Peqqinnissaqarfiup sullississutai – Napparsimasunik angallassineq

Peqqinnissaqarfiup sullississutai – Napparsimasunik angallassineq 

Innuttaasut peqqinnerunissaat, pitsaaliuineq aamma nakorsarneqarneq Peqqinnissaqarfiup isumagisarai. Inunnut Kalaallit Nunaanni aalajangersimasumik najugaqarlutillu inuit allattorsimaffianniittunut, nakorsiarneq, unitsinneqarneq aamma nakorsarneqarneq akeqanngillat.

Avinngarusimanerusuni najugallit misissortikkumallutik nakorsarneqarumallutillu illoqarfinnut anginerusunut nakorsalinnut napparsimmavilinnulluunniit aallartariaqarsinnaapput.

Najugaqarfiginngisanni sumiiffimmi allami misissortinnissat nakorsarneqarnissallu nakorsap innersuussutigisimappagit, angalaneq peqqinnissaqarfimmit akilerneqartarpoq.


Ingiallorteqarneq
Nakorsap tamanna pisariaqartikkit aalajangersimappagu, angalanerup nalaani ingiallorteqarsinnaavutit. Amerlanertigut peqqinnissaqarfimmi sulisut ingiallortaasarput. Peqqinnissaqarfilli sulisumik ingiaqataasinnaasumik pissarsisinnaanngippat, pisuni immikkut ittuni qanigisat ataaseq ilinnut ingiallortaasinnaavoq.


Qanigisat ingiallortitut
Najugarinngisanni nakorsarneqartariaqaruit inuunerillu ulorianartorsiorluni, pissutsit atuuttut pisinnaatippassuk, taamatuttaaq ilaquttat qanigisalluunniit ataaseq peqqinnissaqarfiup akiligaanik ingiallortigisinnaavat.

Meeqqat 15-it inorlugit ukiullit angajoqqaajusumik ataatsimik imaluunniit ilaqutaasumik allamik ingiallorneqarsinnaapput.


Ingiallortaasup pisinnaatitaaffii
Ingiallortaasutut peqqinnissaqarfiup akiligaanik nerisaqarnissamut najugaqarnissamullu pisinnaatitaavutit, periutsit marluk aallaavigalugit:

  • Napparsimasumut inuunera ulorianartorsiortumut ingiallortaaguit, napparsimasup inuunerata ulorianartorsiorunnaarnissaata tungaanut peqqinnissaqarfiup najugaqarnerit akilertussaavaa
  • Napparsimasumut perulunngitsumut ingiallortaaguit, angerlarnissamut aqqutissap siullerpaap tungaanut taamaallaat peqqinnissaqarfiup najugaqarnerit akilertussaavaa. Tassa imaappoq angerlarsinnaalernissavit tungaanut

Malugiuk
Nunani allani nakorsarneqarnerit ima sivisutigippat, nakorsarneqarfinnut nuuttariaqalerlutit, suli akeqanngitsumik nakorsarneqarsinnaavutit Kalaallit Nunaannullu angerlarnissat akilerneqarluni.

Meeraqaruit taannalu ataasiliisimanngippat, nakorsap innersuussutigippagu meeqqat ilagisinnaavat.

Takusinnaavattaaq www.peqqik.gl

Allaaserisat attuumassutillit

Peqqissutsimut Naalakkersuisoqarfik
Imaneq 1A - 401
Postboks 1160
3900 Nuuk

Oqarasuaat: (+299) 34 50 00
Fax: (+299) 34 55 05
E-mail: pn@nanoq.gl
Nittartagaq: www.naalakkersuisut.gl