INUUSUIT KIVITSISUSSAT: Arctic Winter Games 2016

6. november 2015
’Inuusuit kivitsisussat’ sunaava
’Inuusuit kivitsisussat’ inuusuttunut AWG2016-imi kajumissutsiminnik suleqataarusuttunut aaqqissuulluakkamik pikkorissarnissamik neqeroorpoq. Siunertarineqarpoq pikkorissarnerit aamma misilittakkat aqqutigalugit aqutsinissamik piginnaasanillu ineriartortitsinissaq, assersuutigalugu ilinniartitaanerup iluani aamma siunissami inuussutissarsiutigalugu suliffigilerumaagassat eqqarsaatigalugit. Inuiaqatigiinni nutaaliaasuni unammilligassat anigoruminaassinnaasut qaangerniarnissaannut inuusuttut imminnut tatiginerulernissaannut ’Inuusuit kivitsisussat’ peqataassaaq. Aammattaaq inuusuttut ilinniassavaat suliniut/aaqqissuussaq iluatsilluartumik naammassiniarlugu akisussaaffeqarneq qanoq pingaaruteqartiginersoq. Inuusuttut ’Inuusuit kivitsisussat’-nik naammassinnittut inuusuttunut allanut maligassiuisunngussapput, kajumissutsimik sulineq aamma inuiaqatigiinni akuuneq eqqarsaatigalugit.

Tunuliaqutaq
AWG2016-i Northwest Territoriesip (NWT) inuusuttunut sinniisunik suliniutaanit isumassarsisitinneqarpoq. Suliniut pitsaasunik kinguneqarsimavoq, NWT-imilu inuiaqatigiit ikitsunnguit akornanni inuusuttut akornanni maligassiuisunik pilersitsiviulluni.

Siunertarineqarpoq AWG2016-imi misileraammik suliaqartoqassasoq, ’Inuusuit kivitsisussat’-nik pilersitsiviusumik. Suliaq sulianik aqutsinermik, sullissinermik, kajumissutsimik suliaqarnermik aamma issittumi kulturimik samminniffiussaaq. Inuusuttut ilinniaqqinnissaminni sulinissaminnilu, aammalu kajumissutsiminnik sulinissaminni atorsinnaasaannik tuniorarnissaat anguniagaavoq.

Arctic Winter Gamesip 2016-imi marsimi Nuummi ingerlanneqarnerani kajumissutsimik suleqataanikkut inuusuttut aqutsinermik piginnaasaminnik ineriartortitsissapput, peqatigitillugulu pingaarutilimmik misilittagaqalerlutillu inuusuttunik inersimasunillu Kalaallit Nunaanni tamaneersunik, aamma issittumi nunanit allaneersunik attaveqarfeqalissallutik. Inuusuttut, AWG2016-imi kajumissutsiminnik suleqataanissartik sioqqullugu, piginnaasassaminnik aamma ilisimasassaminnik pisariaqartinneqartunik pikkorissartinneqarnissaat qulakkeerniarparput.

Anguniagaq
Misileraalluni suliaq - AWG2016: Inuusuttut toqqakkat Kalaallit Nunaanneersut aqutsinissamik piginnaasaqalernissaannik, misilittagaqalernissaannik aamma AWG2016-imut atatillugu kajumissutsiminnik suleqataanermikkut aggerfimmik peqataatitaqarnissaannik periarfississallugit.

’Inuusuit kivitsisussat’-ni peqataasut makuninnga ilinniartissallugit:
• Kajumissutsimik sulineq aamma sullissineq
• Suliniutinik suliaqarneq
• Inuussutissarsiorneq
• Arctic Winter Games 2016-i
• Issittumi kultuuri
• Tusagassiuutinik ilisimasaqarneq

Inuusuttut: AWG2016-imi kajumissutsiminnik suleqataanermikkut Kalaallit Nunaat sinniisuuffigissallugu, taamaaliornikkullu AWG2016-ip iluatsilluartumik ingerlanneqarnissaanut peqataallutik. Aqutsinissamik piginnaasat ineriartortissallugit, peqatigitillugulu sulinermik pingaarutilimmik misilittagaqalerlutik, aamma inuusuttunik allanik Kalaallit Nunaanni tamaneersunik kiisalu Issittumeersunik attaveqarfeqalissallutik. Misileraalluni suliap ingerlaqqinnissaa neriuutigalugu.

Pikkorissartitassatut siunnerfiit
Inuusuttut 30-t, 18-iniit 24-nut ukiullit Kalaallit Nunaanni sumiiffinnit assigiinngitsuninngaanneersut. 20-t Nuumminngaanniissapput, qulillu Kalaallit Nunaanni sumiiffinnit assigiinngitsuninngaanniissallutik.

Peqataanissamut tunngavissat
Toqqaanissami tulliuttumi taaneqartut tunngavigineqassapput:
• Peqataasut 18-it 24-llu akornanni ukioqassasut
• Peqataasut Kalaallit Nunaanni sumiiffinnit assigiinngitsuninngaanniissasut. Minnerpaamik kommunenit tamanit peqataasoq ataaseq
• Peqataasut piffissami 29. februaari – 12. marsi 2016 Nuummiissinnaassasut, taamaalillutik pikkorissartitsinermut aamma AWG2016-imi kajumissutsiminnik suleqataanissamut peqataasinnaassallutik
• Peqataasut peqataanissaminnut tunniusimallutillu piumassuseqarluassasut
• Toqqaanissamut tunngavigineqartut aallaavigalugit qinnuteqaatit ataasiakkaarlugit nalilersorneqassapput

Qinnuteqarnissamut piumasaqaatit
1. Qinnuteqaammut immersugassagassaq immersorlugu, imminut tunngasunik, soqutigisanik, kajumissutsimik sulinermi misilittakkanik, sumiiffimmi akuunermik, maannakkut ilinniakkamik imaluunniit suliamik pingaarnersiuilluni allaaserisamik, ilanngussaq a
2. Oqaaseqaatinut immersugassaq immersugaq (ilinniartitsisumit, sungiusaasumit imaluunniit inersimasumit allamit ilaqutarinngisamit), ilanngussaq b. (Qinnuteqarfissatut killiuliussap qaangiunnerani peqataasussatut toqqarneqartunut tunngatillugu meeqqanik pinerliisimannginnermut aamma pinerluuteqarsimannginnermut uippernaarsaat pissariniarneqassaaq)

’Inuusuit kivitsisussat’ suut naatsorsuutigisinnaavaat
• AWG2016-ip marsip arfernganiit aqqarngata tungaanut ingerlanneqarnerani inuusuttut sulinissaat naatsorsuutigineqarpoq
• Inuusuttut ’Inuusuit kivitsisussat’ naammassigunikku aamma AWG2016-imi kajumissutsiminnik suleqataareerunik uppernarsaammik tunineqassapput
• AWG2016-imi kajumissutsiminnik suleqataanerminni ’Inuusuit kivitsisussat’ kavaajamik aaqanngitsumillu tunineqassapput, kajumissutsiminnik sulinerminni atugassaminnik
• Suliap ingerlanneqarnerani AWG2016-i nerisaqartitsissaaq
• Inuusuttunut Nuup avataaneersunut angallanneqarnissaq, aamma suliap ingerlanneqarnerata nalaani najugaqarnissaq isumagineqassaaq
• Peqataasut ullormusiaqartitaanatilluunniit sulinissaraluaminnit annaasaqaatiminnik tunineqassanngillat
• Inuusuttut pikkorissartitsinermik naammassinninngitsut, imaluunniit ileqqorissaarnissamik eqqortitsinngitsut suliamit peqataajunnaarsinneqassapput