Nunaminertamik tunineqarnissamut suut piumasarineqarpat?
Nunaminertaq atortinnagu siullermik nunaminertat pillugit oqartussanit akuersissummik tunineqaqqaassaatit. Sanaartornerinnarmut atuutinngilaq, assersuutigalugu biilinut uninngasarfimmik, naatsiivimmik, umiatsianut qaqitsivinnut, qimmilivimmik il. il. atuisoqartinniartillugu aamma taakku atuutsinneqarput.
Nunaminertap tunniunneqareersimasup allatut atorneqarnialernerani aamma akuersissut pisariaqarpoq. Tamatuma saniatiguttaaq aamma ingutserineq sanaartoqqinnerlu akuersissutigineqaqqaartariaqarput, ilaatigut aamma ikuallattooreernerup kingorna sanaartoqqilerneq ilanngullugu. Tunniussisarnernut tunngasut pillugit ataani allaqqasut takukkit.
Kikkut nunaminertamik tunineqarsinnaappat?
Inuit tamarmik, suliffeqarfiit, ingerlatseqatigiiffiit, peqatigiiffiit assigisaalu nunaminertamik tunineqarnissa-minnut qinnuteqarsinnaapput. Qallunaat Nunaanni innuttaasuunngikkaluartunulluunniit inunnut, taavalu ingerlatseqatigiiffiit naalagaaffeqatigiinni nalunaarsorsimanngikkaluartunut aamma atuuppoq.
Nunaminertamik tunisinneq inuttut nammineq pigineqartussaavoq, tassa imaappoq inummut aalajangersimasumut imaluunniit inatsisilerituumut tunniunneqartussaalluni. Taamaattumik atuisinnaanermut pisinnaatitaaffiup tunniunneqarnera nunaminertat pillugit oqartussanit akuerineqassaaq, assersuutigalugu nunaminertamiittumi pigisanik tuniniaanerni. Ileqqunik malinnittuuniaraanni piginnittunngortup nunaminertap atornera pillugu inatsit atuuttoq malittarissavaa.
Kikkut akuersissummik tunniussisinnaasuuppat?
Illoqarfiit nunaqarfiillu iluanni kommunalbestyrelsi nunaminertat pillugit oqartussaasuupput, illoqarfiilli nunaqarfiillu avataanni Naalakkersuisut nunaminertat pillugit oqartussaasuullutik, tassa imaappoq nunaannarmi. Nunap immikkoortua akuerisaasoq pillugu nunaminertamut oqartussaassuseqarneq Naalakkersuisunit kommunalbestyrelsimut tunniunneqarsinnaavoq.
Qinnuteqaat qanoq immersorneqartarpa?
Nunaminertamik tunineqarnissamut qinnuteqaat kommunimut tunniunneqartuaannassaaq. Nunaminertamut qinnuteqaat immersugassaq naliginnaasoq anillatseriarlugu atorneqarnissaa innersuussutigineqassaaq. Immersugassaq teknikkeqarfimmut tunniunneqarsinnaanera periarfissaavoq, soorlu aamma immikkoortortaqarfimmiit immersuinissamut ilitsersuutsissinnaanermut periarfissaqarluni.
Nunaminertap qinnuteqaatigineqartup annertussusaa sumilu inissisimaffissaa kiisalu nunaminertap atorneqarnissaanut kissaatigineqartoq qinnuteqaammi ilisimatitsissutigineqassaaq, ilanngullugu nunaminertami sanaartorfiussanersoq aamma ilisimatitsissutigineqassalluni.
Aammattaaq qinnuteqartup aqqa, najugaa inuttullu paasissutissat (qinnuteqartoq suliffeqarfiuppat S.E.nr., A.E.B.nr imaluunniit ingerlatseqatigiiffiup normua allanneqassaaq). Inuit arlariit inatsisilerituulluunniit arlariit ataatsimoorlutik qinnuteqarsinnaapput.
Qinnuteqaatip tunniunnerani nunap assinga ilanngullugu tunniunneqassaaq, nunaminertap annertussusaa sumilu inissisimaffissaa takuneqarsinnaaniassammat. Nunaminertami sanaartortoqassappat, imaqarniliatut siunnersuut (sanaartugassatut titartagaq) ilanngunneqassaaq pilersaarut ilullu saqqaa 1:100 uuttortaaneq atorlugu.
Qinnuteqaatip imarisaani immikkut ittumik piumasaqaateqartoqarsinnaavoq, taannalu nunaminertap atuutsinneqarsinnaaneranik imaluunniit tunngaviusumik pilersaarutaaneranik kommunip ussassaarutigineratigut pissarpoq.
Qinnuteqaatip ullulernissaa atsiornissaalu eqqaamajuk.
Links:
NunaGIS aqqutigalugu nunaminertamik qinnuteqarneq.
NunaGIS-qinnuteqaat pillugu ilitsersuut (PDF).