Aasiaat Transport Cairn Energyp containeriutaanik ingerlatsinermik aammattaaq eqqagassaataannik immikkoortiterinermik isumaginnittuuvoq. Ass.: Irene Jepson
Aasiaat Transport Cairn Energyp illoqarfimmut tikinnerata kingorna immikkut ittumik ulapputeqalerpoq.
Allaaserinnittoq Irene Jeppson, Royal Arctic Line
"Qularnanngilluinnarpoq Cairn Energy pissutaalluni suliassat annertusisimasut tamannalu Aasiannut pitsaavoq. Uagut naatsorsuutigaarput aappaagut uuliasiortut apriilimi maajimiluunniit tikeqqippata suleqatigiinneq ingerlateqqissallugu," Eri Stæhr oqarpoq.
"Uagut toqqaannartumik Cairn Energy isumaqatigiissuteqarfiginngilarput, kisianni Arctic Base Supply suleqatigaarput. Nalunngilarput Cairn Energymik uagut sulinerput assut iluarisimaarneqartoq."
"Uagut isumagisartakkagut tassaapput taakku containeriutaannik assartuineq. Uuliasiornermik ingerlatsisut sullisileratsigilli annertunerusumik suliassaqalerpugut. Ataasinngornermiit tallimanngornermut sulisarpugut aammattaaq akuttunngitsumik sapaatit akunnerata naanerani imaluunniit unnukkut," Aasiaat Transportip pisortaa Eri Stæhr oqarpoq.
Ullut tamaasa biilinik ingerlatitsisut umiarsualiviup aamma ujaqqeriviup akornanni uteqattaartuartarput.
"Aallaqqaataani suliassat nutaarpassuit uippallernarput kisianni qaammatit ingerlanerini tamanna nalinginnaasunngorpoq. Maannakkut suut tamarmik ingerlalluarput kiisalu ilutsinni suleqatigiilluarpugut aamma Cairn Energymik."
Uuliasiortut sullinnerisa saniatigut aammattaaq Aasiaat Transportimit maanimiut sullinneqartarput.
"Polar Raajat aammattaaq assartuuttarpagut umiarsualivimmiit suliffissuarmut raajanik assartuisarluta. Tamatuma saniatigut nuunniartut containeriinik aamma angallatinik ingerlatsisarpugut. Cairn Energymik suleqateqalernitta kingorna suliarisartakkatta annertunersaat tassaavoq umiarsualiviup aamma ujaqqeriviup akornanni uteqattaarneq. Uagut isumagisavut tassaapput containeriutaannik ingerlatsineq aamma orsussaasivinnik mittarfimmukaassisarneq. Eqqagassat aammattaaq immikkoortitertarpavut. Suut tamarmik imerpalasut ikuallajasut containerinut immikkut ittunut ikineqartarput aamma eqqagassat uuliartarlit taamaaliorneqartarput."
"Piffissaq pissanganartoq ornipparput uagullu suli neriuutigaarput Cairn Energymut sullissisooqqinnissarput," Eri Stæhr oqarpoq.
Immami uuliasiorluni sulineq qaninngoorlugu
0
Taakku Royal Arctic Line-mit suliarineqarput. Qaasuitsup Kommuniata allatat saqqummiuppai suliffeqarfimmit akuerineqarluni.