Ikamiuni sanaartornermi atortussat tuniniarneqarput

Matumuunga Qaasuitsup Kommuniata illorput 2000 iluseq 3-mut, tamarmik immikkut 80m2-imik angissuseqartunut atortussat, tamanut saqqummiussinikkut tuniniarpai, ulloq 20. oktobari 2015 tiguneqarsinnaanngorlugit.
14. september 2015
Toqqavissat sananeqareernikuummata Ikamiuni illut inaarlugit sananeqarsinnaanerat siunertaralugu sanaartornermi atortussat pingaarnertut tuniniarneqarput. Atortussat allanut atorneqarsinnaapput taamaakkaluartoq Ikamiuni atorneqartariaqarput.

Atortussat normunut pingasunut assigiinngitsunut agguataarneqarsimapput, taamaalilluni atortussat sananeqaatimikkut tamarmik assigiinnik sapinngisamik peqartinneqartussaallutik.

Atortussat illu 1-imut, illu 2-mut aamma illu 3-mut agguataagaapput. Ataaseq imaluunniit amerlanerit pisiariniarlugit neqeroortoqarsinnaavoq.

Atortussat taama isikkoqartillugit aamma tunisisimut tamakkiisuusumik akisussaaffilerneqartinnagit tunineqassapput. Soqutiginnittut namminneerlutik siunnersortigisinnaasaminnik pissarsinissaat kaammattutigineqassaaq.

Tunisinermi aningaasartuutaasut tamakkerlutik pisisumit isumagineqassapput.

Neqeroorut allaganngugaq pisinissami aningaasat tigoriaannanngorlugit danskit kr.-inngorlugit nalunaarneqassapput, taamatuttaaq ateq, najugarisaq aamma oqarasuaatip normua/mail ilanngunneqassapput, nassiunneqassallunilu: Qaasuitsup Kommunia, sanaartornermut avatangiisinullu ingerlatsivik, postboks 1023, 3952 Ilulissat, allakkat puussaannut ilisarnaasigaanngitsumut ikineqarsimassallutik, allanneqarsimassaarlu Illorput 2000 iluseq 3 Ikamiuniittoq ataaseq amerlanerilluunniit pisiarinissaannut neqeroorutaasoq, kingusinnerpaamik tallimanngornermi ulloq 2. oktober 2015, nal. 10.00.

Neqeroorut pituttuisuussaaq piumasaqaatitaqarnanilu kiisalu immikkut ittumik nangaanertaqarani.

Pisinermi akiliutigitinneqartussap akilerneqarnissaanut toqqorsisoqassaaq imaluunniit qularnaveeqqusiisoqassaaq kingusinnerpaammik tunisisup akuersinerata kingorna ullut tallimassaanni.

Qaasuitsup Kommunia pisinnaatippoq neqeroorutit tiguneqartut tamakkerlugit itigartinnissaannut.

Atortussat akisunerpaamik pisiarinnikkumasumut tunineqassapput.