Sillimaniarneq pillugu innuttaasunut nalunaarut

20. juni 2017

Nuugaatsiami alianaqisumik nunap sisoornerata kinguneranik upalungaarsimaneq sillimaniarnerlu pillugit nalunaarut: 

Arfininngornermi 17. juni unnukkut tamatsinnut tupannaqisumik Nuugaatsiap eqqaani nunap sisoornerata kingunerisaanik,tamata pinngittoqarata tupatsitaasimavugut.

Ippassaq 19/6 unnukkut Qaasuitsup Kommuniani avannarlermi Borgmesterissaq Palle Jerimiassen, Naalakkersuisut siulittaasuat Kim Kielsen, Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq Erik Jensen, Politiillu ajunaarnermut upalungaarsimanissaq sillimaniarnissamullu suliaq killiffissiorlugu paasititsiniaapput.

Politiinit nalunaarutigineqarpoq, qaqqap sisooreernerata kingunerisaanik aamma alla qaqqaq sisooriaannaammat suli sillimaniarneq annertooq atuutinneqartoq.

Tamatumalu kingunerisaanik maannakkut sakkutuut umiarsuaaraat Nuugaatsiap eqqaani nakkutilliisussatut inissinneqarsimasoq taassumalu saniatigut aamma timmisartumik qaqqaq sisooriaannaq qulaavaallugu ataavartumik nakkutigineqartoq.

Upalungaarsimasuniit naatsorsuutigineqarpoq qaqqaq nakkaaqqissangaluarpat tassaarnera 45 min. tungaanut sivisussuseqarluni ilummut anngukkumaartoq taamaalilluni kalleriisoqarniariarpat innuttaasut qullarternissaminnut piffissaqarluartussaassallutik.

Ilanngullugu kaammattuutigineqarpoq innuttaasut maannamiit eqqissillutik inuunertik ingerlateqqiniaqqullugu.

Inussiarnersumik inuulluaqqusillunga

Palle Jerimiassen
Ikaarsaariarnermut ataatsimiititaliami siulittaasoq