Titartaasartut Ilulissanut Kangerlummullu takuniaalersut

Ilulissat eqqaani Kangerluk pillugu Ilisimasaqarfissap nutaap qanoq isikkoqarnissaannik saqqummiussisussat Titartaasartoqatigiit arfinillit illoqarfik sapaatip akunnerata 43-p ingerlaneranni tikeraassavaat tamarmillu immikkut saqqummiussaqassallutik. Sumiiffiup qanoq ittuussusaa titartaasartunit paasiniarneqassaaq kiisalu kalaallit nunaanni pinngortitaq kulturilu ”imminerminnut isertissallugu”.
5. oktober 2015

Tassa kangerluup eqqaani kiisalu Ilulissat eqqaanni sumiiffimmi UNESCO-mit illersugaasumit illorsuaq immikkorluinnaq ittoq ilusinikkiartussaaq. Taamaattumik pingaaruteqarluinnarpoq titartaasartut aasap tulliani titartaanissaminni illorsuup inissiffissaata immikkorluinnaq ittup ilisimaarissagaat.

Sapaatip akunnera 43 titartaasartut Ilulissanut tikeraassapput sanaartorfissaq takuniarlugu, pinngortitaq misigisassarsiorfigalugu kiisalu suliassamut tunngasunik annertunerusumik paasiniaallutik. Sumiffik takuniassavaat najukkap qanoq ittuussusaa, kulturia kiisalu oqaluttuassartaa pillugu paasissutissanik pissarsiussallutik. Anguniagaavoq sumiffiiup qanoq ittuussusaa ”imminerminnut isertissagaat”, taamaalillutik silarsuarmi asseqqanngilluinnartumi illorsuup asseqanngilluinnartup ilusissaata qanoq ittuunissaamik saqqummiussiniassagamik.

Ilisimasaqarfissaq qulimiguulinnut mittarfikumi kiisalu UNESCO-mit illersugaasumit nunaminertami inissisimassaaq. Illorsuaq inissisimaffissaq asseqanngilluinnartoq immikkorluinnarlu ittoq ataqqilluinnarlugu napparneqassaq. Tassa illorsuaq Ilulisani avatangiisinut immikkorluinnaq ittunut tulluarsarlugu napparneqassaaq.


Assiliisoq: Jens V. Nielsen

2016-ip aasaanerani pilersaarut inaarutaaasoq toqqarneqassaaq saqqummiunneqarlunilu. Tamatuma kingorna sanaartorneq aallartinneqassaaq naatsorsuutigineqarporlu 2019-ip ukiaanerani naammassineqassasoq. Tamatumunnga ilutigitillugu ilisimasaqarfimmi sulineq, ilaatigut saqqummersitsinernik, ataatsimiittarfinnik kiisalu atortorissaarutinik allanik suliaqarneq ingerlanneqassaaq.

Kangerluk pillugu Ilisimasaqarfik Qaasuitsup Kommuniata, Kalaallit Nunaanni Namminersorlutik Oqartussat kiisalu Realdania-p suleqatiiinnerisigut napparneqassaaq.

Kangerluk pillugu Ilisimasaqarfissamut titartaasartut unammeqataasussat

  • Arkís, Island
  • Dorte Mandrup Arkitekter/Avannaa/Kristine Jensen, Danmark/Grønland
  • Kengo Kuma and Associates, Japan
  • Rintala Eggertsson Architects, Norge
  • Snøhetta, Norge
  • Studio Other Spaces v. Olafur Eliasson aamma Sebastian Behmann, Tyskland