Annertuumik innarluuteqarneq – Tapersersortit

Annertuumik innarluuteqarneq – Tapersersortit 

Inunnut annertuumik innarluutilinnut ulluinnarni suliassat mikisualuit suliarissallugit ajornarluinnangajassinnaavoq. Assersuutigalugu perusuersartarfiliarneq aamma nerisassiorneq unammilligassaasinnaapput piuminaalluinnartut. Taamaammat annertuumik innarluuteqaruit sapaatip akunneranut akunnerni arlalinni ikiorneqarnissamut tapersersorteqalernissamik kommunimut qinnuteqarsinnaavutit.

Tapersersortip suliassaraa timikkut aamma inuttut atukkatigut ineriartornissannut tapersersussallutit. Tamatuma kingunerisaanik tapersersortip perorsaanikkut tapersersussavaatit ima iliornermigut

  • ulluinnarni suliassannik isumagineranni ikiorlutit
  • imaluunniit ulluinnarni isumagisassavit qanoq ilillutit isumaginissaannut ilitsersorlutit


Iliuusissatut pilersaarut
Tapersersortit, sulianik suliarinnittartut aamma sulianik ilisimasalik peqatigalugu iliuusissatut pilersaarut suliarissavat. Iliuusissatut pilersaarummi tapersersortip suliassaani anguniakkat, atortut atorneqartut aamma piffissap sivisussusissaa nassuiarneqarsimassapput.

Iliuusissatut pilersaarut ingerlaavartumik nalilersorneqartassaaq iluarsiiffigineqartassallunilu, taamaalilluni pisariaqartitannut tamatigut naleqquttuuniassammat.


Tapersersorti
Tapersersortip suliassai perorsaanermut tunngassuteqartuupput. Taamaammat tapersersorti sapinngisamik

  • inunnik perorsaanermik ilinniagaqarsimasuussaaq
  • imaluunniit inunnik perorsaanermik tunuliaqartuussaaq


Tapersertorti inuk taamak ittoq nassaassaanngippat, tapersersortitut ilitsersorneqarsimasumit inummit atuuffik taanna isumagineqassaaq.

Tapersersorti kommunimit atorfinitsitaasarpoq.


Malugiuk
Tapersersortimik pissarsisinnaavutit ukunani najugaqaraluaruilluunniit

  • nammineq inissiarisami
  • ataatsimoortumik najugaqarfimmi
  • imaluunniit najugaqatigiiffimmi illersugaasumi


Qinnuteqarneq
Tapersersorteqalernissat qinnuteqaatiginiarukku sulianik suliarinnittartut saaffigissavat. Sulianik suliarinnittartoq

  • tapersersortimik pissarsisinnaanersutit misissorlugu ikiuussinnaavoq
  • aamma qinnuteqaammik suliaqarnermi ikiuussinnaalluni


Qinnuteqaatit kommunimut nassiulluguluunniit tunniussinnaavat.

Qinnuteqaammut ilanngutissavatit:

  • nakorsap oqaaseqaataata nuutinnera
  • paasissutaasinnaasut allat, ikiorsiinerup qanoq ittup pitsaanerpaasinnaaneranik takussusiisinnaasut


Paasissutissat taakku tunngavigalugit kommunimi nalilersuinermik ataatsimiititaliaq naliliillunilu aalajangiissaaq

  • tapersersortimik pissarsisinnaanersutit
  • aamma akunnerni qanoq amerlatigisut tapersersorteqarsinnaanersutit

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl