Qeqertaasami, Nassuttuumiittumi pinngortitap ikuallannera immap tungaanoorpoq

4. august 2017
Ikuallanneq siaruaateqqippoq pingasunngormat sisamanngormallu assut pujuliortumik. Anorili illuanut saammat Sisimiormiunut ajornartorsiutaajunnaarpoq ikumasorlu immap tungaanut sammiveqalerpoq.

Nassuttuumi ikuallanneq pillugu apeqqutissallit imaluunniit paasissutissaatillit inussiarnersumik qinnuvigineqarput Politiit qitiusumik pigaartoqarfiat attavigeqqullugu.

Politiit qitiusumik pigaartoqarfiat: Tlf. 70 14 48
Mail: grl-ilulissat@politi.dk 

Annassiniarnermut upalungaarsimatitat innersuutigaat tassanngaannaq annaassiniartoqarnissaanik pisariaqartitsisoqalersillugu taamaallaat 113-mut sianertoqaqqullugu. 
Qaasuitsup Kommuniata kommunemi annaassinniarnermut upalungaarsimatitat Ilulissanilu Politiit nersualaarusuppaat pisumut malinnaalluarneranni, kiisalu Air Greenlandimut, Qeqqata Annassiniarnermut Upalungaarsimatitaanut, Kalaallit Nunaanni Upalungaarsimatitanut, nunap immikkoortuani politiinut Namm. Oqartussat annassiniarnermut immikkoortoqarfianut suleqatigiilluarnermik pilersitsisimammata.

Air Greenlandip timmisartortartuisa ullut kingulliit Ilulissani Politiit ataavartumik assinik nassitsivigisarsimavaat Nassuttuumi Qeqertaasami ikuallattoqarfimmiit.

Aamma ippassaq unnukkut Qeqqata Kommuniani Upalungaarsimatitat pisortaat Ole Kreutzmann nunallu immikkoortuani aqutsisoq Johan Danielsen qulimiguulik S-61 atorlugu sumiiffimmik alapernaarsuisimapput.
- Taamaannerani ikuallanneq sanimut 4,5 km-rip sanimut siaruaassimavoq killormulli sammivia nalilersoruminaassimavoq pujorpallaarnera pissutaalluni. Ikuallattoqarfik qeqertaasaavoq qeqertaasap sisamararterutaata missaa ikuallalluni. Taamaasilluni suli sapaatit akunnerini arlaqartuni ikumasinnaalluni, nunavimmullu ataneratigut inneq siammarartarsinnaaneranut periarfissaqarluni.

Qaasuitsup Kommuniani Annaassiniarnermut Upalungaarsimatitap Kalaallit Nunaanni Annaassiniarnermut Ataatsimiittitaliaq qinnuvigisimavaa qamisaaniarnermut ikiorseqqulluni taamaasilluni nunavimmut innerup siammarsinnaanera annikillisarniarlugu. Ataatsimiittitaliaq ullumi nal.tallimanut ataatsimiissaaq.