Sumiffia: Allorniusat sanimukartuni 70° 40'N – ammukartunilu 58° 08' W
Uummannaq qeqertami 12 kvadratkilometerinik angissusilimmiippoq tunuleralugu qaqqarsuaq uummatitut isikkulik 1.175 meterinik portussusilik, illoqarfiup ilisarnaataa ateqaatigisaalu.
Uummanaq 1763-imi tunngavilerneqarpoq. Inuussutissarsiutit pingaarnersaraat aalisarneq, pingaartumik qaleralinnik. Aalisakkat illoqarfimmi nunaqarfiinilu suliffissuarni nutaaliaasuni suliarineqartarput.
Illoqarfik 1300-t missaannik inoqarpoq. Uummannaq arfineq marlunnik nunaqarfeqarpoq: Ikerasak (235-nik inulik), Saattut (217-inik), Ukkusissat (172-inik), Illorsuit (92-inik), Nuugaatsiaq (86-inik), Niaqornat (57-inik) aamma Qaarsut 195-inik inulik. Tassa Uummannami eqqanilu innuttaasut katillutik 2.350 missaanniipput.
Uummannattaaq ilisarnaatiga ujaqqanik qussakkanik qarmalimmik oqaluffeqarnini 1935-imi sanaamik. Oqaluffik nunatsinni oqaluffittut ujaqqanik qammarneqarsimasut sulilu atorneqartut annersaraat.
Uummannami inuussutissanik pisiniarfiusinnaasunik pingasunik niuertarfeqarpoq, pequtaarniarfeqarpoq, timersortarfimmi cafeteriaqarpoq, grillbareqarpoq, imerniartarfeqarpoq, akunnittarfeqarpoq kalaalimineerniarfeqarlunilu.
Illoqarfimmi sanaartornermik suliffiutillit arlaqarput, innaallagissap aqqutaanik ikkussuisartoqarluni arlalinnillu biilileriffeqarluni.
Illoqarfik timersortarfeqarpoq, tassanilu ingerlanneqarsinnaapput arsaanneq, arsarneq sulorarnerlu, aammalumi illup iluani timersuutit allat. Periarfissaqarportaaq timersortarfiup timigissartarfiani timigissartoqarsinnaaneranut.
Uummannaq immikkut kommuniuvoq 31.12.2008 tikillugu. 2009-mi januaarip aallaqqaataanit nunatsinni kommunit kattussuunneqarneranni Uummannaq Qaasuitsup Kommunianut, avannaani Qaanaamiit kujataani Kangaatsiamut isorartussusilimmut, ilanngunneqarpoq.