Feeriarluni angalanerit

Nalinginnaasumik paasissutissiineq 

Illit annertuumik innarluuteqartuullutit kommunerisavit avataanut inissinneqarsimallutit, angerlamut tikeraarnissamut qinnuteqarnissaq periarfissariavat.

Aningaasaliiffigitinnermi makku matussuserneqartussaapput:
• Illoqarfigisamut imaluunniit nunaqarfigisamut billettimut aningaasartuutit
• Unnuinermi aningaasartuutit, feeriarninni ilaquttanni najugaqanngikkuit

Pisut ilaanni aamma angalanermi ingiallortivit angalanerata aningaasartuutai kisimiillutit angalasinnaanngikkuit matussusertissinnaavatit.

Illit nammineerlutit feeriarlutit angalasinnaanngikkuit, qanigisavit tikeraarnissannut qanigisavit angalanermini aningaasartuutai matussusertissinnaavatit.

 

Piumasaaqatit 

Feeriarluni angalanissamut aningaasaliiffigitinnissamut qinnuteqarsinnaavutit taamaallaat illit:
• Kommunerisavit avataanut inissinneqarsimaguit, assersuutigalugu ulloq unnuarlu angerlarsimaffik, najugaqatigiiffik imaluunniit nakkutigisaasumik najugaqarfik
• Inuit innarluutillit pillugit peqqussutaat malillugu kiffartuunneqaruit

18-it sinnerlugit ukioqaruit illoqarfigisannut ukiumut ataasiarlutit feeriarlutit angalanissamut pisinnaatitaaffeqarputit – aamma angalanermi ingiallorteqarsinnaavutit. Tamatuma saniatigut ukiut pingasukkaarlugit feeriarlutit angalanermi ingiallorteqarlutit aningaasaliiffigitittarsinnaavutit, tassa angalanermut unnuinermullu aningaasartuutit nammineerlutit akilissagukkit.

18-it inorlugit ukioqaruit illoqarfigisannut ukiumut marloriarlutit feeriarlutit angalanissamut aningaasaliiffigitissinnaavutit – aamma angalanermi ingiallorteqarsinnaavutit. Tamatuma saniatigut ukiut tamaasa ingiallorteqarlutit aningaasaliiffigitittarsinnaavutit, tassa angalanermut unnuinermullu aningaasartuutit nammineerlutit akilissagukkit.

 

Angalanermi ingiallorti 

Allamit ikiorneqarlutit taamaallaat angalasinnaaguit, angalanermi ingiallortaasup angalanerminut aningaasartuutaasa matussusertinnissaannut qinnuteqarsinnaavutit.

Ingiallortaasup matussusertissinnaasai tassaasinnaapput:
• Billettimut aningaasartuutit
• Unnuinermut aningaasartuutit
• Ullormusiat aamma ingiallortigisat qanigisarinngikkukku sulinermini akissarsiassatut annaasaqaatai

 

Tikeraarneqarneq 

Feeriarlutit nammineerlutit angalallutit ornigussinnaanngikkuit, qanigisavit tikeraarnissannut angalanermut aningaasartuutai matussusertissinnaavatit.

Aamma assersuutigalugu inuuissiortussanngoruit, apersortittussanngoruit imaluunniit katittussanngoruit tikeraarneqarsinnaavutit. Tamannali taamaallaat pisinnaavoq feeriarnissamut angalanissat tikeraarnermit taarsertereersimanngikkukku.

 

Qinnuteqarneq 

Angalanermi ingiallorteqarnissamut imaluunniit tikeraarneqarnissamut qinnuteqarniaruit, sullissisunnut saaffiginnissuteqassaatit. Sullissisup periarfissanik misissuinermik ikiorsinnaavaatit, aamma qinnuteqaasiornissamut kommunimut nassiussassannik imaluunniit tunniussassannik ikiorsinnaavaatit.

Qinnuteqaatit minnerpaamik makkuninnga imaqartinneqassaaq:
• Angalanissamut aningaasartuutinut uppernarsaat
• Angalanissamut pilersaarut
• Iluaqusersuutit assartornissaannut aningaasartuutinut uppernarsaat
• Unnuinissamut saniatigullu angalanermut aningaasartuutinut uppernarsaat
• Ingiallorteqassaguit ingiallortivit aqqa
• Ingiallortigisassatut toqqakkat sooq ilaatikkusunnerlugu tunngavilersuut

 

Isumaginninnermut, Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iian@nanoq.gl
Nittartagaq: www.naalakkersuisut.gl