Kaffimik oqaasiuvoq qallunaatuumiit tigusaq isumaqarluni kaffisoqatigiinneq. Kalaallit inuiaapput kaaffisortorujussuit, kisiannili kaffi pivallaanngikkaluarlugu ataatsimoorneq nutaarsiassanillu tunioraqatigiinneq, oqaloqatigiinnerillu ingerlanneqartarlutik.
Kalaallit kaffisortitsineranni soorunami kaffeqartarpoq, teeqarluni aammalu kaagit nammineq uutat, aammalu taakku saniatigut kalaaliminernik sassaalliisoqartarpoq, soorlu suppit assigiinngitsut imaluunniit tuttu siataq.
Kaffisortitsinissamut pissutissaqartuaannarpoq, annertunerusumik meeqqat inuuvianni, apersortitsinerni/qeqarnerni ullorsiornerni nalliuttunilu kaffisortitsineqartarluni.
Taamatuttaaq kulturikkut nalliuttorsiornerni, soorlu meeraq pernarsimappat, puisimik tuttumilluunniit, taamaalinerani nalliuttorsiorneq annerusarluni.
Kaffisoriartoqquneqaruit angerneq nunnaartitsisarpoq. Tamanna takornartaanngilaq tassami Kalaallit Nunaanni kikkunnilluunniit tikilluaqqusineq inuunerup ilagimmagu.
Eqqaamajuk kamillassagavit maluginiarlugillu isaasut aniasullu, tassa aggeqqusat amerlasinnaasarmata, kaffi kaagillu inunnut amerlasuunut naammattussaallutik.
Nuannarineqartarpoq tunissutissannguamik nassarnissaq, pisariaqavissoranili. Aningaasat allakkat puuanut ikillugit nuannaartitsisarput atorneqartorujussuullunilu.
Ulluinnarni kaffisortitsineq ualinerani aallartittarpoq aammalu sapaatip akunnerisa naanerani marlup kingorna aallartisinnaasarluni.