Ingerlatseqatigiiffiit

Ingerlatseqatigiiffiit 

Aktie-, anparts- andelsselskab-inilu piginneqataasut nammineq pigisatik nalillit akiitsunut pisussaaffinnullu akileeqataassutigisussaanngilaat. Aktieselskab-ini anpartsselskab-inilu aktianut anpart-inullu akileeqataassutit kisimik akileeqataassutissaasinnaapput. Aktie- aamma anpartsselskab-it inatsisitigut nalunaarsugaapput, taamaammallu ukiumoortumik naatsorsuutitik Erhvervs- og Selskabsstyrelsen-imut nassiuttussaallugit.

Ingerlatseqatigiiffik aallartinniaraanni aallarniutinik akileeqqaartariaqarpoq. Aallarniutitut akiliutit tassaasariaqanngillat aningaasat tigoriaannaat, taarsiulluguli tassaasinnaallutik pigisat nalillit, soorlu assersuutigalugu lastbiilit, IT-kkut atortorissaarutit imaluunniit nioqqutissat toqqortat.


Aktianik piginneqatigiiffik (Aktieselskab – A/S)
Aktianik piginneqatigiiffiit inatsisitigut aqunneqarput. Aktianik piginneqatigiiffimmi aktiaatillit namminneq piginneqatigiiffiup pisussaaffiinit eqqorneqarneq ajorput. Tamarmik ataasiakkaarlutik aningaasaleeqataassutigisimasaannatik akileeqataassutissamaatigaat. Aktianik piginneqatigiiffimmik pilersitsineq minnerpaamik 500.000 kruuninik akeqarpoq.

Piginneqatigiiffik aktiaatilinnit pigineqarpoq, ataatsimeersuarnermi piginneqatigiiffiup oqartussaasuisa qullersarisaanni aalajangersaasarlutik.

Piginneqatigiiffik siulersuisunit ulluinnarnilu allaffitsigut aqutsisunit siulersugaavoq. Siulersuisut qullersaallutik aqutsisuupput, ulluinnarnilu aqutsisuusut siulersuisut maleruaqqusaat malillugit aqutsisarlutik.

Aktianik piginneqatigiiffik qanoq angitiginera apeqqutaatinnagu ikinnerpaamik pingasunik siulersuisoqassaaq. Piginneqatigiiffik ukiuni kingullerni pingasuni agguaqatigiissillugu 35-nik sinnerlugilluunniit sulisoqarsimappat, sulisut pinngitsooratik siulersuisuni sinniisoqassapput.

Aktianik piginneqatigiiffik isertitaminit akileraaruteqaataasussanit 31,8 %-imik akileraartinneqassaaq.


Anpartsselskab (ApS)
Anpartsselskab-it (suliffeqarfik akiitsoqalissappat piginnittuisa tamarmik immikkut aningaasaliissutimik nalingannik taamaallaat akisussaaffigisaat) inatsisitigut aqunneqarput. Anpartsselskab-imi piginneqataasut namminneq ingerlatseqatigiiffimmut akisussaaffeqanngillat. Akileeqataassutissamaatitatuaraat aningaasat peqataassutitut akiliutigisimasatik. Anpartsselskab-ip pilersinnera minnerpaamik 125.000 kruuninik akeqarpoq.

Anpartsselskab inummit ataatsimit aallartinneqarlunilu pigineqarsinnaavoq.

Anpartsselskab-it 35-it inorlugit sulisullit namminneq aalajangersinnaavaat pisortamit, ulluinnarni allaffitsigut aqutsisunit siulersuisunilluunniit aqunneqassanerlutik taakkunanngaluunniit tamanit. Anpartsselskab 35-it sinnerlugit sulisoqarpat sulisut pinngitsooratik siulersuisuni sinniisoqassapput, taamaattumillu ingerlatseqatigiiffik siulersuisoqassaaq.

Anpartsselskab isertitaminit akileraaruteqaataasussanit 31,8 %-imik akileraartinneqassaaq.


Andelsselskab (AmbA)
Andelselskab-imi (piginneqatigiiffik peqataasuisa namminneq pigisartik kisiat akisussaassuseqarfigisaat) killilimmik akisussaaffeqartumi ilaasortat namminneq ingerlatseqatigiiffiup akiitsuinut akisussaanngillat. Andelsselskab-iliorneq akeqanngilaq.

Suliffeqarfiit inuussutissarsiutinik ingerlatsisut pillugit inatsit malillugu andelsselskab-ip siunertaraa peqataasut pisisartutut, tunisisartutut assigisaasigullu ataatsimoorlutik soqutigisaasa siuarsarnissaat.

Piginneqatigiiffiup iluanaarutai aningaasaliissutit nalinginnaasumik ernialersugaanerata saniatigut agguarneqartarput ilaasortat isertitaqassusaat malillugu imaluunniit suliffeqarfimmiiginnartarlutik.

Pisortaassuseq malittarisassatigut aalajangersugaavoq. Amerlanertigut piginneqatigiiffik ulluinnarni allaffitsigut aqutsisoqartarpoq, siulersuisoqarluni ataatsimeersuarneqartarlunilu.

Suliffeqarfiit inuussutissarsiummik ingerlataqartut pillugit inatsimmi piumasaasut naammassineqarsimappata, piginneqatigiiffik ukiumoortumik naatsorsuusiortarneq pillugu inatsit malillugu ukiumoortumik naatsorsuusiortassaaq Erhvervs- og Selskabsstyrelsen-imullu nassiullugu.

Andelsselskab-i killilimmik akisussaaffilik aktieselskab-itut akileraartinneqassaaq, sinneqartoorutit aningaasaleeqataassutit malillugit agguarneqarsimappata.


Qanimut suleqatigiineq (Partnerskab – P/S)
Qanimut suleqatigiinneq aktieselskab-it pillugit inatsimmut Ukiumoortumillu naatsorsuusiortarneq pillugu inatsimmut atavoq.

Qanimut suleqatigiinni peqataapput pigisaqavissut piginneqataasullu. Pigisaqavissut namminerpiaq killiligaanngitsumik peqatigiillutillu ingerlatseqatigiiffimmut akiliussisussamaataapput, piginneqataasulli aningaasaleeqataassutitik kisiisa akiliussisussaassutigaat.

Qanimut suleqatigiinnermik pilersitsineq minnerpaamik 500.000 kruuninik akeqarpoq.

Aningaasanik sillimmaterpassuaqanngikkaanni qanimut suleqatigiiliorneq soqutiginarsinnaavoq, tassami peqatigineqarsinnaammata ingerlatseqatigiiffimmut aningaasaleeqataasut, namminerli ingerlatseqatigiiffik aqutaralugu (amerlanertigut pigisaqavissoq).

Ingerlatseqatigiiffik pilersinneqarsinnaavoq nutaatut imaluunniit aktieselskab-ip allanngortinneratigut.

Qanimut suleqatigiiffik ingerlatseqatigiiffiit pillugit inatsisinut atanngilaq, tassami aningaasaleeqataasut pigisaqavissullu ingerlatseqatigiiffiup angusaanut peqataassutiminnit namminneq akileraartitaasarmata.


Nioqquteqarnissamik isumaqatigiissuteqarneq (Franchising)
Taanna tassaavoq nioqquteqarsinnaatitaanermut uppernarsaatilimmik pigisaqartup, namminersorlunilu inuussutissarsiummik ingerlatsisup nioqquteqariaatsip atornissaanik pisisup akornanni isumaqatigiissut.

Ataasiaannartumik akiliissaatit niuersinnaalerlutit atorlugit nioqquteqarsinnaatitaanermut pigisaqartup aqqa, ilisarnaataa, niueriaasia, nioqqutai, sullissineri il.il. Tamatuma saniatigut atuinermut isertitanniit akiliuteqartassaatit.

Suliffeqarfik nammineq pigisatut imaluunniit ingerlatseqatigiiffittut ingerlanneqarsinnaavoq killilimmik pisussaaffeqarluni.

Nioqquteqarnissamik isumaqatigiissuteqarneq pillugu Kalaallit Nunaanni Danmark-imiluunniit inatsiseqanngilaq. Danmark-imi Nioqquteqarnissamut Piginnittut Peqatigiiffiat nioqquteqarusuttunut siunnersuilluarsinnaavoq nittartagartik atorlugu www.dk-franchise.dk.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl