Attaveqaqatigiinnermut sullissisoq

Qaasuitsup Kommunia Nittartagalerisumik/Attaveqaqatigiinnermik suliaqartussamik 1. December 2016 imaluunniit isumaqatigiissuteqarnikkut sulilertussamik pissarsiorpoq.
Qinnuteqarfissaq:
17. november 2016
Sumi:
Ilulissat
Akissarsiat:
Isumaqatigiissut malillugu

Qaasuitsup Kommuniani Ilulissani nittartagalerisumik/attaveqaqatigiinnermik suliaqartussamik pissarsiorpoq 

Nunarsuarmi kommunit annersaanni innuttaasut suleqataasullu sumiiffimminni pitsaanerusumik paasissutissinneqartarnissaannut ikiuuterusuppit? Taava tassaasinnaavoq illit kommunimi attaveqaqatigiinnermi suleqataalersussaq.

Qaasuitsup Kommunia attaveqaqatigiinneq pillugu allaffimmik pilersitsisimavoq, Nunatta Avannaanni ataatsimoorussamik kinaassutsitsinnik innuttaasunut tiguaasinnaasumik nutarsiassaqartitsinermik kiisalu suleqataasunut ilisimasaqalersitsussamik paasissutissiinermik ilusilersueqataasinnaasumik.

Nittartakkamut, Intranet-imut (suliffeqarfimmi imminermini paasissutissiiffik/suliaqarfik) kiisalu ilisimatitsissutitut nutaarsiassanut allakkat assilissallu atorlugit kommunimi ataatsimoornermut aamma suleqatigiinnermut nukittorsaaqataassaatit. Ulluinnarni Qaanaamiit Kangaatsiamut suleqatit pissanganartumik – ilaatigullu ulapaarfiusumik avatangiiseqarluta suleqatigaangut.

Anguniagaraarput Kalaallit Nunaanni pisortatigoortumik attaveqaqatigiinnermik pitsaanerpaamik suliaqassalluta – anguniagaq qaffasissoq, neriuutigalugu illit tamanna piviusunngortitseqataaffigissagit.

Aqutsisoqarfiup Allattoqarfia kiisalu aqutsisoqatigiit qanimut suleqatigalugit suliassat makkuussapput 

  • Ulluinnarni nutarsiassaqartitsineq, tusagassiutitigut nalunaarutit kiisalu Qaasuitsup Kommuniata nittartagaanik nutarterineq.
  • Suliffeqarfimmi imminermini attaveqaqatigiinnermik suliaqarneq kiisalu qaammatikkaartumik nutaarsiassanik saqqummiineq.
  • Suliniutinut tunngassutillit pillugit ingerlatsivinnik suleqateqarneq.
  • Kommunip nittartagaanut paasissutissanik suliaqarneq

Suliassaqarfimmut piumasaqaatit 

  • Qarasaasiarsornikkut atortuutinik misilittagaqarluarneq. Sulinitsinni atugaraangut Sitecore CMS, Office-pakken, GIMP/CS-pakken aamma Outlook.
  • Attaveqaqatigiinnermi ilinniagalik (tusagassiorneq, cand.comm. assigisaalluunniit)
  • Kalaallitsut, danskisut kiisalu tuluttut oqaatsitigut piginnaasaqarluarneq.

Neriuutigaarput illit 

  • Nunatta Avannaani pissutsinut ilisimasaqarluartutit.
  • Suleqatikkuminartuusutit.
  • Suliniuteqallaqissuusutit tamatigoortuullutillu.
  • Aaqqiissuteqarniartartuusutit.
  • Nammineersinnaasutit kiisalu angusaqarusuttuusutit

Atorfik annertunerusumik paasisaqarfigerusukkukku Allattoqarfimmi pisortamut Karl Jørgen Geisler-imut saaffiginnissinnaavutit, e-mail: kage@qaasuitsup.gl  imaluunniit (+299) 94 78 10.

Akissarsiat atorfinitsitaanermullu atugassarititaasut 

Akissarsiat – atorfininnermilu atugassarititaasut, atorfinitsitaanerup nalaani Naalakkersuisut kiisalu kattuffiup isumaqatigiinniartussaatitaasup akornanni isumaqatigiissut atuuttoq naapertorlugu pissaaq.

Atorfimmut atatillugu inimik innersuussisoqarsinaavoq, piffimmi malittarisassat sukkulluunniit atuuttut naapertorlugit qularnaveeqqusigassamik/inimullu akiliuteqartarfiusussamik. Sulinermut atatillugu inimik tunineqarnissamik utaqqinissaq naatsorsuutigineqartariaqarpoq. Sulinermut atatillugu inip piareernissaata tungaanut ini pisatsersoriigaq kommunimit isumagineqassaaq. Sulilernisamut atatillugu angalanermut akiliussisoqassaaq matumani malittarisassat atuuttut naapertorlugit pisattat angallanneqarnerat ilanngullugit.

Suliffigisassaq tassaavoq Ilulissani Kommunip allaffia.

Qinnuteqarfissaq kingulleq 

Qinnuteqaat ilinniarsimanermik siusinnerusukkullu suliffigisimasanik paasissutissartalik, ilinniakkamik naammassinninnermi uppernarsaatip oqaaseqaatillu assinganik ilalerlugu HR-afdelingen kingusinnerpaamik 17. November 2016-imi tiguneqareersimassaaq.

Qinnuteqaat uunga nassiunneqassaaq 

Qaasuitsup Kommunia

Sulisoqarnermut Immikkoortortaqarfik

Postboks 1023

3952 Ilulissat

Imaluunniit e-mail-ikkut: hr@qaasuitsup.gl