Avammut niuernerup siuarsarneranut nutaanngorsaanermullu kittaartagaq

Avammut niuernerup siuarsarneranut nutaanngorsaanermullu kittaartagaq 

Avammut niuernermut nutaanngorsaanermullu suliniut aallartissallugu imaannaanngitsukasiusinnaavoq. Nalorninartoqartuartarpoq niuerfik nutaaq iserfiginiaraanni, nioqqutissat sullissinerillu nutaat ineriartortinniaraanni imaluunniit suliffeqarfimmi teknologi nutaaq atorniaraanni.

Siunertaq annertooq aallartitsinnagu soorunami ilisimalluareertariaqarpat suna anguniarnerlugu, aammalu suliniutip piviusunngortinnissaanut suliffeqarfik naammattunik aningaasaateqarnersoq piginnaasaqarnersorlu.

Avammut niuernerup nioqqutissanillu ineriartortitsinerup tungaasigut suliniutinut annertuunut Namminersorlutik Oqartussaniit aningaasanik qinnuteqarsinnaavutit, suliniutit taamaattut ineriartortitsinermut aningaasartuutit 50%-ii tikillugit tapiisoqarsinnaammat. Taamatulli tapiissutisissagaanni pilersaarut qulaajaqqissaarsimasariaqarpoq.


Siunertaq
Suliniutit minnerusut piviusunngortinnissaannut – annerusullu pilersaarusiornerata nukittorsarnissaannut – avataaniit siunnersorneqarnissamut kittaartakkamik qinnuteqarsinnaavutit.

Kittaartagaq ataaseq 25.000 kr.-inik naleqarpoq. Aningaasat ilinnut tunniunneqassanngillat, siunnersortilli Greenland Business-illu akornanni toqqaannartumik akilerneqassallutik.


Qinnuteqarneq
Avammut niuernerup siuarsarneranut nutaanngorsaanermullu kittaartakkamik qinnuteqarniaruit, suliniummut allaganngorlugu pilersaarusiussaatit.

Avammut niuernermut suliniutaasimappat, pilersaarusiami oqaluttuarineqassapput

  • nioqqutissiaq
  • nioqqutissiap niuerfimmi nutaami periarfissai
  • suleqatissarsiarisinnaasat
  • piffissalersuigallarneq aningaasatigullu missingersuut


Nutaanngorsaanissamut nioqqutissiallu ineriartortinnissaanut suliniutaasimappat soorunami pilersaarusiami oqaluttuarineqassaaq

  • suna ineriartortinniarnerlugu
  • ineriartortinnera sooq niuernikkut soqutiginaateqarnersoq
  • iluatsissappat suut naammassereersimanissaat piumasarineqarnersoq
  • nammineq suut piginnaasaqarfiginerlugit suullu avataaniit pisariaqassanersut
  • piffissalersuigallarneq aningaasatigullu missingersuusiaq


Nutaanngorsaanissamut kittaartakkamik pissarsisinnaassagaanni piviusumik nutarteriniarneq pineqartariaqarpoq. Nioqqutissiat nalinginnaasumik amerliniarnerat, aningaasartuutikillisarluni pisariillisaaneq pilerisaarinerluunniit tapiiffigineqarsinnaanngillat.

Najukkanni Inuussutissarsiornermik Allaffeqarfimmut pilersaarusiaq allaganngorlugu tunniutissavat nassiulluguluunniit.

Allaganngorlugu pilersaarusiaq illit siunnersortillu akornassinni ataatsimiinnissamut tunngaviussaaq. Ataatsimiinneq naapeqatigiinnikkut oqarasuaatikkulluunniit pisinnaavoq. Ataasiakkaatigut siunnersortip avataaniit siunnersorti suliamut immikkuullarissumik ilisimasaqartoq imaluunniit sulianut tunngasunik immikkut ilisimasallit allat ilaatissinnaavai. Siunnersorti allalu siunnersortiusinnaasoq suliniut pillugu nipangiussisussaatitaapput.


Atuineq
Kittaartagaq sullissinerit makkua pisiarinissaannut aningaasaleeqataanissanulluunniit atorsinnaavat:

  • Nalinginnaasumik siunnersuineq (siunnersuisutut sullissinerit ilaatigut niuerfinnik pilerisaarinissamut periusissiorneq, niuerfinnik misissueqqissaarneq, branche-t pillugit paasissutissat, laboratoriani uppernarsaatit)
  • Eqqartuussissuserisut ikiorsiinerat
  • Inuussutissarsiutit ineriartortinnerannut selskab-ip suleqataasa ikiorsiinerat (soorlu Danmarks Eksportråd, Udenrigsmministeriet imaluunniit dansk-it aallartitaqarfii konsuuleqarfiilu)
  • Tenikkikkut immikkut siunnersuineq (soorlu ARTEK imaluunniit Teknologisk Institut)
  • Immikkut ilisimasallit suliamut paasisimasallit ikiorsiineri ilaatigut siunnersortit ikiorsiineri/suleqatigiissitat/isumasioqatigiinnerit
  • Brancheskole-t, ilaatigut ATI aamma INUILI suliniutitigut suleqatiginerat


Allat saniatigut kittaartakkat
Kittaartagaq nunguppat ilaatigut amerlanerusunik tunniussisoqarsinnaavoq (amerlanerpaamilli pingasunik). Kittaartakkap siulliup saniatigut kittaartakkakkut sullissinerit pisiat 50%-iinnaat aningaasaliiffigineqarsinnaapput. Taamaattumik kittaartakkamut siullermut 25.000 kr.-inik naleqartumut sanilliullugit affaannarmik naleqassapput, tassa ataaseq 12.500 kr.-qassalluni.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl