UNESCO Site manager Ilulissanut

Nunarsuarmi kommunit angissutsimigut annersaanni sulerusuppit? Illoqarfimmi uummaarissumi sammisassaqarnissamullu periarfissarpasssualimmi kiisalu minnerunngitsumik takornarianut ornitassaqqissumi sunngiffimmi sammisaqarnissamut periarfissarpassuaqartumi, aamma timersornerup iluani.
Qinnuteqarfissaq:
25. oktober 2015
Sumi:
Ilulissat
Akissarsiat:
Isumaqatigiissut malillugu

Qaasuitsup Kommunia Ilulissani UNESCO Site manager-imik pissarsiorpoq 

Isfjordscenterimut Unesco Site Manageritut atorfik 1. november 2015 inuttalerneqarnissaa kissaatigaarput, imaluunniit isumaqatigiissuteqarnikut. Atorfik Qaasuitsup Kommuniata Qullersaqarfiani Ilulissani inissisimavoq, qaninnerpaamik illit qullersarissallugu Inuussutissarsiornermut, Suliffeqarnermut kiisalu Piareersarfinnut Pisortaq.

Nunarsuarmioqatigiit kingornussassaannik ingerlatsineq 

Ilulissat Kangerluanik ingerlatsineq ”Ilulissat Kangerluani Nunarsuarmioqatigiit kingornussassaannik Ingerlatsinissamut pilersaarut” naapertorlugu ingerlanneqarpoq.

Ingerlatsinermi pilersaarummi pingaarnertut Ilulissat Kangerluata Nunarsuarmioqatigiit kingornussarsiaannut ilanngunneqarnermi anguniagaavoq naleqartitanik illersuineq.

Ilulissat Kangerluanik ingerlatsineq Ilulissani Isfjordskontorip, Nunamut namminermut, Pinngortitamut kiisalu Avatangiisinut Naalakkersuisoqarfiup kiisalu Danmarkimi Kulturarvsstyrelsip suleqatigiinneratigut ingerlavoq.

Ilulissani Isfjordskontori, Qaasuitsup Kommuniata ataani inissisimasoq, nunarsuarmioqatigiit kingornussarsiaanik ulluinnarni ingerlatsinermut nakkutilliinermullu akisussaavoq.

Suliassat akisussaaffeqarfiillu ilaatigut makkuupput 

  • Ilulissat kangerluat pillugu paasissutissiineq aamma ingerlatitseqqineq (skiltinik, mappersagaaqqanik, plakatinik, videonik, tv-kkut aallakaatitanik, nittartakkamik, atuartitsinermi atortussanik, angallassisartunik isumasioqatigiissitsinernik suliaqarnermut akisussaaneq).
  • Nunarsuarmioqatigiit kingornussarsiaanut Ingerlatsinissamut pilersaarut (Avatangiisinut- pinngortitamullu Aqutsisoqarfimmut, kiisalu ulluinnarni ingerlatsinermut atugassanik suliaqarneq, atuutsitsilernermut, ukiumoortumik nalilersuinermut kiisalu nalimmassaanissanut siunnersuusianik suliaqarneq).
  • Aningaasaaqateqarfinnut aningaasassarsiorneq (suliniutinut assigiinngitsunut aningaasassarsiorneq, missingersuusiornerit, naatsorsuutit aamma nalunaarusiat).
  • Aningaasaqarneq aamma missingersuutinik aqutsineq.
  • Pilersaarusiamik aqutsineq.
  • Nunarsuarmioqatigiit kingornussassarsiaannik nakkutilliineq (nakkutilliisumut ilitsersuineq).
  • Suliniutinut assigiinngitsunut, pinaveersaartitsinermi aamma sumiiffimmik atuinermi aaqqiagiinngissutinik aaqqiissutissanik suliaqarneq, ukiumoortumik ”kangerluk pillugu ulloqartitsinermi” innuttaasunik akuutitsineq, atuarfinnik akuutitsineq.
  • Seqertitsivikkut saqqummiussassanik suliaqarneq (atortussanik katersineq, nalilersuineq kiisalu seqersitassat pillugit nalunarusianik nalimassaaneq).
  • Nunarsuarmioqatigiit kingornussassarsiaat pillugu tusagassiuutinut attaveqarneq, soorlu tusagassiuutinut nalunaarusiorneq.
  • Kangerlummut attuumassutilimmik pisortatigoortumik tikeraarneqarneq (ilisarititsinerit, ataatsimiinnerit kiisalu tikeraanut angallassinerit).
  • Nunarsuarmioqatigiit kingornussassarsiaannut akuersissuteqarnermut aamma akuersissutaagallartut eqqarsaatigalugit Namminersorlutik Oqartussanut tusarniaanermi akissuteqarneq.
  • Ilulissat Kangerluat pillugu Aqutsisoqatigiinnut ilaasortaaneq.
  • Sumiiffimmi pinngortitamut - kulturikkut naleqartitanik nakkutilliineq.
  • Sumiiffimmi ineriartornermut takussutissanik nakkutilliineq.
  • Atuisunik/tikeraartunik ilitsersuineq aamma paasissutissiineq.
  • Ukiuunerani allaffissornikkut suliassanik assigiinngitsunik suliaqarnermut ikiuunneq.
  • Inatsisiliornermut atatillugu nakkutilliineq, nalunaarusiorneq kiisalu unioqqutitsisoqartillugu qisuariarneq.
  • Kiisalu suliassat allat takkussuuttut assigiinngitsut.

Naatsorsuutigaarput 

  • Suliassaqarfimmi piginnaasaqarnissamik tunniussisumik ilinniagaqarneq.
  • Aammattaaq Kalaallit Nunaanni pissutsinut ilisimasaqarnissat kissaatigaarput.
  • Kalaallisut, danskisut kiisalu tuluttut oqaatsinik piginnaasaqarneq.

Akissarsiat atorfininnermilu atugassarititaasut 

Akissarsiat kiisalu atorfininnermi atugassarititaasut, matumani atorfininnermut kiisalu soraarnermut atatillugu angalanermut akiliunneqarnerit, kiisalu pisattat angallanneqarnerat ilanngullugu atorfininnerup nalaani Naalakkersuisut kiisalu soqutigisaqaqatigiit isumaqatigiinniartussaatitaasut akornanni isumaqatigiissutaat atuuttoq naapertorlugu pissaaq.

Atorfimmut atatillugu inimik innersuussisoqarsinnaavoq malittarisassat sukkulluunniit atuuttut naapertorlugit qularnaveeqqusissummut/inimik attartornermut akiliisoqartassalluni.

Atorfinninneq pinerluuteqarsimannginnermut kiisalu meeqqanut pinerliisimannginnermut uppernarsaatit naammaginartut naapertorlugit pissaaq. Taakku atorfinitsitsinermi oqartussaasunit atorfinittup atsiorluni akuersineratigut pissarsiarineqassapput, tamatumalu kingorna taakku atorfinitsitsinermi oqartussaasunit Rigspolitiinut aaneqassallutik.

Atorfik pillugu annertunerusumik paasissutissat Inuussutissarsiornermut Suliffeqarnermullu Pisortaagallartumut Bea Mølgaard Lennert-imut, oqarasuaat 92 29 14 atorlugu imaluunnit qarasaasiakkut uunga allalluni: bmle@qaasuitsup.gl pissarsiarineqarsinnaapput.

Qinnuteqarfissaq kingulleq 

Qinnuteqaat ilinniagaqarsimanermut uppernarsaatinik kiisalu siornatigut suliffigisimasanut paasissutissanik imaqartoq, soraarummeernermi uppernarsaatit kakkiullugit ilanngunneqartut assigisaallu Sulisoqarnermut Immikkoortortaqarfiup kingusinnerpaamik ulloq 25. oktober 2015 tigoreersimassavai.

Qinnuteqaat uunga nassiunneqassaaq 

Qaasuitsup Kommunia

Sulisoqarnermut Immikkoortortaqarfik

Postboks 1023

3952 Ilulissat

Aamma qarasaasiakkut uunga nassiunneqarsinnaavoq: hr@qaasuitsup.gl