Piginneqatigiilluni inissiaatit tassaapput piginneqatigiilluni inissiaatillit peqatigiiffiata pigisai ingerlataalu.
Piginneqatigiilluni inissiaatillit peqatigiiffiat siunertaqartarpoq piginneqatigiilluni inissiaatinik sanaartornissamut imaluunniit pisinissamut, aammalu peqatigiiffik piginnittutut inissiaatinik ilaasortanut allaffissornikkut ingerlatsisarpoq.
Namminersorlutik Oqartussat kommunillu piginneqatigiilluni inissiaatillit peqatigiiffianut inissiamik pisinissamut imaluunniit sanaartornissamut erniaqanngitsunik akileraarutitaqanngitsunillu taarsigassarsititsisarpoq. Taarsigassarsiat erniaqanngitsutut taarsersugassaanngitsutullu taarsigassarsiarititaattut piffissami killeqanngitsumi.
Illoqarfinni piginneqatigiilluni inissiaatillit peqatigiiffiat minnerpaamik arfinilinnik inissiartaqassaaq nunaqarfinnilu minnerpaamik sisamanik.
Piginneqatigiilluni inissiaatillit peqatigiiffiata inissianik ima pissarsisarpoq:
- Nutaamik illuliorneq, piginneqatigiilluni inissiaatillit peqatigiiffiannit sanatitsisuuffigineqartoq
- Piginneqatigiilluni inissiaatillit peqatigiiffiata piginneqatigiilluni inissianik nutaanik sanatitsisumit pisinera
- Inissianik attartortittakkanik piginneqatigiilluni inissiaatinngortitsilluni allanngortitsineq
Aningaasaliineq:
Piginneqatigiilluni inissiaatillit peqatigiiffiata inissiaatai imatut aningaasalersorneqassapput:
- Inissiap ataatsip sananeqarneranut aningaasartuutit 7%-ii ilaasortanit ataasiakkaanit nammineerluni aningaasaliissutitut akilerneqassapput
- Sanaartornermut aningaasartuutit tamakkiisut 33,33%-ii Namminersorlutik Oqartussanit erniaqanngitsutut akilersugassaanngitsutullu taarsigassarsiaritinneqassapput
- Sanaartornermut aningaasartuutit tamakkiisut 33,33%-ii kommunimit erniaqanngitsutut akilersugassaanngitsutullu taarsigassarsiaritinneqassapput
- Sanaartornermut aningaasartuutit tamakkiisut 26,33%-ii piginneqatigiilluni inissiaatillit peqatigiiffiata aningaaserivimmit imaluunniit realkredittimit taarsigassarsiarissavai
Namminersorlutik Oqartussat kommunilu piginneqatigiilluni inissiaq anginerugaluarpalluunniit annerpaamik 105 m2-nut tapiissuteqassapput, aammalu inissiaq akisunerugaluarpalluunniit sanaartornermut aningaasartuutinut tamakkiisunut annerpaamik m2-mut 15.000 kr.-inik tapiissuteqassallutik.
Taamaattumik piginneqatigiilluni inissiaatillit peqatigiiffiat inissiamut ataatsimut annerpaamik Namminersorlutik Oqartussaniit 525.000 kr.-it aamma kommunimiit 525.000 kr.-it tikillugit erniaqanngitsunik akilersugassaanngitsunillu pissarsisinnaavoq.