Tusagassiorfinnut nalunaarut 

Qaasuitsup
Kommunia meeqqat inuusuttullu pillugit qitiusumik nalunaartarfimmik
pilersitsivoq 
16. februar 2016

Meeqqat inuusuttullu pillugit nalunaarnernut tunngatillugu sulisut tapersersorumallugit pinasuartumillu qisuariartoqartarnissaa angujumallugu, qitiusumik nalunaartarfimmik Qaasuitsup Kommunia pilersitsivoq.

Nalunaaruteqarneq – Nipaanneq atorunnaaruk qulequtsiullugu, meeraq inuusuttorlu atornerlunneqarnermik aamma atugarlunnermik eqqugaasimatillugu nalunaaruteqartarnissap pingaaruteqarneranik sulisut innuttaasullu tamakkerlutik ilisimatinneqarput.

Nalunaaruteqarneq kinaassutsimik isertuussilluni pisinnaavoq taannalu ataatsimoorussamik kommunip mail-eritaanut nassiunneqartartussaavoq, matumani sulisut sisamat qitiusoqarfittut allaffimmi nalunaarsuisassapput malitseqartitsisarnissamillu qulakkeerinnissallutik.

Annertunerusumik iliuuseqarnissaq kiisalu sulisunut tapersersuillunilu ilitsersuinissaq annertooq pisariaqartinneqarmat nassuerutigivarput. Kommunimi sumiiffiit ilaanni arlaqartuni, sulisut suliassaminnik ingerlatsiniarnerminni atugassatigut ajornartorsiuteqarput taamaattumik periutsinik allannguineq aamma sulisunik tapersersuisarneq ilinniagaannillu qaffassaaneq aqqutigalugit iliuuseqartoqartariaqarpoq.

Nalunaaruteqarnermut atatillugu kommunip piumasaqaataa tassaavoq, nalunaarummik tigusaqarnerup kingorna akunnerit 24-it qaanngiutsinnagit misissuineq ingerlanneqarlunilu iliuuseqartoqassasoq.

Inunnik isumaginninnermut pisortap Henrik Sóloy-ip ilisimatitsissutigaa, 2016-imi meeqqanut inuusuttunullu tunngasutigut iliuuseqartarnerup ineriartortinnissaa pitsanngorsarnissaalu naalakkersuinikkut suliaqartunit allaffissornikkullu ingerlatsisunit eqqumaffigineqartoq, aningaasat sulisullu amerlanerusut atugassiissutaasimallutik.

Qaasuitsup Kommuniani meeqqanut inuusuttullu tunngassuteqartuni suliniutissat arlalissuit 2016-imi aallartinneqartussat taanna ilagaat. Aallaaviusorlu tassaavoq inuiaqatigiittut ataatsimoortumik kivitsinissaq kiisalu ilinniakkatigut qaffassaanissap pisariaqartinneqarneranik nassuerutiginninneq. Meeqqat pisinnaatitaaffiisa qularnaarnissaannut kommunip sulisullu pikkorinnerulernissaat anguniarlugu ikiuuttussanut avataaniit sullissisunut arlalinnik isumaqatigiissuteqartoqarpoq.

Qaammammi marts-imi peqatigiiffik Grønlandske Børn suleqatigalugu suliaqaatigaluni pikkorissarneq annertooq ingerlanneqassaaq.

Paasissutissat annertunerusut inunnik isumaginninnermut pisortamut saaffiginninnikkut pissarsiarineqarsinnaapput

Henrik Sóloy
Inunnik isumaginninnermut pisortaq

 

Uani Takuuk