Meeqqat atugaat Qaasuitsup Kommuniani salliutinneqassapput

Qaasuitsup Kommuniata kommunalbestyrelsea aamma Meeqqat Illersuisuat Aviâja Egede Lynge ulloq 23. oktober 2015 Nunatsinni kommunet avannarpasinnersaani meeqqanut atugassarititaasut pillugit ataatsimeeqatigiipput.
27. oktober 2015

Tamanna pivoq, Meeqqat Illersuisuata aggustimi Qaasuitsup Kommuniani illoqarfinnut marlunnut nunaqarfinnullu 16-inut tikeraareernerata kingorna malitseqartitsinikkut. Aviâja Egede Lyngep angalanermi takusat pillugit kommunalbestyrelsi kiisalu Naalagaaffiit Peqatigiit Meeqqat Pisinnaatitaaffii pillugit Isumaqatigiissutaa tunngavigalugu isernartorsiuinini tunngavilersorpaa: ”Nunatsinni meerartatta atugaat piviusut qanorlu pilersarnersut sinerissamukarluni angalasarnissaq pingaaruteqartpoq. Nunarput angisoorujussuuvoq, naallu innuttaasut ikittunnguugaluarluta nunarujussuarmi immikkoortunut siassimavugut ima kinguneqartitsisumik – ulluinnarni sulinitsinni qanoq ulapitsigigaluaruttaluunniit – ilaatigut meeqqat alliartorfiannut tikeraartassallugit, taamaasilluta nammineerluta isitsinnik silatsinnillu takullugillu, tusaallugillu paasisinnaaniassagatsigit, nunarsuarmi kommunit avannarlersaani meeraq qanoq ittuunersoq.

Tamanna tunngavigalugu kommunalbestyrelse pitsaasumik siunertaqarluartumillu ataatsimeeqatigaarput nuannaarutigaaralu, kommunalbestyrelsip aalajangersimammagu, meeqqanut tunngasut 2016-imi annertunerusumik salliutinneqarnissaat.

Taassuma saniatigut assut pitsaavoq, kommuni meeqqanut inuusuttunullu politikkeqalersimammat,
Meeqqat illersuisuat Aviâja Egede Lynge oqarpoq.

Qaasuitsup Kommuniata kommunalbestyrelseata ataatsimeeqatigiinnermi Meeqqat Illersuisuata isornartorsiutaanik itisiliiffigineqarnissaminut periarfissaqarpoq sulinerlu politikkikkut allaffissornikkullu paasissutissat tunniunneqartut toqqammavigalugit aaqqiissutissanik pilersaarusiornissanut periarfissiivoq.

Ataatsimiinnermi aamma meeqqat sumiginniarneqartarnerat inuiaqatigiinni ajornartorsiutitut ataatsimut angajoqqaat, kommunit aamma Namminersorlutik Oqartussat kivitseqatigiissutigisassaat eqqartorneqarpoq: ”Meeqqat sumiginnarneqartarnerannik ajornartorsiut angisoorujussuummat ajornartorsiutip iliuuseqarfiginissaanut pisortani sulisinnaasut tamarmik iliuuseqarnikkut nukittorsaaqataanissaat pisariaqarpoq”,  Borgmester Ole Dorph oqarpoq.

Qaasuitsup Kommuniata aamma Meeqqat Illersuisuata suleqatigiinnertik aallarnerlugu meeqqat atugaat pillugit Inunnik Isumaginninnermut Ataatsimiititaliami siulittaasoq Kristian Jeremiassen aamma inunnik isumaginninnermut pisorta Henrik Sóloy ulloq 2. november 2015 ataatsimeeqatigissavaat.

Asseq: Saamerlermiit: Qaasuitsup Kommuniata pisortaa, Hans Eriksen, Meeqqat Illersuisuat Aviâja Egede Lynge, MIO-p allattoqarfiani pisortaq, Trine Nørby Olesen & Ole Dorph, Borgmesteri.