Richardt Efraimsen 46-nik ukiulik umiarsuarmi uuliasiortunik kiffartuussisumi ”Olympic Poseidon”-imi sulilluni inuttaavoq. "Uanga kisimiillunga umiarsuarmi uuliasiortunik kiffartuussisumi kalaalersaavunga," Richardt Efraimsen oqarpoq. Asseq: Nammineq pigisaq
Richardt Efraimsen umiarsuarmi uuliasiornermi kiffartuussisumut inuttaalluni aalisartunut attaveqaqatigiinninnermut naalagaalluni sulivoq
Allaaserinnittoq Irene Jeppson, Royal Arctic Line
"Uuliasiorneq inuussutissarsiutaavoq pissanganartoq amerlasuunik unammillernartulik. Aalisartut arlallit nutaanik suliffinnik misiliinissaminnut nangaasimapput. Taakkununnga uanga oqaannarusuppunga; misiliiniaritsi. Aalisartuullunimi inuussutissarsiorneq ingerlanerliorpoq taamaattumik uanga aalisartunut allanut uuliasiornermi suliffissarsiornissaat kaammattuutigerusuppara," Narsarmioq Richardt Efraimsen 46-nik ukiulik oqarpoq.
Nammineq fiskeskipper 1. gradi angullugu ilinniagaqartuuvoq. Aggustillu naalernerani Richardt Efraimsen umiarsuarmut uuliasiortunik kiffartuussisumut ”Olympic Poseidon”-imut inuttaasussatut pissarsiarineqarpoq.
"Umiarsuarmut ikinnginninni Esbjergimi ulluni pingasunik nunarsuaq tamakkerlugu imaani uuliasiornermi sulisussanut ilinniartitsivimmi pikkorissaqqaarpunga. Pikkorissarnermi ilaatigut uagutsinnut ilinniartitsissutigineqarput sillimaniarneq, imaani uuliasiornermi annaassiniarneq, qatserineq, ikiueqqaarneq allarpassuillu."
"Uagut aammattaaq annaassiniarnermi sungiusartinneqarpugut qulimiguulimmik nakkartuusaarluta pinnguarluta. Sungiusarneq naluttarferujussuarmi ingerlanneqarpoq. Tamatuma kingorna qulimiguulimmiit annanniarluta anillanniarluta naluttussaavugut," Richardt Efraimsen oqaluttuarpoq.
Pikkorissarneq naammassiniariartoq Nuummut aallarpoq ”Olymic Poseidon”-imut ikiartorluni.
"Nuummiit aallarpugut aggustip 26-ani Qeqertarsuup Tunua naleraralugu, Qeqertarsuup kitaani Cairn Energyp qilleriveqarfianut. Uanga kisimiillunga umiarsuarmi kalaalersaavunga. Kalaallit tallimaalluta Esbjergimi pikkorissaqataavugut ilakka allat kalittaatini inuttanngorput."
"Uanga ullaakkut arfineq-pingasuniit unnukkut qulit tungaanut sulinissamut piareersimasarpunga. Suliassat assigiinngitsuupput usilersuineq/usingiaaneq solarimik aamma imermik tunniussuineq ilanngullugit."
- Sulinngikkaangassi piffissaq qanoq atortarpisiuk?
"Uagut piffissaq tamaat umiarsuarmiippugut taamaattumik sulinngiffik sininnermut, fjernsynimik, dvd-iinik isiginnaarnermut imaluunniit timigissartarfimmi sungiusarnermut atortarparput."
"Umiarsuaq uuliasiortunik kiffartuussisoq Norgemiut pigisaraat taamaattumik umiarsuarmiitilluta skandinaviamiutut oqaloqatigiittarpugut, attaveqaqatigiinnerup sinnera tamarmi tuluttut ingerlanneqartarpoq. Qillerivimmi inuit nunanit tamalaaneersorpassuit atorfeqarput taamaattumillu pissusissamisuuginnarpoq attaveqaqatigiinnerup tuluttut ingerlanneqarnera. Uagut qillerivimmut ikinissamut akuerineqanngilagut. Tamatuma akerlianik qillerivik qanittuararsuullugu kranit atorlugit usilersuillutalu usingiaasarpugut. Qulimiguulik mileraangat imaluunniit tingileraangat usilersuineq aamma usingiaaneq tamarmik unitsinneqartarput."
Richardt Efraimsen oktobarip 16-iani niuvoq neriuutigaalu aappaagu Cairn Energy Nunatsinnut uteqqippat atorfinitseqqinneqarumaarluni, Richardt Efraimsen oqarpoq.
Immami uuliasiorluni sulineq qaninngoorlugu
Taakku Royal Arctic Line-mit suliarineqarput. Qaasuitsup Kommuniata allatat saqqummiuppai suliffeqarfimmit akuerineqarluni.