Illoqarfik Aasiaat nunatta kimmut sineriaani Qeqertarsuup tunuata kujataatungaata kippasissuaniippoq, 3.000-illu missaanik inoqarluni.
Naak aalisarneq inuussutissarsiutit pingaarnersarigaluaraat Aasiaattaaq Avannaani ilinniartoqarfimmut qitiupput, ilaatigut ilinniarnertuunngorniarfeqarlutik innarluutilinnullu atuarfeqarlutik. Ilinniarfiit saniatigut Aasiaattaaq inuussutissarsiuteqarfissatut periarfissarpassuaqarput. Aasiaat ingerlalluartumik umiatsialiorfeqarput, containerinik niooraasinnaaffiusumik umiarsualiverujussuaqarput, kiisalu timmisartunut suluusalinnut mittarfeqarlutik.
Aasiaat nunatsinni illoqarfiit annerit assigaaat. Aasiaat napparsimmaveqarpoq, utoqqarnut angerlarsimaffiuteqarpoq, meeqqeriveqarpoq, meeraaqqeriveqarpoq, meeqqanut atuarfeqarpoq, Piareersarfeqarpoq, atuakkanik atorniartarfeqarpoq, inuusuttunut sukisaarsartarfeqarpoq, timersortarfeqarpoq il.il. Suliffeqarfiit mikisut anginerujussuillu saniatiut Aasiaat Radio tassaavoq nunatsinni sinerissami radiukkut kiffartuussinermut qitiusoq.
Kulturi eqqarsaatigalugu takuniarneqarsinnaapput katersugaasivik katersortarfillu, eqqumiitsuliortup nunarsuarmi tamarmi ilisimaneqartup Per Kirkebyp qalipataanik 24-nik pinnersarneqarsimasoq.
Ukiuunerani periarfissaqarportaaq aqqutissiorikkat atorlugit sisoraatinik arpannissamut, qamuuteralannissamut qimussernissamullu. Timersortarfimmi illup iluani timersuutinik ukioq kaajallallugu ingerlanneqarsinnaasunik periarfissarpassuaqarpoq.
Aasiaat qanga niuertoqarfiupput taaneqarlutik Egedesminde. Egedesminde 1763-imi tunngavilerneqarpoq Niels Rasch Egede-mit, angunni palasi Hans Egede, Kalaallit Nunaatattaaq apustiliatut taaneqartartoq, atsiullugu.
Qeqertat amerlaqisut illoqarfiup qanitaaniittut eqqissisimatitaapput. Aasiaat eqqaanni tupinnaannartumik periarfissaqarpoq uumasunik qaqutigoortunik takusaqarniarnissamut. Aasaanerani eqqaa imeqqutaallanik ulikkaartarpoq, aamaakkulu qeqertat akornammi qipoqqaat tikaagulliillu, ukiuuneranilu qilalukkat qernertat.