Pisortatigoortumik katinnissarsi (ulluinnarni borgmesterimut katinnermik taaneqartartoq) imaluunniit inooqatigiittut nalunaarsorneqarnissarsi (suiaqatigiit inooqatigiittut nalunaarsorneqarnerat) kissaatigigussiuk Qaasuitsup Kommuniani illoqarfigisassi allatseqarfianut saaffiginnissuusi.
Illoqarfigisassinni allatseqarfimmut saaffiginnikkussi allatseqarfimmit immersugassamik tunineqassaasi immersornissaanullu ilitsersuunneqarlusi.
Katinnissarsi ullunik 14-inik sioqqullugu immersugassaq allatseqarfissinnut tunniutissuarsi, immersukkamullu ilanngullugu uppernarsaatit uku ilanngunneqassapput:
- Kuisinnermut uppernarsaat.
- Avinnermut uppernarsaat (siornatigut katissimagaanni).
- Uillarnermut, nuleersimanermullu uppernarsaat (siornatigut aapparisimasaq toqukkut qimagussimappat).
- Inuttut paasissutissat (Inuit allattorsimaffianut piniarneqassaaq).
Paasissutissat allat:
Nalinginnaasumik Ilulissani katittoqartillugu Kommunalbestyrelsip ataatsimiittarfiani katititsineq ingerlanneqartarpoq.
Taamaakkaluartorli katinniartut pisinnaatitaaffigivaat sumiluunniit katissinnaallutik, assersuutigalugu iluliarsuit saavanni, imaluunniit angerlarsimaffimmi.
Taamaattoqassatillugulu katittussat namminneerlutik akisussaaffigissavaat borgmesterip imaluunniit taassuma sinniisaataa katiffissamut angalatinnissaa.
Katititsinermi qanigisat nalunngisallu peqataanissaminnut tikilluaqqusaapput.
Ilulissani katittoqassatillugu borgmesteri illoqarfimmiikkuni pisussaavoq katititsissalluni. Angalatilluguli kommunalbestyrelsimi ilaasortat katititsinissamut pisinnaatitaapput.