Qimmit qimuttut siunissaat qulakkeerneqassaaq, suleqatigiinnissaq tamatumani piumasaqaataavoq

16. juni 2017

Kalaallit Nunaanni tamarmi akiuussutissanik pilersaarusiaq angisooq inatsit aqqutigalugu akuerineqarpoq.
Taanna iluatsissappat innutaasut, kommunit aamma Namminersorlutik Oqartussat imminnut ikioqatigiinnissartik pinngitsoorsinnaassanngilaat.
Namminersorlutik Oqartussat pilersaarusiornerminni illoqarfik Ilulissat aallartiffigissallugu toqqarpaat.
Ingerlatsinermut teknikimullu immikkoortortaqarfik pilersaarummut akisussaavoq.

Tunuliaqut:
Kalaallit Nunaanni qimmit perlerornermut qimmillu nappaataannut akiuussutissamik kapitinnissaat inatsimmi 1. Januar 2017-imiit piumasaqaataalerpoq. Ilutigalugu qimmit mikrochip-imik (paasutissiiveeqqamik) nammineq “qimmitut normussaminnik” ikkussivigineqartussaapput. Qimmit piginnittaasa aamma qimmit paasissutissartai qarasaasiamut toqqorsiviusumut katersorneqassapput, taamaalilluni siunissami qimmit qanga kingullermik akiuussutissamik kapissimanersut takuneqarsinnaalissaaq.
Akiuussutissanik kapuuinermut pilersaarut angisooq qimmiutilinnut akeqanngilaq. Paarlattuanik qimmiutilit kommunimut qimmiuteqarnertik pillugu paasissutissiisarnissaminnut pisussaaffilerneqassapput.
Qimmit, inerittut piaqqallu, ukiup siulliup iluani pingasoriarlutik akiuussutissamik kapitittassapput, tamatuma kingorna ukiut pingasukkaarlugit kapitittalissapput.

Illit qimmiutilittut qanoriliussavit:
Qimmit akiuussutissamik kapitinnissaat aamma mikrochippip piffissami eqqortumi ikkunneqartarnissaa illit akisussaaffigaat
Qimmit akiuussutissaannik kapuuisartoq illit attaveqarfigissavat qimmiutivillu akiuussutissamik mikrochippimillu qaqugu ikkussivineqarnissaa pillugu isumaqatigiissuteqarfigalugu
Qimmit akiuussutissaannik kapuuisartoq qimmiliviuterni najussavat ikiorlugulu
Qimmit tunisimassagukkit, tunniussisimassaguit, qimmiaraatitaarsimaguit/ qimmitaaruit imaluunniit qimmitit toqusimassappata ingerlatsinermut teknikkimullu immikkoortortaqarfik attaveqarfigissavat
Qimmivit ullut tamaasa isumassorluarnissaat soorunami illit aamma isumagisassavat – illit piginnittutut tamanna pisussaaffigaat aamma akisussaaffigaat

Qimminik nakkutilliisoq qanoq iliortassava:
Qimminik nakkutilliisoq Namminersorlutik Oqartussat uumasunik nakorsaannit ilinniartinneqareerpoq aamma sulisinnaanerminut allagartalerneqareepoq
Qimminik nakkutilliisoq imaluunniit uumasut nakorsaat KISERLUINNARMIK qimmit mikrochippimik ikkussivigisinnaavaat imaluunniit akiuussutissamik kapisinnaavaat – malittarisassaq taanna allanngortinneqarsinnaanngilluinnarpoq!
Qimminik nakkutilliisup illit oqaluttuutissavaatit qimmit qaqugu tulliani akiuussutissamik kapineqassanersut
Qimminik nakkutilliisup illit qimmitit pillugit paasissutissat qarasaasiaq atorlugu qimmit pillugit paasissutissiivimmut immiunneqarnissai isumagissavaa
Qimminik nakkutilliisoq uumasut illersorneqarnissaanik inatsimmik unioqqutitsisoqarsimasoq pasittakkuni oqartussanut paasissutissiissalluni pisussaatitaavoq

Kommuni qanoriliussava:
Malittarisassat malinneqarnissaat kommunip isumagissavaa. Qimmit tamakkerlutik mikrochippilerneqarnissaat akiuussutissamillu kapitinnissaat kommunip akisussaaffigaa.
Illit qimmiutilittut malittarisassanik malinnissanngikkuit – illit qimmitit mikrochippimik ikkussivigineqartariaqalissapput aamma pinngitsaaliissumik akiussutissamik kapitittariaqalissapput. Suleqataarusussanngikkaluaruit qimmitit pisariaqalissappat toqorarneqartariaqalissapput – toqorartinneri illit akilertussaassavat aamma taarsiivigitissanngilatit.
Akiuussutissanik kapuutit mikrochippillu kommunip pigineqarnissaat isumagisassaraa
Sulisut qimminik akiuussutissamik kapuuinissaminnut mikrochippilersuinissaminnullu ilinniarsimasut kommunip isumagisussaavai.
Qimminik nakkutilliisup Namminersorlutillu Oqartussat suleqatigineqarnerisa pitsaasuunissaat kommunip isumagisassaraa
Qimmit qimuttut sooq taama amerlatigisunik aningaasaliiffigineqassappat?
Qimmit qimuttut kulturilu uagut kalaallit tulluusimaarutigisarpagut
Uagut kulturikkut kingornussaraarput, taannali nappaatinit uagullu inooriaatsitta allanngornerinik, navianartorsiortitaavoq
Inuit uagut sinnerluta naalakkersuinermik suliaqartussatut toqqakkatta inatsit una; qimmit qimuttut illersorneqarnissaat anguniarlugu inatsit akuerinikuuaat
Kulturerput immikkuullarissoq pitsaanerpaamik illersorniarlugu ikioqatigiitta

Qimmiutilik, Sullissivimmut saaffiginnillutit akiuussutissamik kapisinissaq aamma mikrochippimik ikkussinissaq qaqugu pisinnaassanersut isumaqatigiissusioriartussasutut inussiarnersumik qinnuigissavatsigit.

 Ingerlatsinermut teknikkimullu ingerlatsivik sinnerlugu