Gorm Diernisse: - Nalilersuineq ingerlapparput aamma aappaagu suna pitsaanerusumik ingerlassinnaanerlugu oqaluuseraarput. Assiliisoq: Irene Jeppson
Royal Arctic Logistics Cairn Energyp uulisiorneranut atatillugu assigiinngitsutigut arlalitsigut sullissisarpoq soorlu pilersaarusiornernik, imermik aamma orsussamik ilaalu ilanngullugit pilersuinermik
Allaaserinnittoq Irene Jeppson, Royal Arctic Line
"Uagut peqataasimanerput pillugu pitsaasumik akissuteqarfigineqarpugut, kisianni soorunami tamakku ilaannik iluarsisassaqarpugut," assartuititsinermi pisortaq Gorm Diernisse oqarpoq.
Umiarsuarnik imaani uuliasiortunut kiffartuussisunut 19-inut, sikusiutinut, alapernaarsuutinut aamma umiarsuarmut akunnittarfimmut Royal Arctic Logistics sullissisuuvoq. Piffissaq ingerlareersoq assut ulapinnarpoq kisianni aamma ilikkagaqarfigeqaarput.
"Upernaap ingerlanerani umiarsuaatileqatigiiffiit assigiinngitsut attaveqarfigisarpavut aallaqqaataanilu tamanna assorsuaq arriippoq. Suliffeqarfiit uagut saaffiginnissutitsinnut tunngatillugu iliuuseqarpiartanngillat, kisianni taamaallutik ataatsikkorsuaq akissutit takkussuupput."
Aallaqqaataani Royal Arctic Logisticsimi Nuummi ataatsimik atorfilittaqarpugut, kisianni tamanna ingerlaannartumik allanngortipparput.
" Aallaqqaataani Nuummi inummik ataatsimik atorfilittaqarpugut pilertortumilli paasivarput Aasianni atorfeqartoqarutta pitsaanerpaajussasoq. Mailit atorlugit amerlasuut iluarsineqarsinnaapput kisianni pitsaanerpaajuvoq sumiiffimmi najuukkaanni. Uuliasiortut tulaaveqartariaqarput taamaalillutik toqqisisimaniassagamik taamaattumillu aalajangerpugut sulisorput Aasiannut ”nuutsinniarlugu”."
Umiarsuarnik sullissisutut atorneqarpugut
"Umiarsuaatileqatigiiffiit ilaasa naatsorsuutigisimanngikkarluarpaat sullissisunik atugaqarnissartik aatsaalli ajornartorsiutinik naammattuuereeramik uagutsinnut saaffiginnipput ikioqqullutik. Umiarsuit amerlasuut Kalaallit Nunaata imartaani siornatigut angalasimanngillat taamaattumillu uagutsinnik naatsorsuutiginninnerat annertuvoq. Amerlasuut tupassutigaat angalaniarnermi pissutsit nunani allanitut innginnerat kiisalu soorlu assersuutigalugu kingoraartissanik pissarsiorneq sivisunerusartoq," Gorm Diernisse oqarpoq.
"Umiarsuit ilaat tassanngaannartumik ajornartorsiuteqalerput taamaaligamillu uagut sullissisutut atortariaqalerluta. Amerlasuut aammattaaq ilimagisimanngilaat soorlu assersuutigalugu nioqqutissanik aamma taquassanik nutaanik siusinaartumik inniminniisoqartariaqarnera."
"Uagut suna tamaat isumagaarput umiarsuit tikinnissaannut aamma aallarnissaannut ilanngaaserisutut suliaqarnermiit, Kangilinnguanut, politiinut aamma ilanngaaserinermi oqartussanut attaveqartarnernut. Umiarsuit arlaat sarpissaminik imaluunniit arlaannik allamik amigaateqarpat, taava uagut suliassaraarput amigaatigineqartup pissarsiarinissaa. Umiarsuarmi inuttat arlaat kigutit nakorsaliartariaqarpat taava uagut piffissamik pissarsissunnissaa isumagisarparput. Umiarsuarmi pisariaqartinneqartut suugaluartut tamarluinnaasa uagut isumagisarivavut."
"Iluarinninnermut tunngasut arlallit uagutsinnut tusarliunneqarput. Nalilersuineq ingerlapparput aamma aappaagu suna pitsaanerusumik ingerlassinnaanerlugu oqaluuseraarput. Qularutissaanngitsumik uagut pitsaanerusumik pilersaarusiorsinnaasariaqarpugut. Misigisatta ilagaat umiarsuaq Nuummut ingerlaartoq Nuummullu miilit arlaqanngitsunnguit ungasitsigilersoq Aasiannut sangutinneqartariaqarsimavoq. Imaluunniit aammattaaq killormut umiarsuaq Aasiannukartoq Nuummut sangutittariaqarluni," Gorm Diernisse oqarpoq.
Immami uuliasiorluni sulineq qaninngoorlugu
Taakku Royal Arctic Line-mit suliarineqarput. Qaasuitsup Kommuniata allatat saqqummiuppai suliffeqarfimmit
akuerineqarluni.