Saniatigut aningaasartuutinut annertuunut tapiiffigineqarneq

Nalinginnaasumik paasissutissiineq 

Annertuumik innarluuteqaruit inuit allat assigalugit nalinginnaasumik inuuniarnikkut aningaasartuutit nammineerlutit akiligassaraatit. Inuit innarluutillit peqqussutaat naapertorlugu kiffartuunneqaruit, saniatigut aningaasartuutinut annertuunut toqqaannartumik innarluutinnut attuumassuteqartunut tamakkiisumik imaluunniit ilaannakortumik tapiiffigineqarnissamut qinnuteqarsinnaavutit.

Assersuutigalugu makkununngaasinnaavoq:
• Pequtinik atortunillu angerlarsimaffimmi pequtitut atugassanik allanik pissarsineq, tassa nioqqutinik immikkut ittunik amerlasuutigullu akisuunik pisariaqartitsiguit
• Atisanik kamippannillu/skuunillu pissarsineq, tassa innarluuteqarnerit peqqutaalluni nungullapallattarpata
• Errorsinissamut saniatigut aningaasartuuteqartaruit
• Paaqqutarineqarnermut eqqiluisaarnermullu atortunik peqqinnissaqarfimmit tunniunneqarneq ajortunik pissarsinissaq, assersuutigalugu nangit aamma qorfiit

 

Piumasaqaatit 

Saniatigut aningaasartuuteqartarnermut tamakkiisumik imaluunniit ilaannakortumik tapiiffigitinnissamut qinnuteqarniaruit illit:
• Saniatigut aningaasartuutigisartakkatit toqqaannartumik innarluutinnut attuumassuteqassapput
• Inuit innarluutillit peqqussutaat naapertorlugu kiffartuunneqartuussaatit

Saniatigut aningaasartuutigisannut tapiiffigitissinnaavutit imaattoqassappt:
• Aningaasartuutigisatit 500 koruunit sinnerpagit
• Aningaasartuutit annikitsut arlaliusulli qinnuteqarnermi ataatsimut 500 koruunit sinnerpagit
• Aningaasartuutit ataavartut arlallit qinnuteqarnermi ataatsimut 500 koruunit sinnerpagit

Assersuut
Ukiukkut kamippaat oqortut taarsertariaqartarneri nalinginnaasuuvoq, assersuutigalugu ukioq allortarlugu. Illit innarluuteqaruit innarluutillu peqqutaalluni kamippatit nungullapallattarlutik taamaammallu taarsikulasariaqartarlutik, kamippannut pisariaqartitannut aningaasartuutitit matussusertissinnaavatit. Illit nammineerlutit ukioq allortarlugu kamippaat pisiarineri akilertassavatit – allat assigalugit.

Meeqqat alliartupallattut ukiut tamaasa kamippattaartartussaapput. Taamaattumik saniatigut aningaasartuutaasutut taaneqarsinnaanngilaq, aamma naak kamippaat taarsikulasaraluarpata.

 

Qinnuteqarneq 

Saniatigut aningaasartuutinut tapiiffigineqarnissamut qinnuteqarniaruit, qinnuteqaasiussaatit. Qinnuteqaallu makkuninnga imaqassaaq:
• Annertuumik innarluutit pillugu nassuiaat
• Suna pillugu tapiiffigitinnissamut nassuiaat
• Tapiiffigitinnissamut sooq qinnuteqarninnut tunngavilersuut

Qinnuteqaatit kommunimut nassiutissavat imaluunniit tunniutissavat.

 

Allaaserisat attuumassutillit

Isumaginninnermut, Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iian@nanoq.gl
Nittartagaq: www.naalakkersuisut.gl