Oqilisaassineq

Nalinginnaasumik paasissutissiineq 

Inunnut annertuumik innarluuteqartunut ilaannut ulluinnarni suliassat annikitsuinnaat ilaatigut ajornakusoorluinnarsinnaasarput. Taamaattumik ilaqutaasa saniatigut isumassortarpaat imaluunniit paaqqutarisarpaat. Tamannalu ilaqutaasunut assut artornarsinnaasarpoq. Taamaattumik inummut innarluuteqartumut angajoqqaajusut aamma inooqataasut piffissap ilaani oqilisaanneqarnissaminnut pisariaqartitsisarput.

Oqilisaassineq ima paasineqassaaq, inuk innarluutilik piffissami sivikinnerusumi imaluunniit sivisunerusumi angerlarsimaffimi avataani paarineqassaaq. Taamaalillutik inummut innarluuteqartuusumut qanigisaasut paaqqutarinninnermit unikkallalaassapput. Oqilisaassineq tassaasinnaavoq:
• Ataasiaannartumik pisussaq
• Aalajangersimasumik aaqqiissut, assersuutigalugu innarluuteqartuusoq angerlarsimaffiup avataani akunnerup naaneri tamaasa paarineqartarluni

Oqilisaassineq angerlarsimaffimmi oqilisaassisartuni imaluunniit ulloq unnuarlu angerlarsimaffimmi pisinnaavoq.

 

Piumasaqaatit 

Oqilisaanneqarnissamut qinnuteqarniaruit piumasaqaataasut tullinnguuttut illit naammassisimasariaqakkatit tassaapput:
• Inuk innarluutilik inuit innarluutillit pillugit peqqussutaat malillugu kiffartuunneqartuussaaq
• Inuk innarluuteqartoq ulluinnarni paaqqutarisarisuussavat
• Inuk innarluuteqartoq najugaqatigissavat

 

Qinnuteqarneq 

Oqilisaanneqarnissamut qinnuteqarniaruit inuup innarluuteqartup sullissisuanut saaffiginnissaatit. Oqilisaanneqarnissamut aamma qinnuteqaasiornissamut kommunimut nassiussassamik imaluunniit tunniussassamik sullissisoq ilinnik ikiuussinnaavoq.

Qinnuteqaammut ilanngutissavatit:
• Nakorsap oqaaseqaataata assilinera
• Paasissutissat allat qanoq pitsaanerusumik oqilisaanneqarnissannut naleqqunnerusunik nassuiaatitaqartut

Paasissutissat tamakku tunngavigalugit oqilisaanneqarsinnaanersusi aamma qanoq sivisutigisumik oqilisaanneqarsinnaanersusi kommunimi innersuussinermut ataatsimiititaliap nalilerlugulu aalajangissavaa.

 

Allaaserisat attuumassutillit

Isumaginninnermut, Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iian@nanoq.gl
Nittartagaq: www.naalakkersuisut.gl