Qaasuitsup Kommuniata annaassiniartartutut upalungarsimasuutitai ulloq unnuarlu atorlugu Nassuttuumi ikuallanneq siammartinnaveersaarlugu ulappupput

Qaasuitsup Kommuniata annaassiniartutut upalungaarsimasuutitaasa Nassuttuumi ikuallanneq aallartimmalli ingerlaavartumik nakkutilliipput nalilersuisarlutillu. Ilulissaniit Qasigiannguaniillu qatserisartut ikuallattup siaruaatinnginnissaanik atortulersuutit atorlugit ullut unnuallut kingullit ikkussuillutik ikuallanneq siaruartinnaveersaarpaat.

- Ilulissani qatsisartut ikuallattumik qamisaanissap P3-mik ilisarnaatilerneqarnikup eqqaani ikuallanneq siammartinnaveersaarlugu tallimanngormalli sulipput. Aamma Qasigiannguani qatserisartut ikuallattut P1-mik aamma P2-mik ilisarnaatilerneqarnikut eqqaanni suliaqarput.

- Qatserisartut ittuata Joel Hansenip Nassuttuumit timmisartumit marlunngorpat qangattaruni ikuallattoq avannamut qanoq siaruarsimatiginersoq aammaarluni alapernaasissavaa (ikuallattumik qamisaanissap P6-mik, P7-mik aamma P8-mik ilisarnaatilerneqarnikut nalai). Ikuallattup qanoq avannamut siaruartigisimanera apeqqutaalluni kiisalu P1-p, P2-p, P3-p kiisalu P5-p eqqaanniitut qanoq isikkoqarneri apeqqutaallutik Joel Hansenip aamma qatsersiartut ittuata Bjarne Gregersenip suleriuseq allanngortinneqassanersoq aalajangissavaat; ikuallattoq avannamut siaruaassimanera aamma (qaqugu) P6-p, P7-p aamma P8-p nalaanni misiliilluni qamisaasoqassanersoq aalajangiiffigissavaat.

Yr.no-p Qeqertarsuup Tunuata annersaanut, Kangerlussuaq ilanngullugu, nalaani silap qanoq innissaanik eqqoriaanerminni sisamanngornerup missaanniit sapaat/ataasinngorneq ilanngullugu sialoqarnissaanik ilimasaaripput. Silaluk ataavartumik kuuttoq kuussagaluarpat ikuallanneq unikaallatsinneqassaaq pitsaanerpaamillu ikuallannerup siarunaakkunnaarneranik kinguneqarsinnaavoq; ingammik tatsit parnguttut kuuffigineqarlutik tasinngoqqissappata.

Upalungaarsimasuutitat alapernaallutik ikullattumik qulaavaanerminni umimmannik, tuttunik inunnillu takusaqanngillat. Taamaattumik uumasut, inuit illullu navianartorsiortinneqarsimassanngitsut upalungaarsimasuutitanit eqqoriarneqarpoq.

- Pinngortitaq panertupilussuuvoq, taamaattumik uumasut nunaminertanut isugutannerusunut naasoqarnerusunullu nerisassanik malillugit qangali illuareersimagatinneqarput. Ikuallanneq una qamisassallugu unammillernartorujussuussasoq paasereerparput. Kalaallit Nunaanni Namminersorlutik Oqartussat qamisaanermut atortunik ikiorsiisinnaanerannik noqqaavigereerpavut – noqqaasuterpulli itigartitsissutigineqarpoq.

Ikuallanneq qatsissumi aallartippoq, tamaanilu imeqannginnera peqqutaalluni qamisaruminaalluni. Qatserinermut imermik milluaassutinik taama qutitsigisumi atorneqarsinnaasunik annaassiniarnermut upalungaarsimasuutitat milluaassuteqanngillat. Taassuma saniatigut qulimiguullit pujorpallaarneranik peqquteqartumik nunamut missinnaasimanngillat.

- Annaassiniarnermik upalungaarsimasuutitat ikuallattumik uannga qamisaanissaminnut ”inorsarput”, ikuallattup qatsisartutta atortuttalu inunngisaannut qallinissaa utaqqisariaqarsimavarput – ingammik qatserinermut imermik milluaatit angallattakkat – uagut atortakkavut – tatsinut mangussinnaasagut kisiisa atortorigatsigik.

Annaassiniarnermik upalungaarsimasuutit taamaattumik ikuallattoq siaruartinnaveersaarniarlugu suliusissiorput ima: imermik milluaaffiusinnaasut, soorlu tatsinik imarmillu, atortunik milluaatitsilluni serparsaasarnissat annaassiniarnermillu upalungaarsimasuutitat atortui atorlugit qamisaalluni serpasaasoqartassalluni.