Utoqqalernersiallit pillugit sullissisoq

Qaasuitsup Kommunia Ilulissani inunnik isumaginnittoqarfik utoqqalinersiallit pillugit sullissisussamik pissarsiorpoq piaartumik isumaqatigiissuteqarnikkulluunniit atorfinittussamik.
Qinnuteqarfissaq:
4. oktober 2015
Sumi:
Ilulissat
Akissarsiat:
Isumaqatigiissutit malillugit

Utoqqalernersialinnut sullissisumik pissarsiorneq 

Isumaginnittoqarfimmi aningaasatigut sullissisut allat suleqatigissavatit, Immikkoortortami Aqutsisoq qaninnertut qullersarissallugu.

Suliassaqarfiit akisussaaffiillu ilaatigut makkuussapput 

  • Siusinaartumik ukioqqortusillutillu utoqqalinersialinnut aningaasatigut tamakkiisumik siunnersuineq.
  • Utoqqalinersiaqalersunik allatsitsineq akileraartarnermullu isertitassanik naatsorsuutigisat tunuliaqutaralugit utoqqalinersiassaat naatsorsorlugit taavalu aaqqiissutaaratarsinnaasut.
  • Ukiumi isertitaqarfiusoq kingulleq akileraartarnikkut isertitat tunngavigalugit 1. januar tamatigut utoqqalinersiat tunngaviusumik tunniunneqartussat aaqqiiviginissaat isumagalugit.
  • Ukioqqortusilluni utoqqalinersiallit aningaasaqarnikkut inissisimanerat pillugu ataasiakkaamik nalilersuinerit inuttut tapiissutit annertuumik aningaasartuutaasussat eqqarsaatigalugit peqqissutsimut pisariaqartitsinikkut, isarussanik pissarsiaqarusunnikkut taavalu inuuniarnermut ikiorsiissutinik perusunnikkut.
  • Nuussimaneq imaluunniit toqusimaneq peqqutaalluni utoqqalinersiallit tunniuttarunnaarneri pillugit aalajangiineq. Siusinaartumik utoqqalinersiallit atorunnaarsinnissaannut qinnuteqaatit suliaralugit.
  • Utoqqalinersialinnut tunngasut pillugit kisitsisinngortinnerinut suleqataaneq.
  • Utoqqalinersialinnut tunngasut pillugit naammagittaalliutit suliarineri sukkasuumik ingerlannissaannut suleqataaneq, tamatumani paasissutissanik tapiliussassanillu sukumiinerusunik nassiussuinerit.
  • Utoqqalinersialinniit qinnuteqaatit (ukioqqortusilluni siusinaartumillu utoqqalinersialinni) suleqatigiit ataatsimiittarnerannut inassutigalugit utoqqalinersiallillu pillugit suleqatigiit ataatsimiinneranni aalajangiussat suliaralugit.
  • Utoqqalinersialinni tunngasut aningaasanik tunniussinerit tamarmik ataavartumik ilisimatitsissutigalugit (pingaartumik utoqqalinersiaqaleqqammersussat, utoqqalinersiat aaqqiivigineqarnerinut taavalu inuttut tapiissutinut atatillugu) illoqarfinni nunaqarfinnilu; utoqqalinersiallit amerlassusaat kisitsisinngorlugit saqqummiullugit.
  • Siusinaartumik utoqqalinersiallit aningaasanik tunineqarnerisa allaffissornikkut ingerlanneqarneri pillugit ataavartumik ilisimatitsissutigisarlugit (ullut 14-ikkaarlugit tunniussisarnerit, ullut 7-ikkaarlugit tunniussisarnerit assigisaalu).
  • Utoqqaat pillugit suliffeqarfinnik utoqqaallu peqatigiiffiinik suleqatiginninneq pillugu ataavartumik ilisimatitsissutigisarlugu (tamatuma ataani utoqqaat ataatsimiititaat).
  • Utoqqaat pillugit naammagittaalliuutit ataavartumik killiffilersortarlugit.
Tamatumalu saniatigut atorfik pillugu akisussaaffiit atorfiullu allaatiginninneranut innersuussisoqassaaq, ilaatigut isumaginnittoqarfiup allaffiani immikkoortortaqarfiup pisortaanut saaffiginninnikkut paasissutissanik pisoqarsinnaammat.

Piginnaasat 

  • Kissaatigaarput atorfinittussaq isumaginninnermi siunnersortaassasoq, siunnersortitut ikiorti, allaffimmiutut ilinniarsimasoq isumaginninnerup iluani suliatigut pikkorissarnermik naammassinnissimasoq imaluunniit isumaginninnermi ikiortitut ilinniagalik isumaginninnerup iluani suliatigut pikkorissarnermik naammassinnissimasoq.
  • Aningaasatigut sullissinerup iluani imaluunniit isumaginninnerup iluani sulinermik misilittagalik, ilaatigut Winformatikkimik atuisinnaasoq.
  • Tulleriissaarisinnaaneq, tatiginassuseq, tunniusimaneq akisussaassuseqarnerlu.
  • Maligassiuisinnaaneq.
  • Sullissanik attaveqarsinnaaneq oqaloqateqarsinnaanerlu.
  • Tarnikkut nukittuneq.

Akissaatit atorfininnermullu atugassarititaasut 

Akissarsiaqarnermut atorfinitsitaanermullu atugassarititat Naalakkersuisut kattuffiullu isumaqatiginninniarsinnaatitaasup akornanni isumaqatigiissutaat naapertorlugu pissapput.

 

Suliffimmut atatillugu inissaqartitsisoqanngilaq.

Pinerlussimannginnermut naammaginartumik uppernarsaat aamma meeqqanik pinerliisimannginnermik uppernarsaat atorfininnissamut piumasaqaataavoq. Taakku atorfinittussap atsiorluni akuersinerata kingorna atorfinitsitsisussamiit Naalagaaffiup politiivinut (Rigspolitiet) pissarsiarineqassapput.

Atorfik pillugu paasissutissat annertunerusut Immikkoortortaqarfimmi aqutsisuugallartumut, Enniki Thorning mail-ikkut eth@qaasuitsup.gl imaluunniit tlf. 94 78 58 saaffigineratigut pineqarsinnaapput.

Qinnuteqarfissaq kingulleq 

Qinnuteqaat Qaasuitsup Kommuniata tigoreersimassavaa kingusinnerpaamik ulloq 4. oktober 2015.

Qinnuteqaat uunga nassiunneqassaaq 

Qaasuitsup Kommunia

Sulisoqarnermut immikkoortortaq

Postboks 1023

3952 Ilulissat

Imaluunniit e-mail-ikkut: qaasu_hr@qaasuitsup.gl