Maani ikuallattoornissamut sillimanianermi pissutsit ajoquteqanngillat!

Meeqqanut paaqqinnittarfimmiittunut angajoqqaajugaanni, pisiniarfinni annerusuni pisiniartartuugaanni, imaluunniit inunnit amerlasuunit katersuuffiusartuni akunnittarfinniluunniit atuisuugaanni toqqissinartarpoq ikuallattoornissamut sillimaniarnermi pissutsit ajoquteqanngitsut paasissallugu, tamatumani ilanngullugu qimaaffissiat, qatserutit ajornartoornermilu qaammaqqutissat ajoquteqanngitsut aammalu piffimmi sulisut ilaatigut ikuallannaveersaartitsinissamut, qimarngussuinissamut kalerrisaarinissamullu ilitsersorneqarsimasut paasinarsigaangat.
4. november 2015

Atuarfiit, meeqqeriviit, paaqqutarinnittarfiit, pisiniarfiit anginerusut, illorsuit ataatsimoorfiusinnaasut, unnuisarfiit, timersortarfiit, vandrehjem-it kiisalu utaqqiisaasumik unnuiffiusinnaasutut akuerineqartartut assigisaallu inunnit amerlasuunit katersuuffiusartut ikuallattoornissamut sillimaniarluni misissuinissamut piumasaqaatinut ilaatinneqarput.

Ikuallattoornissamut sillimaniarluni misissuineq kommunip annaassiniartartutut upalungaarsimasuinit ingerlanneqartarpoq, misissuinermilu qulakkeerneqartarluni sanaartukkat pineqartut atuuffissaannut atatillugu sillimaniarnikkut ikuallatsaaliuinissamullu piumasaqaatit malitsinneqarnersut.

Qaasuitsup Kommuniata Annaassiniartartutut Upalungaarsimasuinit 2015-ip ukiaaniit sulliviit suliffeqarfiillu ikuallattoornissamut sillimaniarnermut atatillugu misissuiffigereeraangagit ”Smiley” (kiinaq qungujulasoq) naliliinermi tunniutissallugu neqeroorfigisalerniarpai ikuallattoornissamut sillimaniarnermut atatillugu piumasaqaatit qanoq malitsinneraat isaarissap qanitaanut nivinngartakkamik, taamaalilluni innuttaasut pineqartumut isernerminni takusinnaaniassammassuk iserifigisaminni ikuallattoornissamut sillimaniarneq annaassiniartartutut upalungaarsimasunit naammaginartumik nalilerneqarsimanersoq.

Sullivimmut/suliffeqarfimmut piumasaqaataanngilaq misissuiffigineqarnerup naliliiffigineqarneranut ilisarnaat isaarissamut nivinngarneqassanersoq, misissuiffigineqarnermili naammaginartumik piumasaqaatinut malittitsigaluartut naliliivigineqarnermut takussutissamik nivingatitsinngippata isumaqanngilaq ikuallattoornissamut sillimaniarnermi piumasaqaatit naammaginartumik malitsinneqarsimannginnerannik.