Qaasuitsup Kommuniani aqutsisut aamma Naalakkersuisut nanertiallassutigeqisaminnik ilisimatinneqarput Upernaviup eqqaani nunaqarfimmi Nutaarmiuni inuit arlallit inuunerannik naleqartumik alianaqisumillu pisimasoqarsimasoq.
Borgmesteri Jess Svane aamma Naalakkersuisut siulittaasuat, Kuupik Kleist;
- Pisimasoq quarsaarutigeqaarput qularutiginngilarpullu pisimasoq nunaqqataasunut eqqaaniittunullu annertuumik sunniuteqassasoq.
- Manna aqqutigalugu qimagaasunut, ilaqutaasunut nunaqqataasunullu misiginneqatiginninnerput apuukkusupparput. Nalussanngilarsi eqqarsaatitsigut najoratsigit, piffissamilu aggersumi nukissaqartitaanissassinnik kissaallusi.
- Kommunimiit Naalakkersuisuniillu sapinngisarput atorlugu ikiuiniarnissarput piareersimaffigaarput, maanna suliniutigineqalereersut saniatigut tunniussinnaasagut piareersimaffigalugit.
Ilisimatinneqarpugut nunaqarfinni peqqinnissamik sullissisut Nutaarmiut eqqaanniittut innuttaasunut pisumut tunngatillugu oqaloqateqarnissaminnik atorfissaqartitsisunut ammassasut.
Aamma ilisimatinneqarpugut Tasiusami ajoqi, Upernavimmi palasi kiisalu Qaasuitsup Kommuniani Isumaginninnermut Aqutsisoqarfimmiit orniguttut periarfissaq siulleq atorlugu Nutaarmiunut ingerlassasut. Tupaqqanerup aliasunnerullu nalaanni taakku ikiuuttunut ilaassallutik.
Innuttaasunut pisumik alianartumik eqqorneqartunut telefonikkut oqaloqateqarsinnaaneq ullumimiit ammarneqassaaq, taannalu ullup unnuallu ingerlanerani ammasussap normui tassaapput:
59 74 35 aamma 58 56 93
Inuulluaqqusilluta
Kuupik Kleist Jess Svane
Naalakkersuisut Siulittaasuat Borgmesteri, Qaasuitsup Kommunia