Ilusiliinerup illersornera

Ilusiliinerup illersornera 

Ilusiliinerup illersugaanera nalunaarsorneqarsimasoq qinnuteqaatip tunniunneqarneraniit nioqqutissiap isikkuanut kisermaassissutaavoq allallu ilaarsinissaannut atornerluinissaannullu illersuutaalluni. Ilusiliinerup nalunaarsorneqarnera pigigukku allanut inerteqqutigisinnaavat ilusiliinerup inuussutissarsiornikkut atorneqarnissaa, ilusiliineq nioqqutissiami sumiluunniit atorneqaraluarpat.

Ilusiliinerup illersorneqarneraniipput nioqqutissiap ilusilernera isikkualu. Nioqqutissiat ilusiliineq pillugu inatsit malillugu illersorneqarsinnaasut soorlu tassaasinnaapput maskiinat, poortuutissat, pequtit, atisat, pinngussat, sakkuutit, inuussutissat, computer-imi saqqummertartut (skærmbilleder), ikon-it (assilianngorlugit takutittakkat) aamma allattaatsit isikkui. Aamma nioqqutissiap ilaa illersorneqarsinnaavoq, soorlu nerriviup niulua, aamma kusanarsaatit, soorlu annoraamernit, tapet-it atisallu ilusilersornerat ilusilersuinikkut illersorneqarsinnaavoq.


Piumasaqaat
Ilusiliinerup illersorneqarnissaanut piumasaavoq ilusiliineq
  • nutaajussasoq
  • immikkullu ilisarnarluni

Qinnuteqarneq
Danmark-imi nioqqutissiavit ilusiata illersorneqarnissaa kissaatigigukku, ilusiliinerup illersorneqarnissaa Patent- og Varemærkestyrelsen-ip Danmark-imiittumi nittartagaatigut qinnuteqaatigissavat. Ilusiliinerup illersorneqarnissaa toqqaannartumik attaveqaatitigoortumik styrelsen-ip nittartagaatigut qinnuteqarsinnaavutit – www.dkpto.dk. Tassanittaaq toqqaannartumik attaveqaatitigoortumik qinnuteqarnianngikkuit, qinnuteqarnissamut immersuiffissat nassaarisinnaavat.

Patent- og Varemærkestyresen-ip ilusiliineq akuerineqartinnagu pisariaqartut ilai misissortarpai, aammali illit qinnuteqartutut styrelsen qinnuigisinnaavat ilassutaasumik misissueqqaaqqullugu ilusiliineq nalunaarsorneqartinnagu. Taava styrelsen-ip ilaatigut misissussavaa pisinnaatitaaffinnik pisoqaanerusunik ilusiliinermut qinnutigineqartumut qanippallaanik peqarnersoq.

Ilusiliineq nalunaarsugaasinnaavoq ukiut tallimakkuutaarlugit. Sivisunerpaamik illersugaasinnaalluni ukiuni 25-ni. Taartissalli illersugaasinnaapput taamaallaat ukiut 15-it tikillugit.


Nunani allani ilusilikkap illersugaanera
Nunami ataatsimi imaluunniit nunani arlaqartuni EU-mi ilaasortaasuni ilusiliineq illersorniarukku, qinnuteqaasiorfissamik ataatsimik nunanut EU-mi ilaasortaasunut tamanut atuuttumik qinnuteqaasiorsinnaavutit. Malittarisassat Danmark-imisulli qinnuteqarnertulli assigerluinnangajappai.

Qinnuteqaat tunniunneqarsinnaavoq EU-p Varemærke- og Designkontor-ianut Spaniamiittumut, OHIM, imaluunniit Patent- og Varemærkestyrelsen-imut, taassuma qinnuteqaat ingerlateqqissammagu.

Nunani allani ilusiliinerup illersorneqarnissaa qinnuteqaatiginiarukku, nunami pineqartumik qinnuteqaatit tunniutissavat.


Malugiuk
Software-it ilusiliinermut inatsit malillugu illersorneqarsinnaanngillat, pilersitseqqaartuunermut inatsit malillugu illersorneqarsinnaallutik. Taamaattoq skærm-ikkut takutittakkat ikon-illu ilusiliinermut inatsit malillugu illersorneqarsinnaapput.


Paasissutissat amerlanerusut
Ilusiliinerup illersorneqarnera pillugu sukumiinerusumik Patent- og Varemærkstyrelsen-ip nittartagaatigut atuarsinnaavutit.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl