Timmisartumut ilaasutut pisinnaatitaaffiit – timmisartup aamma nassatat kinguaattoornerat

Timmisartumut ilaasutut pisinnaatitaaffiit – timmisartup aamma nassatat kinguaattoornerat 

Timmisartorlutit aallarfissat kinguartinneqarpat imaluunniit nassatatit kingusinaartumik tikippata timmisartumut ilaasutut arlalinnik pisinnaatitaaffeqarputit.


Timmisartup kinguattoornera
Timmisartoq ilaaffissat qanoq sivisutigisumik kinguaattoornersoq pisinnaatitaaffeqarninnut apeqqutaavoq. Pisinnaatitaaffigisinnaasatit tallimat pingaarnerpaat makkua naatsumik nassuiarneqarput:

  1. Nerisat aamma imeruersaatit, utaqqinerup sivisussusaanut naleqqiullugu naammaginartut
    Akeqanngitsumik oqarasuaammik, fax-imik imaluunniit e-mail-imik atuineq
  2. Billet-ivit akianik utertitsineq
    Sumiiffimmut angalanerpit aallartiffianut akeqanngitsumik utimut timmisartuunneqarneq
  3. Akunnittarfimmiinneq aamma timmisartoqarfiup unnuiffissavillu akornanni angallanneqarneq. Timmisartuutileqatigiiffiup angallanneqarnissaq akunnittarfillu innersuutissavai. Tamanna isumaqarpoq sumi unnuissanerlutit nammineq aalajangersinnaanngikkit
  4. Aningaasaqarnikkut taarsiivigineqarneq, aningaasaqarnikkut annaasaqarsimanerit uppernarsaasinngikkaluarlugu
  5. Taarsiiffigineqarneq, matumanili piumasaqaataavoq kinguaattoorneq patsisigalugu aningaasaqarnikkut annaasaqarsimanerit uppernarsarsinnaassagit


Nassatat kinguaattoornerat

Nassatatit kinguaattoorsimappata, timmisartuutileqatigiiffik atukkat imaluunniit mittarfimmi tikiffigisanni nassatanik isumaginnittarfik attavigissavat. Nassatanik isumaginnittartoq assersuutigalugu tassaasinnaavoq Novia, suliffeqarfiusoq assersuutigalugu ilaasunik nassatanillu isumaginninnermik sullissinermillu sulialik. Saaffiginnikkuit timmisartuutileqatigiiffiup imaluunniit nassatanik isumaginnittarfiup Property Irregularity Report-imik (PIR) taaneqartartumik sanaatissavaatit. Nalunaarusiap assilinerata pissarsiarinissaa eqqaamassavat.

Nassatatit kinguaattoorsimappata atortut pisariaqartut kinguaattoornermi pisinermik taaneqartartoq atorlugu pisiarisinnaavatit, taakku tamakkiisumik ilaannaasumilluunniit illit timmisartuutileqatigiiffimmit atukkannit imaluunniit nassatanik isumaginnittartumit nalingat utertinneqassaaq. Tassaasinnaapput eqqiarnermut atortut atisassamaatillu. Atortut suut kinguaattoornermi pisiatut pisiarisinnaaneritit, illit angalanivit siunertaa aamma kinguaattoornerup qanoq sivisutiginera apeqqutaassapput.

Nassatat kingusinaarneranni taarsiissutit annerpaamik 9.000 kr.-it missaanniittut annerpaamik pissarsiarineqarsinnaanerat eqqumaffigissavat. Taassuma saniatigut kinguaattoornermi pisiavit atorneqarneranni nalingat timmisartuutileqatigiiffiup taarsiinermini appaaffigisinnaavaa.


Malugiuk
Pisinnaatitaaffinnut timmisartornermi ingerlaarfik sorleq aqqutiginerit aamma timmisartuutileqatigiiffik suna ilaaffiginerit apeqqutaapput. Taamaattumik pisinnaatitaaffitit tusagaqarfigiumagukkit illit timmisartuutileqatigiiffik atukkat siusinaartumik saaffigisariaqarpat. Amerlanertigut timmisartuutileqatigiiffiup nittartagaani illit pisinnaatitaaffitit pillugit paasissutissat aamma nassaarisinnaavatit. Pisuni allani quppersakkamik nassiussivigisinnaavaatsit.

Timmisartuussinissat taamaatiinnarneranni aamma ikinissamut itigartitaanermi pisinnaatitaaffitit pillugit annertunerusumik Danmark-imi Trafikstyrelsen-ip nittartagaani aamma Forbruger Europa-p nittartagaani paasisaqarsinnaavutit.

Allaaserisat attuumassutillit

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik
Imaneq 1A - 601
Postboks 909
3900 Nuuk

Oqarasuaat: (+299) 34 50 00
E-mail: box909@nanoq.gl
Nittartagaq: www.naalakkersuisut.gl