Illorsuarni Nuugaatsiamilu saliinissaq avatangiisinillu isumannaallisaanissaq

3. august 2017
Qaasuitsup Kommunia ulluni qaninnerni Issittumi Sakkutooqarfimmit ikiorneqarluni Illorsuarni Nuugaatsiamilu avatangiisini suliniutinik saliinernillu suliaqassaaq.

17. juni 2017-imi Karrat Kangerluanni tassaarsuaqarnerata kingorna avatangiisini suliniutissat saliinissallu suut maannarpiaq salliutinneqartariaqarnersut Upalungaarsimanermut Aqutsisoqarfik Namminersorlutik Oqartussanit qinnuigineqarluni naliliivoq. Issittumi Sakkutooqarfik suliniutit ingerlanneqarnerini ikiuunnissamut neqerooruteqarpoq, suliassallu 5.-9. august 2017-imi ingerlanneqarsinnaanissaat naatsorsuutigineqarpoq. Qaasuitsup Kommunia Upalungaarsimanermut Aqutsisoqarfimmit tapersersorneqarluni nunaqarfinni suliassanik aqutsissaaq, kiisalu Issittumi Sakkutooqarfik suliat ingerlanneqarnerini isumannaallisaanermut akisussaasuussaaq.

Illorsuarni Nuugaatsiamilu sapinngisamik atortut avatangiisinut ulorianaatillit salinneqarnissaat illullu qajannaarneqarnissaat anguniagaavoq. Tamatumani inuit avatangiisillu isumannaatsuunissaat eqqarsaatigineqarpoq, nunaqarfiit ulluinnarni nakkutigineqanngimmata. Tamatuma saniatigut immami avatangiisit eqqarsaatigalugit ikummatissaasiviup, siusinnerusukkut Nuugaatsiap avannaani sumiissusersineqarsimasup qaqinneqarnissaa misilinneqassaaq.

Saliinermi avatangiisinillu isumannaallisaanermi aamma Nukissiorfinni, TELE Greenlandimi, KNI-mi, Royal Greenlandimi, Polar Oil-imi aamma Halibut Greenlandimi sulisut nunaqarfinni pineqartuni marluusuni atortuminnik isumannaallisaanissamut periarfissaqassapput.

Sumiiffimmi qaqqamit nutaanik sisoortoqarluni tassaarsuarmik aallartitsisoqaqqissinnaanera suli ulorianaateqarmat, kalaallit oqartussaasui juulip ulluisa sisamaanni naliliipput, Illorsuit aamma Nuugaatsiaq suli ulorianartorsiorfittut isigineqartariaqartut. Taamaattumillu innuttaasut Nuugaatsiamut Illorsuarnullu utertariaqanngitsut.

Taamaattumik Nuugaatsiaq aamma Illorsuit suli ulorianartorsiorfiummata, taamaattumillu inuit sumiiffimmiinnissaat inassutigineqanngimmat erseqqissassallugu pingaaruteqarpoq.