Meeqqat atugarisaat pimoorullugit pingaartippavut

Tallimanngormat 6. november Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen-ip Qaasuitsup Kommuniani Borgmesteri Ole Dorph ataatsimeeqatigivaa. Ataatsimeeqatigiinnerup tunngavigaa MIO-p ukiup massuma aallartisimalernerani Meeqqat Illersuisuata Upernavik Uummannallu nunaqarfiinut angalasimaneranut nalunaarusiaq.
9. november 2015

Ataatsimiinnermi Qaasuitsup Kommuniani meeqqat inuusuttullu atugarisaat eqqartorneqarput. Ataatsimiinneq suliassanut imaannaanngitsunut, ataatsimoorussamik suleqatigiiffiusumillu iliuseqartoqarnissaanik isumaqatigiiffiusumik naammassineqarpoq. Isumaqatigiissutigineqarpoq kommuunip suliassaqarfinnut tapersersorneqarnissaminnut pisariaqartitai aallaavigalugit Ilaqutariinnermut, Naligiissitaanermut Isumaginninnermullu Naalakkersuisoqarfik ikiuutissasoq. Suleqatigiinneq maannangaaq aallartinneqassaaq, ukiullu tullissaani 2016-mi ingerlaannassalluni, ikioqatigiiffiusumik MIO-p nalunaarusiaani isumaginninnikkut suliassaqarfiit eqqartorneqartut iliuuseqarfigineqassallutik. Iliuusissat ilaatigut kommuunip nunaqarfiinut tamanut angalaqatigiinnerit pineqarput.

Borgmester Ole Dorph ataatsimiinnerup kingorna oqaaseqarpoq ”Qaasuitsup Kommuniani meeqqat inuusuttullu atugarissaarnissaat pingaarteqaagut. Sulisugut piumassuseqarluartuupput, suliassanullu imaannaanngitsunut annertuumik suliaqarlutik, taamaattorli nassuerutigisariaqarpoq kommuunitta isorartunerujussuata inoqarfiillu avinngarusimaqisut pissutigalugit suliassaq annertuumik unamminartuutimmagu”.

Naalakkersuisoq Martha Lund Olsen borgmesterip oqaaseqarneranut isumaqataanini ersersippaa imalu oqaaseqarluni: ”Nuannaarutigaara suliassaqarfiit meeqqanut inuusuttunullu tunngasut maannangaaq 2015-imiit suleqatigiissutigisinnaagatsigit. Suleqatigiinneq ajunngilluinnartumik isumaginninnerup iluani aallarteriikkatta saniatigut tapertaassaaq. Uani aallartereersimasavut pillugit aalajangersimasumik taaneqarsinnaapput Qitiusumik Siunnersuisarfik sapaatip akunnerata matuma siuliani pisortatigoortumik ammaanersiorneqartoq. Isumaginninnermi sullissisunut ilinniarfissat ilinniaqqiffissallu nutaat, isumaginninnikkut periutsimik aalajangersimasumik ’ilaqutariinni aqqutissioqatigiinneq’ aamma ‘immikkut ilisimasallit suleqatigiissitaliaat’; kiisalu isumaginninnermut tunngasunik nakkutilliineq.

Annertunerusumik paasisaqarusukkussi Naalakkersuisoq Martha Lund Olsen attavigineqarsinnaavoq Naalakkersuisup allattaa Sina Møller Kristiansen aqqutigalugu mail-ikkut: nimk@nanoq.gl aamma imaluunniit Borgmester Ole Dorph, Kommunaldirektør Hans Eriksen aqqutigalugu mailikkut: hae@qaasuitsup.gl