Suliniut WWF KANGIA KIDS 2017 pillugu tusagassiutinut nalunaarut

16. august 2017

Nunap pissarititaanik ussiiartorit 

Suliniut WWF KANGIA KIDS ukiut tamaasa pisartuuvoq, Verdensnaturfonden (WWF), Kangia pillugu allaffik Perorsaanermillu Ilinniarfiup (PI/SPS) suleqatigiinneratigut 2014-imi pilersinneqartoq. Suliniummi anguniagaavoq paaqqinnittarfiit meerartaasa avatangiisinut ilisimasaqalernissaat. Suliniut GrønlandsBankenimit aamma tapersersorneqarpoq.

Suliniummi WWF Kangia Kids-imi meeqqeriviit meerartaasa nunamiittarnerat ukiut siuliini isiginiarneqarsimasoq, ukioq manna isiginiarneqartut allanngorput. Ukioq manna PI/SPS-imi ilinniartut 90 ilinniakkanit assigiinngitsunit sisamaneersut Ilulissanilu meeqqerivinnit assigiinngitsunit sisamaneersut nunap pissarititaanik nerisassanik nittarsaassinissaq piareersassavaat. Meeqqat nerisassiornermi najoqqutassiaminnik nutaaliorlutik sassaalliissapput. Kikkulluunniit nerisassanik usseerusuttut tallimanngornermi 25. august nal. 10 – 11.30 Sermermiuni tikilluaqqusaapput. Alakkaasunut siullernut ilisarnaatitalinnik agguaassisoqarumaarpoq.

Suliniutip WWF Kangia Kids-ip ilinniartut meeqqanik 3 – 6-nut ukiulinnik nunami/silami perorsaanermik nalissaqanngitsumik misilittagaqalersissavai. Ilinniarnermi atuagarsornerup sulinerullu atassuserneqarsinnaanerat ilinniartitaanerup pitsaassusianut qaffassaataasarpoq, ilinniartullu suliniutip kingornatigut misilittakkatik sulinermikkut ineriartortissinnaallugit. Tamatumunnga peqatigitillugu meeqqeriviit meerartai sulisullu isumassarsiorfigisinnaasaminnik pissarsissapput kingorna malitseqartissinnaasaminnik, meeqqallu avatangiisit pillugit ilisimasaqaleriartornerat aallaavigineqarsinnaalluni.    

PI/SPS-imi Rektori Nuka Kleemann oqarpoq: Kalaallit Nunaanni pinngortitaq nerineqarsinnaasunik pissamaateqarfissuuvoq.

WWF Kangia Kids suliniutikkut PI/SPS ukioq manna ilinniartunut, perorsaasunut minnerunngitsumillu meeqqerivinnut Ilulissaniittunut nunatta pissarititaanik misileraanikkut isumassarsiortitserusuppoq.

Suliniut avatangiisit ilisimasaqarfigillualernissaannik oqariartuuteqarpoq, siunissami nunatta pissarititaanik nerisassatigut nuannaarutigisinnaasatsinnik. Pisiniarfinnut pisiniaraangatta nerisassat suminngaanneersuuneri eqqarsaatigineq ajorpagut, avatinnguatsinnili aamma nerineqarsinnaasunik peqartoq.

 

Perorsaanermik Ilinniarfik / Socialpædagogisk Seminarium
Postboks 519
3952 Ilulissat
Grønland