatsissinnaatitaavaa sulianilu, pisortaqarfimmut allamut ataatsimiititaliamit nassiunneqartussani, imaqarniliami tamanna ilisimatitsissutigisinnaallugu.
Imm. 5. Ataatsimiititaliat ataavartut siulersugassaraat imminnut suliassiissutigineqartut ukiumoortumik aningaasanut missingersuusiap akuerineqarsimasup iluani aammalu kommunalbestyrelsip akuersissutigisimasai allat naapertorlugit. Ataatsimiititaliat ataavartut aningaasat akuerineqarsimasut atuinermiit nikingannginnissaat nakkutigissavaat aammalu aningaasaqarnermut ataatsimiititaliaq aqqutigalugu kommunalbestyrelsimut siunnersuuteqassallutik aningaasat ilassutissatut akuersissutissat kissaatiginartutut pisariaqartutulluunniit isumaqarfiginarpata.
Imm. 6. Iliuusissat ataatsimiititaliamut allamut annertuumik pingaaruteqartut aallartinneqannginneranni ataatsimiititaliap ataavartup pisariaqartitsineq tunngavigalugu borgmesteri akuutillugu, tak. § 29 aqutsinissami inatsimmi, ataatsimiititaliaq pineqartoq isumaqatiginiassavaa.
§ 6. Imm. 1. Isumaginninnermut Ilaqutareeqarnermullu Ataatsimititaliap suliassaqarfiit makku iluini suliassat suliarisassavai
- Ulluunerani paaqqinnittarfinni akeqanngitsumik ineqartitsineq,
- Meeqqanik inuusuttunillu ikiorsiisarneq, paaqqinnittarfimmiititaqarneq ilanngullugu,
- Pinaveersaartitsineq,
- Siusinaartumik pensionit,
- Meeqqanut akilersuutit,
- Pisortat ikiorsiisarneq,
- Inuttut ikiorsiissutit allat,
- Utoqqarnik isumassuineq, utoqqaat illui utoqqalinersiutisiaqartullu angerlarsimaffii,
- Innarluutillit, taakku najugaqarfii ilanngullugit,
- Isumaginninnermi ikiorsiisarnerit allat, qimarnguiviit ilanngullugit,
- Sanaartukkat isumaginninnermi atortussat pilersaarusiorneri,
- Namminersortunit suliat tigooqqarneqarnerisa pilersaarusiorneri, imigassaq, innarluuteqartunik isumaginninneq, ulloq unnuarlu paaqqinnittarfiit, (aaqqissusseqqinneq),
Ataatsimiititaliaq siunnersuusiortassaaq kommunalbestyrelsemullu isumaginninnermi periusissanik naalakkersuinikkullu sulianik innersuusiortassalluni, aningaasaqarnermut ataatsimiititaliaq suleqatigalugu.
Imm. 2. Sanaartornermut Avatangiisinut Angallannermullu Ataatsimiititaliap suliassaqarfiit makku iluini suliassat suliarisassavai:
- Aqquserngit, ikaartarfiit tummeqqat,
- Eqqiluitsuutitsineq, aputaajaaneq ilanngullugu,
Pisuussutinik uumassusilinnik nakkutiginninneq, Pisuussutinut uumassusilinnut ataatsimiititaliaq suleqatigalugu,
- Kommunip suliffeqarfiutai, nunaqarfinni suliat atortunillu assartuisarneq ilanngullugit,
- Qatserisarfeqarneq,
- Teknikkikkut immikkoortortaqarfiup ataaniittut suliffeqarfiit allat, kommunip entreprenøreqarfia,
- Kiassaateqarfiit,
- Atserineq, eqqakkanik tigooqqaaneq, avatangiisit pillugit piumasaqaatit,
- Suliffeqarfiit pilersuisut allat, ikuallaaviit ilanngullugit,
- Sanaartugassatut pilersaarutit tamaasa, ataatsimiititaliaq namminersortullu suleqatigalugit,
- Avatangiisinik nakkutiginninneq taakkulu pillugit siunnersuineq,
- Nunat eqqissisimatitat pinngortitarlu pillugu suliat,
- Nunaminertamik allaffissorluni nakkutiginninneq sanaartugassallu akuersissutigineqartarneri,
- Namminersortunit suliat tigooqqarneqarnerisa pilersaarusiorneqarner, sanaartugassat, (aaqqissuusseqqinneq)
- Kommunip illuutaanik ingerlatsineq aserfallatsaaliinerlu, ataatsimiititaliat allat suleqatigalugit.
Ataatsimiititaliaq siunnersuusiortassaaq kommunalbestyrelsemullu innersuusiortassalluni, makkunannga innersuusiornermi aningaasaqarnermut ataatsimiititaliaq aqqusaarneqartassaaq:
- Pilersuinermik suliaqartut sulinerinut akigititassanik aalajangersaaneq,
- Kommunip sanaartugassai sanaartorniagaalu sumulluunniit atorniarneqarneri apeqqutaatinnagit,
- Inissianik amerliliiniarluni pilersaarutit,
- Inissianik imaluunniit aaqqissukkanik pisiniarneq tuniniaanerlu.
Ataatsimiititaliaq siunnersuusiortassaaq Aningaasaqarnermullu ataatsimiititaliamut innersuusiortassalluni makkunannga:
- Illoqarfimmi tunngaviusumik pilersaarusiorneq immikkoortunullu pilersaarusiorneq, Aningaasaqarnermut ataatsimiititaliamut tunniunneqarsimasoq.
Ataatsimiititaliaq siunnersuusiortassaaq Aningaasaqarnermullu ataatsimiititaliamut innersuusiortassalluni makkua oqaaseqarfigineqaqqusaagaangata:
- Nunaminertat asiartarfiit pilersaarusiorneqarneranni siunnersuutit – Naalakkersuisunit akuerineqartussanngortinneqarnissaat siunertaagaangat.
Ataatsimiititaliaq siunnersuusiortassaaq Aningaasaqarnermullu ataatsimiititaliamut innersuusiortassalluni makkunannga:
- Nuna tamakkerlugu pilersaarusiornermi kommuni ilaatinneqarsimatillugu.
Ataatsimiititaliaq ukununnga piginnaatinneqarpoq:
- Sumiiffiit qaqugukkut nutaamik pilersaarusiorneqassanersut aalajangiineq (illoqarfiup ilaanut pilersaarut aamma nunaminertat asiariartorfiusartut pilersaarutaat) Kommunimut pilersaarutip allanngortinneqarnissaa piumasaqaataanngikkaangat suliaqartassaaq,
- Illoqarfiup ilaanut pilersaarutinik akuerisaagallartunik akuersissuteqarneq atuuttunngortitsinerlu aamma
- kommunimut pilersaarutip tapissaatut akuerisaagallarsimasut akuersissutigineqarneri naalakkersuisunillu akuerisassanngortitat makku siunertaralugit:
- tamanik tusarniaanerup nalaani oqaaseqartoqarsimanngippat naammagittaalliuteqartoqaranilu pilersaarutip anguniagaanik pingaarnertullu ilusilersorneqarneranik allannguisinnaasumik.
Imm. 3. Aalisarnermut Piniarnermullu Ataatsimiititaliap suliassaqarfiit makku iluini suliassat suliarisassavai:
- aalisarneq, assartuineq, aningaasaateqarfiit saliinerlu pillugit tapiisarneq,
- aalisarneq piniarnerlu pillugit siunnersuisuuneq,
- aalisarnermik inuutissarsiuteqarnerup siuarsarneqarnerani qitiusoqarfimmik pilersaarusiorneq,
- aalisarneq piniarnerlu pillugit kommunip malittarisassaanik suliaqarneq,
- piujuaannartitsinissaq pillugu siunnersuisooqatigiit suliaannik ataqatigiissaarineq, Sanaartornermut avatangiisinullu ataatsimiititaliaq suleqatigalugu.
- Namminersortunit suliat tigooqqarneqarnerisa pilersaarusiorneri, aalisarneq piniarnerlu, (aaqqissuusseqqinneq),
Ataatsimiititaliaq siunnersuusiortassaaq kommunalbestyrelsemullu innersuusiortassalluni, makkunannga innersuusiornermi aningaasaqarnermut ataatsimiititaliaq aqqusaarneqartassaaq:
- Kommunip aalisarnermut politikkia,
- Ataatsimiititaliat akisussaaffiisa iluini kommunip malittarisassai,
- Piujuaannartitsineq aallaavigalugu atorluaanissaq pillugu aalajangiiffigisassatut siunnersuutit.
Imm. 4. Kulturimut, Atuarfeqarnermut Sunngiffimmilu Ataatsimiititaliap suliassaqarfiit makku iluini suliassat suliarisassavai:
- Ulluunnerani meeqqanik inuusuttunillu paaqqinnittarfiit, meeraaqqeriviit, meeqqeriviit aamma sunngiffimmi orniguttarfiit,
- Angerlarsimaffimmi paaqqinnittarfiit,
- Atuarfeqarfik, atuartut inissiaat ilanngullugit,
- AEU og FA
- Sunngiffimmi atuartitsineq,
- Atuakkanik atorniartarfeqarneq,
- Katersugaasiviit,
- Kulturikkut suliat paasititsiniaanerlu,
- Peqatigiiffinnut timersornermillu sulialinnut tapiissutit,
- Timersortarfiit kulturikkullu illorsuit,
- Siunnersuineq ilitsersuinermillu suliaqarneq.
- Namminersortunit suliat tigooqqarneqarnerisa pilersaarusiorneri, PPR, (aaqqissuusseqqinneq),
Ataatsimiititaliaq siunnersuusiortassaaq kommunalbestyrelsemullu innersuusiortassalluni, makkunannga innersuusiornermi aningaasaqarnermut ataatsimiititaliaq aqqusaarneqartassaaq:
- Kommunip kulturi pillugu politikkia,
- Peqatigiiffinnut timersornermillu suliaqartunik tapiissuteqartarnermi malittarisassat,
Imm. 5. Inuussutissarsiornermut Aatsitassarsiornermut Takornariaqarnermullu Ataatsimiititaliap suliassaqarfiit makku iluini suliassat suliarisassavai:
- Inuutissarsiuteqalerniarluni ilinniarnerit,
- Inuussutissarsiornermik siuarsaaneq siunnersuinerlu,
- Kommunip inuutissarsiuteqarnermik suliai,
- Piareersarfiit
- Inuutissarsiortut kattuffiinik ataatsimiititaliap sulineranik ataqatigiissaarisuuneq,
- Sungiusartitseqqinneq, misiliilluni sulisitsineq sulilersitsisarnerlu,
- Suliffissarsiortunik tapiisarnerit,
- Sulisunik aatsitassaqarnermi suliffeqarfissuup pisariaqartitaanut naleqqussaaneq,
- Attaveqarneq (pilersuineq assartuinerlu)
Ataatsimiititaliaq siunnersuusiortassaaq kommunalbestyrelsemullu innersuusiortassalluni, makkunannga innersuusiornermi aningaasaqarnermut ataatsimiititaliaq aqqusaarneqartassaaq:
- Kommunip inuutissarsiutit pillugit politikkia,
- Aatsitassarsiorneq
- Kommunip suliffeqarneq pillugu politikkia.
§ 7. Nunaqarfinni ingerlatseqatigiinni aqutsisuni ilaasortat ikinnerpaamik pingasut amerlanerpaamillu tallimat ilaasortaassapput. Nunaqarfinni kisimiillutik aqutsisuni amerlanerpaamik pingasut ilaasortaassapput. Nunaqarfinni aqutsisut 14-iusut allattorsimaffiat takussutissatut ilanngunneqarpoq ilanngutaq 1-mik taaguuserlugu.
Imm. 2. Nunaqarfinni aqutsisut siulittaasussartik namminneq qinissavaat, tak. Aqutsinissamik inatsimmi § 51.
Imm. 3. Kommunip nunaqarfiini aqutsisut suleriaasissaat kommunalbestyrelsep aalajangersartassavai, nunaqarfiit ataasiakkaat tusarniaaffigereeraangamigit.
§ 8. Nunaqarfimmi aqutsisut ataatasimiinnissaannut piareersarnermut, ataatsimiigiaqqusinermut aamma ingerlatsinneqarnissaannut malittarisassat, nunaqarfimmi aqutsisut siulittaasuata suliassai ilanngullugit, nunaqarfimmi aqutsisut suleriaasissaanni aalajangersarneqassapput, tak. Aqutsinissamik inatsimmi §§ 51-54.
§ 9. Nunaqarfimmi aqutsisut ataasiakkaat sunik piginnaatitaaffeqassanersut kommunalbestyrelsemit aalajangersarneqassaaq, aqutsinissamik ileqqoreqqusanut ilatillugu. (isumaqatigiissuteqarluni aqutsineq).
Imm. 2. Missingersuusiat kommunalbestyrelsemit akuersissutigineqartut iluini kommunalbestyrelsellu maleruaqqusatut aalajngersagai naapertorlugit ingerlatsisoqassaaq.
§ 10. Nunaqarfimmi aqutsisut susassaqarfinni ingerlatsinerat kommunalbestyrelsemit nakkutigineqassaaq.
Ileqqoreqqusaq allannguuteqassappat
§ 11. Ileqqoreqqusaq una atuutilerpoq 6. september 2011.
Imm. 2. Tamatuma saniatigut Qaasuitsup Kommuniani kommunip aqunneqarnissaanik ileqqoreqqusat 14. januar 2011-meersut atorunnaarsinneqarput.
§ 12. Kommunalbestyrelsep ataatsimiinnerini marlunni sivikinnerpaamik ullunik 14-inik akunneqartuni ileqqoreqqusamut uunga allannguutissatut aamma ilassutissatut siunnersuutit suliarineqassapput tak. Aqutsinissamik inatsimmi § 1, imm. 2 aamma allannguutit ilassutillu akuerineqareersut naalakkersuisunut nassiunneqassapput tak. Aqutsinissamik inatsimmi § 1, imm. 4.
Taamaalilluni kommunalbestyrelsep 14. juli 2011-imi aamma 6. september 2011-imi ataatsimiinnerini akuersissutigineqarpoq.
Jess Svane Henrik Rafn
Borgmester Pisortaaneq