Annertuumik innarluuteqarneq – Saniatigut aningaasartuutit annertuut

Annertuumik innarluuteqarneq – Saniatigut aningaasartuutit annertuut 

Inuit annertuumik innarluutilllit sapinngisamik annertunerpaamik nalinginnaasumik inuuneqarnissamik peqartussaapput. Tamanna ilaatigut inummut, taama innarluuteqarpat innarluuteqanngippalluunniit,– ajortumik ajunngitsumilluunniit – aningaasaqarnikkut sukkulluunniit sunniuteqartussaanngilaq. Annertuumik innarluuteqaruit inuit allat assigalugit nalinginnaasumik inuuniarnikkut aningaasartuutit nammineerlutit akiligassaraatit. Taamaattoq innarluutillit pillugit peqqussummut ilaaguit, innarluutinnut toqqaannartumik attuumassuteqartumik aningaasartuutigisannut taarsiiffigineqarnissamik qinnuteqarnissamut periarfissaqarputit.


Saniatigut aningaasartuutit taakku innarluutinnut toqqaannartumik attuumassuteqartut tamakkiisuusumik ilaannakuusumilluunniit matussusertissinnaavatit. Tassaasinnaavoq ukununnga:

  • Angerlarsimaffimmi pequtinik allanillu pigisanik immikkut ittumik atorfissaqartitannik aamma tunisassianik akisuugajuttunik pisinermut
  • Atisanik kamippannillu pisinermut, innarluutit peqqutigalugu sukkasuumik aseroriartortartunut
  • Errorsinermut immikkut aningaasartuutinut
  • Paaqqutarinninnermut aamma eqqiluisaarnermut atortunik peqqissaaveqarfiup tunniussinnaanngisaanut soorlu nangernik aamma qorfinnik pisinermut


Piumasaqaatit

Tapiiffigineqarnissamik taamaallaat qinnuteqarsinnaavutit

  • saniatigut aningaasartuutinut annertuunut
  • innarluutinnut toqqaannartumik attuumassuteqartunut
  • aamma innarluutillit pillugit peqqussummut ilaaguit


Saniatigut aningaasartuutinut annertuunut tamakkiisuusumik ilaannakuusumilluunniit taamaallaat tapiiffigineqarsinnaavutit. Tamatuma kingunerisaanik tapiiffigineqarsinnaavutit taamaallaat:

  • Aningaasartuutaasoq 500 kr.-it sinnersimappagit
  • Aningaasartuutit minnerusut amerlasuut ataatsimoortillugit qinnutigineranni katillugit 500 kr.-it sinnersimappassuk
  • Ingerlaavartumik aningaasartuutit arlallit ataatsimoortillugit qinnutigineranni 500 kr.-it sinnersimappassuk


Assersuut

Kamippaat ukiorsiutit piffissap ingerlanerani taarsernissaat nalinginnaasuuvoq; assersuutigalugu ukiut aappassaat nalleraangat. Innarluuteqarnerit patsisaalluni kamippatit assut aserujappata taamaattumillu nutaanik akuttunngitsumik kamippattaartariaqartarlutit, kamippannut atorfissaqartitannut immikkut aningaasartuutitit matussusertissinnaavatit. Tassa imaappoq – inuit allat assigalugit – kamippatit ukiut marluk qaangiunneri tamaasa nammineq akilertassavatit.

Meeqqat alliartorluartut nalinginnaasumik ukiut tamaasa kamippattaartussaapput. Taamaammat tamanna saniatigut aningaasartuutitut isigineqanngilaq, naak kamippannik nutaanik akuttunngitsumik pisineq pineqaraluartoq.


Qinnuteqarneq

Saniatigut aningaasartuutinnut tapiiffigineqarnissamik qinnuteqarniaruit qinnuteqaammik suliaqassaatit. Qinnuteqaat makkuninnga imaqassaaq:

  • Innarluutigisat pillugu nassuiaat
  • Tapiissutit sumut atorneqarnissaannut tunngavilersuut
  • Sooq tapiiffigineqarnissamik qinnuteqarnerlutit tunngavilersuut


Qinnuteqaat kommunimut nassiulluguluunniit tunniussinnaavat.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl