Avannaata kommuniani qullersaqarfimmi pisortaq

Kommuni nutaaq, Avannaata Kommunia 1. januar 2018-imi pilersinneqartussaasoq qullersaqarfimmini pisortaanissarsiorpoq, taassumalu kommunimi nutaami aaqqissuussaaneq Avannaata Kommunianiittoq ilusilersuiffigeqataaffigisussaavaa. Atorfik pineqartoq 1. oktober 2017-imi imaluunniit isumaqatigiissuteqarnikkut inuttalerusunneqarpoq.
Qinnuteqarfissaq:
6. august 2017
Sumi:
Ilulissat
Akissarsiat:
Isumaqatigiissut malillugu

Avannaata kommuniani qullersaqarfimmut pisortaanissarsiorneq 

Avannaata Kommuniani qullersaqarfimmi pisortaanertut atorfik nutaaq pissaganartorlu takornariaqarnikkut aalisartoqarnikkullu ulapaarfiusartumi Ilulissani inissisimaveqassaaq, illoqarfimmi ineriartorfiulluartumi, aammattaaq tassaniissaaq kommunimi allaffissornikkut qullersaqarfik. Kommuni nutaaq illoqarfeqassaaq; Qaanaaq, Upernavik, Uummannaq kiisalu Ilulissat taakkualu nunaqarfii.

Avannaata Kommunia 520.300 km2-inik isorartussuseqassaaq innuttaasut amerlassusiat katillugit 10.733-it missaannissalluni, illoqarfinnut sisamanut nunaqarfinnullu 23-inut agguataarneqarsimasunik. 

Qullersaqarfimmi pisortaanerup nutaap politikkikkut ingerlatsiviusumi pingaanertut suliassarissavai: 

  • Borgmesterimut, aningaasaqarnermut ataatsimiititaliami kiisalu kommunalbestyrelsimi aalajangigassanut tunngassuteqartunut siunnersuineq aqqutissiuinerlu.
  • Sulisamut tunngassuteqartut kiisalu aalajangiivigisassatut saqqummiussat pitsaalluinnartuunissaasa qularnaarneqarneri
  • Politikkimut allaffissornermullu tunngassutillit eqqummaariffigalugit kiisalu suliassanut tunngassutillit tulleriiaarneqarnissaannut tunngavissanik qularnaarinninneq.
  • Suliassanut tunngaassuteqartut kiisalu ajornartorsiutaasut erseqqissumik paasiuminartumillu saqqummiuttarlugit
  • Periarfissanik allanik ujartuinermi kingunerisinnaasat nassuiarneri, kiisalu politikkimi aalajangiisartut partiimut sumut atasuuneri eqqarsaatiginagit erseqqissunik tunngavilersukkanillu aaqqiissutissanik siunnersuusiorneq
  • Aningaasanut missingersuutinut tunngassutillit akisussaassuseqarluartumik suliarine-qarsimanissaasa qulakkeerneqarneri kiisalu aalajangiussat aningaasatigut kingunerisassaasa pitsaasumik suliarineqarsimanissaasa qulakkeerneri.
  • Innuttaasut kommunimi kiisalu Avannaata kommuniani inuussutissarsiutinik ingerlatsisut kiffartuunneqarnerisa ukkataralugu ineriartortitsiviusumik sullinne-qarnerisa qularnaarneqarnissaa.
  • Avannaata kommuniata nutaap ineriartortinneqarnerani tinnersaasutut kiisalu aallarnisaasutut  suliaqarnissaq

Qullersaqarfimmi pisortaaneq borgmesterimut qaninnerpaatut siunnersortitut atuunnerani naatsorsuutigisat: 

  • Borgmesterip allaffeqarfiata attuumassuteqarfiinut tamanut suugaluartunulluunniit suliaqarnikkut aaqqiiniaqataasartunut qanimut suleqataanissaq.
  • Innuttaasut, inuussutissarsiutinik ingerlatalinnut kiisalu suleqatinut allanut kommunip avataaneersut pineqartillugit borgmesterimut siunnersortitut atorneq.

Tamatuma saniatigut qullersaqarfimmi pisortaaneq nutaaq qullersanut ilaalluni sulissaaq, aalajangiisinnaassusilinnut kiisalu iliuuseqarsinnaassusilinnut akuulluni, avammut suliffiullu iluani malugineqarsinnaasumik suliaqartoq, tamatumani suliassat ataatsimoortut tassaallutik, politikkikkut siunnerfiit naapertorlugit politikkissanik periusissianillu suliaqartassalluni, politikkikkut aalajangikkat tigussaasumik sulissutigineqarneri qulannaassallugit, allaffissornermi siunnerfiliussat suleriutsillu inerisarlugillu atuuttussanngortissallugit, teknikimut tunngassuteqartut pillugit ilisimasat tamanit iserfigineqarsinnaanerisa qularnaarnissaat, innuttaasunit, inuussutissarsiutinik ingerlatalinnik kiisalu suleqataasunit takuneqarsinnaasunngorlugit.

Qullersaqarfimmi pisortaaneq nutaaq naatsorsuutigineqarpoq allaffissornerup iluani qaffasissumik piginnaaneqassasoq, allaffissornikkut aqutsisoqatigiinnut qulliunerusunut akuunissaminut piumassusilik piginnaaneqartorlu, tamatumanimi piumasaqaataavoq qulliunersumik aqutsisoqatigiinnut takutitsilluarsinnaasoq aamma ataatsimoortitsisinnaasoq, allaffissornerup aaqqissuussaanerani aalajangiisinnaassusilik kiisalu suliumassuseqarluartoq.

Akissarsianut atorfinitsitaanermullu tunngassuteqartut 

Akissarsiaqarnermut atorfinitsitaanermullu atugassarititaasut Namminersorlutik Oqartussat Kalaallit Nunaannilu kattuffiup isumaqatigiissutaat naleqquttoq isumaqatiginninniarsinnaatitaasup isumaqatigiissutaat atuuttut malillugit.

Atorfimmi inissisimavissaq tunngaviusoq løntrin 39/40-imi inissisimavoq tapeqassalluni akissarsiat 890.000-930.000 kr-nit missaanniissallutik + soraarnerussutisiassat. Kommunalbestyrelsinngortussap kissaatigaa atorfimmut qinnuteqaateqartussanut atorfik soqutiginartuussasoq, qulaanilu tunngavilersuutigineqartut tunngavigalugit atorfik ukiut aalajangersimasut aallaavigalugit atorfeqartitsinikkut aaqqinneqassasoq.

Tunngaviusumik isumaqatigiissutit malillugit atorfinitsitsoqarnissaa naatsorsuutigineqarpoq, qinnuteqartorli tjenestemandiuppat, taamatut atorfinitsitsisinnaaneq periarfissaasinnaavoq tjenestemand-inut inatsit tunngavigalugu.

Qullersaqarfimmi pisortaaninngortussamut taassumalu ilaqutaanut naleqquttumik inissamik neqerooruteqartoqarsinnaavoq. Qullersaqarfimmi pisortaaninngortussamut taassumalu ilaqutaanut pisattat nassiunneqarnissaannut ajunngitsorsiassaqartitsisoqassaaq – taamatuttaarlu meeraannut angerlarsimaffimmi najugaqataasussaanut. Aappaasumut suliffissaqartitsinissaq periarfissagissaarpoq.

1.oktober 2017-imi atorfinittoqarnissaa kissaatigineqarpoq – imaluunniit piaartumik ulluliussalluunniit kingornatigut.

Paasissutissat allat

Avannaata kommuniani ikaarsaariarnermut ataatsimiititaliap siulittaasua, Palle Jerimiassen tlf.+299 56 59 81 imaluunniit Avannaata Kommuniata qullersaqarfiani pisortaanerugallartoq Bea Mølgaard Lennert tlf. +299 55 06 69 attaviginissaannut tikilluaqqussaavutit imaluunniit Qaasuitsup Kommuniani sulisoqarnermut mailerlutit uunga: hr@qaasuitsup.gl.

Atorfimmut tunngatillugu paasissutissat sukumiinerusut atorfimmilu qanoq ittoq piumaneqarnersumut tunngassumut tunngassutillit qulaani pineqartumut saaffiginninnikkut pissarsiarineqarsinnaapput.

Qinnuteqarfissaq kingulleq 

Atorfimmut tunngatillugu ulloq qinnuteqarfissaq kingulleq tassaavoq 6. august 2017 nal. 12.00.

Qinnuteqaat uunga nassiunneqassaaq 

Qaasuitsup Kommunia

Sulisoqarnermut immikkoortortaqarfik

Postboks 1023

3952 Ilulissat

mailikkut: hr@qaasuitsup.gl