Napparsimasunik angallassineq

Nalinginnaasumik paasissutissiineq 

Peqqissutsimik siuarsaanikkut, pinaveersaartitsinikkut aamma katsorsaanikkut innuttaasut peqqissusaat peqqinnissaqarfimmit suliassarineqarpoq. Kalaallit Nunaanni innuttaasunut tamanut aalajangersimasumik najugaqartunut aamma inuit allattorsimaffianni nalunaarsorsimasunut nakorsiarneq, unitsitaaneq aamma nakorsartinneq akeqanngilaq.

innuttaasut isorliunerusuni najugaqartut nakorsamit imaluunniit napparsimmavimmi misissortinniarunik nakorsartillutillu illoqarfimmut anginerusumut aallartariaqartarsinnaapput.

Najukkat qimallugu allami misissorneqarnissat imaluunniit nakorsarneqarnissat nakorsamit innersuunneqarsimaguit, angalaneq peqqinnissaqarfimmit akilerneqassaaq.

Ingiallorteqarneq
Nakorsap innersuussineratigut angalanermi ingiallorteqarsinnaavutit. Ingiallortaasoq amerlanertigut peqqinnissaqarfimmi sulisuusarpoq. Peqqinnissaqarfimmi sulisut ingiallortaasinnaanngippata, pisuni immikkut ittuni ilaquttat ilinnut ingiallortaasinnaavoq.

Qanigisat ingiallortigineqartarneri
Najukkat qimallugu allami nakorsartittussanngoruit inuuninnillu navianartorsiorlutit, pissutsit tunngavigalugit atorsaatinneqarpat peqqinnissaqarfiup akiligaanik ilaquttat imaluunniit qanigisat ingiallortaasinnaavoq.

Meeqqat 15-it inorlugit ukiullit angajoqqaamik ataatsimik imaluunniit qanigisaminnik inersimasumik ingiallorteqarsinnaatitaapput.

Ingiallortaasup pisinnaatitaaffii
Ingiallortaasutut peqqinnissaqarfiup akiligaanik nerisaqarnissannut siniffissaqarnissannullu pisinnaatitaaffeqarputit matumani qulequttat marluk tunngavigalugit:
• Napparsimasumut inuunerminik navianartorsiortumut ingiallortaaguit, napparsimasup navianartorsiorunnaarnissaata tungaanut peqqinnissaqarfiup akiligaanik unnuisassaatit.
• Napparsimasumut navianartorsiunngitsumut ingiallortaaguit, utimut aqqut siulliup tungaanut unnuisarnitit peqqinnissaqarfiup akilissavai. Tassa imaappoq angerlamut billetteqalernissavit tungaanut. Sulinermi annaasaqarnersiutit peqqinnissaqarfiup akilertussaanngilai.

Malugiuk
Nakorsarneqarnerit sivisuallaarpat allaat nakorsarfigisannut najukkat allanngorlugu nuuttariaqarlutit, akeqanngitsumik nakorsartillutillu Kalaallit Nunaannut angalanerit akilerneqarsinnaavoq.

Meeraqaruit ataaseq inorlugit ukioqartunik, ilaginissaannut pisinnaatitaaffeqarputit.

Aamma takuuk www.peqqik.gl

Allaaserisat attuumassutillit

Peqqissutsimut Naalakkersuisoqarfik
Imaneq 1A - 401
Postboks 1160
3900 Nuuk

Oqarasuaat: (+299) 34 50 00
Fax: (+299) 34 55 05
E-mail: pn@nanoq.gl
Nittartagaq: www.naalakkersuisut.gl