Ilulissat Kangerluat paariuk

Pinngortitamik qanganitsanillu eqqaamassutisaanik takornariaqartitsineq nungullarsaasuuvoq

Ilulissat Kangerluat eqqissisimatitaavoq. Takornariat 20.000-it missaanniittut ukiumut tamatuma eqqaaniittarput, kangerlullu Iluliarmiunit atorluaneqartaqaaq. Tamakku tamarmik pinngortitamik qanganitsanillu eqqaamassutisaanik nungullarterisuupput.

Ilulissat Kangerluannut atatillugu maleruagassat pingaarnepaat tassaapput:

Sermermiut
Nunaqarfitoqaasimasumi tassani aqqutissiat nalunaaqqutsikkat avataatigut aasaanerani angalasoqaqqusaanngilaq. Tamanna ilaatigut paasisariaqarpoq nunaqarfitoqqami aqqutissiat sungaartut tungujortullu ikaarfigiinnarnarneqarsinnaannginnerannik.

Ilivitoqqat illutoqqallu qarmakui
Taakku tamarmik itsarnitsanik eqqaamassutissatut inatsimmit illersoneqarput, tassalu aserorteriffigeqqusaanngillat. Ukiut tamaasa takuneqartarput ilivitoqqat ammarneqarsimasut, tamannalu innimiilliornerullunilu tassani ilinneqarsimasut nungujartupallannissaannik kinguneqartarpoq. Ilivitoqqat ammarneqarnissaat assaavigineqarnissaallu qanganitsanilluunniit eqqaamassutissat arlaannalluunniit tummaqqusaanngillat.

Tupertarneq
Tupertoqarsinnaavoq avataanilu killuliortoqarsinnaalluni, taamaattorli ulloq unnuarlu ataasiinnarmi. Pitsaaneruvoq tammaarsimaarfik helikopterit mittarfitoqaata eqqaaniittoq tamanut ammatitaasoq atorukku. Nunap panernerata nalaani (amerlanertigut julimi augustusimilu) silami ikumaartitsinissaq inerteqqutaalluinnalersinnaavoq nunamik ikummartoortitsisinnaaneq pissutigalugu.

Sikkilit qamuteralaallu
Taakku tamarmik nunami eqqissisimatitaasumi inerteqqutaapput.

Piniarneq aalisarnerlu
Eqqissisimatitap iluani tamanna inerteqqutaanngilaq, tassani malitassanik inatsit nalinginnaasoq malikkaanni (takornariat aalisarsinnaanerminnut akuersissummik piniaqqaassapput)

Naasut 
Naasunik nutsueqqusaasoqannngilaq naasimasunillu sunilluunniit aserortereqqusaasoqarani. 

Igitassat
Soorunami igitassanik tamaani maangaannaq igitsineq assaassinerluunniit inerteqqutaapput. Assersuutaalluarumaguit maangaannaq iginneqarsimasut tamaaniinninni katersukkit.

Angallammik angalaneq
Kangerluup anillagiaata iluani angallatit minnerit aalisariutillu kisimik angalaqqusaapput. Nunamut nioqqusaasoqanngilaq. Takornarianik angallassisoqarnerani tamatigut ilaasoqartassaaq inummik takornariartitsisumik Kalaallit Nunaanni pinngortitamik pinngortitallu illersorneqarnissaanik inatsimmik ilisimasalimmik.

Aqutissiat nalunaaqqutsikkat
Inassutigiuartarparput aqqutissiat nalunaaqqutsikkat kisiisa aqqutigeqqullugit, tikeraat ajutuunnginnissaat pinngotitallu nungusannginnerunissaa eqqarsaatigalugit.

Eqqissisimatitap killeqarfii
UNESCO-p eqqissisimatitaata killeqarfii Kangerlummi angalaarluni pisuttuarfissatut nunamik assiliani illoqarfimmi niuertarfinni tamani pisiarineqarsinnaapput (1:20.000 amma 1:100.000). Illoqarfiup qanitaani inussoqarpoq tikkuussisunik killeqarfiup sumiinnerinik.

Angalaarluarina!

Inatsisit pillugit una toorlugu atuaruk.