Peqqinnissaqarfik – Sullinneqarnermi naammagittaalliut

Peqqinnissaqarfik – Sullinneqarnermi naammagittaalliut 

Sullinneqarnerpit pitsaassusia pillugu naammagittaalliuuteqarsinnaavutit, matumani Peqqinnissaqarfiup sullissinera naammagittaalliuuteqarnermi pineqarpat:
  • Sulisut pissusilersornerat
  • Ininut tunngasut
  • Nakorsiartarfiup ammasarfii
  • Utaqqisarnerup sivisussusaa

Oqaloqateqarneq
Naammagittaalliuteqannginninni isumaliutigisariaqarpat sumiiffimmi pisimasoq sulisut peqatigalugit eqqartoqqaarusunnerlugu. Pisinnaatitaaffigaat sulisunik imaluunniit najukkanni pisortaasoq nammineerlutit oqaloqatiginerisigut misigisimasatit saqqummiunnissaanut. Tamanna amerlasuutigut pisimasup sukkasuumik piaartumillu nassuiarneqarnissaanut aqqutissaasinnaavoq. Sulisut suliamut qanoq isumaqarnertik paatsooqatigiissinnaanerillu pillugit saqqummiussisinnaassagunik nuannaarutigisussaavaat.

Oqaloqatigiinneq amerlanertigut peqqinnissaqarfimmi sulisut ilinnik passussisimasut peqatigalugit pisassaaq, taamaaliortoqarneratigullu passuneqarnerpit nammineerlutit qanoq misigisimanerlugu saqqummiunnissaanut periarfissaqassaatit. Imaassinnaavoq paasisimanngisannut apeqqutissaqartutit. Aamma imaassinnaavoq sooq taamak iliorsimanerannut nassuiaanneqarnissamik pisariaqartitsisutit.

Napparsimasunut amerlasuunut oqaloqateqarneq misigisimasamik iluaatsumik unitsitsisinnaavoq.

Oqaloqateqarnissamut akuersiguit imaanngilaq naammagittaalliuteqarnissannut naaggaartutit. Oqaloqateqarnerup kingorna naammagittaalliuteqarnissat kissaatigigukku soorunami pisinnaatitaaffigaat. Kingusinnerusukkut naammagittaalliuteqassaguit naammagittaalliutip qanoq inernilerneqarnissaanut oqaloqateqarsimanerit sunniuteqarnavianngilaq.


Piffissaliussaq
Pisup pinerata kingornatigut sapinngisamik piaarnerpaamik naammagittaalliuut tunniuttariaqassavat.

Tamanna pingaaruteqarpoq naammagittaalliuutip peqqissaartumik misissorneqarnissaa qularnaarumallugu. Pisoq qangangaatsiarli pisimappat sulisut pisumi peqataasut pisoq eqqaamasaqarfigiuminaatsissinnaavaat imaluunniit allamik suliffittaarsimassapput, taamaattumik naammagittaalliuut malinnaaffigiuminaatsissavaat.


Naammagittaalliummik tunniussineq
Naammagittaalliuutit suliarineqassappat paasissutissat makku pisariaqartinneqassapput:
  • Atit aamma sumi najugaqarnerit, inuttullu normut (cpr.-nummer)
  • Oqarasuaatip normua aamma/imaluunniit e-mail
  • Naammagittaalliuutigerusutamik allaaserinninneq
  • Pisoq sumi qangalu pisimanersoq

Sulisut pisumi peqataasut aqqi eqqaamasinnaagukkit, pisup ingerlanerata nassuiarneqarnissaanut taakku iluaqutaalluassapput.

Naammagittaalliuut uunga nassiutissavat:

Peqqinnissaqarfimmik aqutsisoqarfik
Postboks 1001
3900 Nuuk
Oqarasuaat: 34 40 00
Telefax: 34 43 33
Mail: sundhedsledelsen@peqqik.gl


Allat sinnerlugit naammagittaalliuteqarneq
Angajoqqaat meeqqatik 18-it inorlugit ukioqarsimappata sinnerlugit naammagittaalliuteqarsinnaapput. Nakkutiginnittut inuk pineqartoq sinnerlugu naammagittaalliuuteqarsinnaapput.

Alla sinnerlugu naammagittaalliuuteqassaguit pisinnaatitsissummik atsiorneqarsimasumik ilanngussissaatit. Tamanna aamma atuuppoq qaniginerpaasat suli inuusut pineqartillugit, assersuutigalugu angajoqqaat, qitornat inersimasut, aapparisaq imaluunniit inooqatigisaq.

Tamanna pissuteqarpoq naammagittaalliuummik suliaq tamatigut inummut namminermut aamma allanut oqaatigeqqusaanngitsunik imaqartarmat, pineqartorlu akuersisimatinnagu peqqinnissaqarfik oqaaseqarsinnaatitaasarani.


Nakorsartittup naammagittaalliuutaa
Isumaqaruit peqqinnissaqarfimmit peqqinnissamut tunngasutigut sullinneqarninnut atatillugu kukkusoqarsimasoq, taava naammagittaalliornissamut periarfissaqarputit.

Paasisaqarnerorusukkuit allaaserisaq takuuk: Peqqinnissaqarfik – Nakorsartittup naammagittaalliuutaa.

Takusinnaavattaaq www.peqqik.gl 

Allaaserisat attuumassutillit

Peqqissutsimut Naalakkersuisoqarfik
Imaneq 1A - 401
Postboks 1160
3900 Nuuk

Oqarasuaat: (+299) 34 50 00
Fax: (+299) 34 55 05
E-mail: pn@nanoq.gl
Nittartagaq: www.naalakkersuisut.gl