Kommunip 2-p nutaamik atissaanut aamma ilisarnaatissaanut siunnersuutit pitsaanerpaat

7. juni 2017
Aasianni ulloq 03.06.2017-imi kommunip allaffiata ataatsimiittarfiani, inassuteqaateqartussatut ataatsimiittartoqatigiit ataatsimiinnerat.

Qaasuitsup Kommunia unammisitsinermik ingerlatsinikuuvoq, tassani kommuninngortussap ilisarnaatissaa qanoq isikkoqassanersoq kiisalu ateq suna kommunimut tulluuttuussanersoq pillugit inuit isummaminnik saqqummiussisinnaanikuullutik.
Unammisitsineq 1. maj 2017-imi naammat, Kommune 2-mut katillugit ilisarnaatissatut siunnersuutit 78-it kiisalu atermut siunnersuutit 72-it tiguneqarsimapput.

Ilisarnaatissamut aamma Qaasuitsup Kommuniata kujalliup atissaanut siunnersuutit taakku tamakkerlutik ilaannik toqqaanissaq inassuteqaateqartussatut ataatsimiittartoqatigiit siunertaraat.

Ilisarnaatissamut kiisalu kommunip atissaanut siunnersuutit, inassuteqaateqartussatut ataatsimiittartoqatigiinni ilaasortaasut utoqqaanersaanni Karl Jeremiassen-imit Ane Hansen-imut, kommuninngortussami kujallermi borgmester-inngortussamut, tunniunneqarput.

Inassuteqaateqartussatut ataatsimiittartoqatigiinni ilaasortat:
Kangaatsiaq Thomas Hendriksen
Qeqertarsuaq Jens Karl Broberg
Qasigiannguit Mads Grønvold
Aasiaat Karl Jeremiassen
Aasiaat Angutinnguaq Olsen

Inassuteqaateqartussatut ataatsimiittartoqatigiinnit siunnersuutit, matuma kingorna kommuninngortussami kujallermi Ikaarsaariarnermut ataatsimiititaliamit inaarutaasumik aalajangiiffigineqassapput.
Saamerlermiit; Thomas Hendriksen, Angutinnguaq Olsen, Karl Jeremiassen, Mads Grønvold, Ane Hansen, Jens Karl Broberg.