Siusinaartumik sulisinnaajunnaarnersiutisiat

Nalinginnaasumik paasissutissiineq 

Siusinaartumik sulisinnaajunnaarnersiutisiat pisortanit ikiorsiissutaapput, arlaatigut sulisinnaassuseq killeqalersimappat qinnuteqaatigineqarsinnaasut.

Ulloq 1. juli 2016 siusinaartumik sulisinnaajunnaarnersiuteqartitsineq pillugu inatsit nutaat atuutilerpoq.

Siusinaartumik sulisinnaajunnaarnersiutisiaqareeruit, arlaatigut eqqorneqartussaavutit.

Maleruagassat allannguutaat tassaapput kikkut siusinaartumik sulisinnaajunnaarnersiutisiassanik qanorlu annertutigisumik pisartagaqarsinnaanerinut tunngassuteqarput.

Sulisinnaassusermik nalilersuineq 

Siusinaartumik sulisinnaajunnaarnersiutisiaqalersimaguit 60-illu inorlugit ukioqarlutit, ukiut 5-it ingerlanerini (periarfissaq siulleq 1. juli 2016-miit) sulisinnaassutsit pillugu nalilersuiffigineqassaatit, nalilerneqassalluni ilumut siusinaartumik sulisinnaajunnaarnersiutisiassanik pisartagaqaannassanersutit.
Siusinaartumik sulisinnaajunnaarnersiutisiassanik arsaarneqarsinnaanngilatit, sulisinnaassutsit nalilersorneqaqqaartinnagu.

Sulisinnaassuseqarnersutit naliliinermi aalajangiisuussaaq ilumut siusinaartumik sulisinnaajunnaarnersiutisiaqassanersutit qanorlu annertutigisumik pisartagaqassanersutit.

Sulisinnaassuseq
Sulisinnaassuseq paasineqassaaq qanoq annertutigisumik sulisinnaanerit nalilersorneqassasoq.
Tamatumalu kinguneraa annertunerusumik sulisinnaassuseqartillutit siusinaartumik sulisinnaajunnaarnersiutisiat pisartakkatit annertussusaat appariaallanneqartassasut. Sulisinnaassutsivit annertunera peqqutaalluni.

Sulisinnaassutsit appasittutut nalilerneqarsimappat, taava pisartakkatit annerpaat imaluunniit akunnattumik inissisimasut pissarsiarisassavatit – ataani allaqqasut takukkit.

Sulisinnaassutsit qaffasissutut nalilerneqarsimappat, taava pisartakkatit unitsinneqarsinnaapput, imaluunniit appasinnerpaami inissiisoqarsinnaalluni – ataani allaqqasut takukkit.

Sulisinnaassutsit procentinngorlugit naatsorsorneqartassapput (100% = tamakkiisumik sulisinnaassuseqarneq).
  • 0-25 % = siusinaartumik sulisinnaajunnaarnersiutisiassat qaffasinnerpaat
  • 26-50 % = akunnattumik siusinaartumik sulisinnaajunnaarnersiutisiassat
  • 51-75 % = siusinaartumik sulisinnaajunnaarnersiutisiassat appasinnerpaat
  • 76-100 % = siusinaartumik sulisinnaajunnaarnersiutisiaqartoqassanngilaq

Kommunerisavit sulisinnaassutsit qanoq inissisimanersoq nalilersuiffigissavaa.

Qulaajaanermut tunngatillugu imaluunniit sulisinnaassuseq pillugu ingerlatsisoqareerneratigut sulisinnaassuseq naliliiffigineqartassaaq.

Siusinaartumik sulisinnaajunnaarnersiutisiat kommunerisamit aqunneqarlutillu tunniunneqartassapput.

Piumasaqaatit 

Siusinaartumik sulisinnaajunnaarnersiutisiaqassaguit, taava:
  • Ataavartumik timikkut tarnikkullu nappaateqarnerit pissutigalugu sulisinnaassutsit appasissaaq
  • 18-it 65-illu akornanni ukioqassaatit (1. januar 2017-miit 66-it tikillugit ukioqarsimassaatit)
  • Nunatsinni, Danmarkimi Savalimmiuniluunniit ukiut pingasut najugaqareersimassaatit
  • Aalajangersimasumik nunatsinni imaluunniit nunani avannarlerni taamatullu nunani EØS-mi (Europæisk Økonomisk Samarbejdsområde) isumaqatigiissuteqarfiusuni najugaqartuusimassaatit

Tamatuma saniatigut imaluunniit/aamma
  • danskisut innuttaaqataanermut akuerineqarsimassaatit
  • Nunani Avannarlerni Isumaginninnikkut Sillimmasiisarnermut aaqqissuussinermi ilaasimassallutit
  • Imaluunniit qinnuteqannginninni minnerpaamik ukiuni pingasuni nunatsinni aalajangersimasumik najugaqareersimassallutit

Saniatigut sulisinnaassutsit pillugu nalilersuiffigineqarsimassaatit.

Sulisinnaajunnaarnersiutisiap annertussusaa 

Siusinaartumik sulisinnaajunnaarnersiutisiat pingasoqiusanngorlugit imatut agguagaapput (1. juli 2016-miit atuutilersumik siusinaartumik sulisinnaajunnaarnersiutisialinnut kisermaanut katissimasunullu).
  • Ukiumut pisartagaq annerpaaq: kr. 110.664.
  • Ukiumut pisartagaq akunnattoq: kr. 73.776.
  • Ukiumut pisartagaq minnerpaaq: kr. 55.332.

Sulisinnaassutsivit nalilersuiffigineqarneratigut aalajangiiffiussaaq, pisartakkatit qaffasinnerpaassanersut, akunnattut imaluunniit appasinnerpaat pisartagarissaneritit.

Tamatuma saniatigut assigiinngitsunik tapisiaqarsinnaavutit. Tapisiat pillugit paasisaqarnerorusukkuit kommunerisat paasiniaavigisinnaavat, tapisiallu pineqartut ilinnut pisartagaritinneqarsinnaanersut.

Siusinaartumik sulisinnaajunnaarnersiutisiat appartinneqassapput, illit aappaqarsimaguillu aapparisavit isertitassi katinnerini aningaasat aalajangersimasut sinnerpatigit. Tamatumanili pineqanngillat pisortanit pensionit imaluunnit Nunani Avannarlerni Isumaginninnikkut Sillimmatit pillugit pensionisiat.

Ilanngaasarnerni killigititat assigiinngissitaartuupput, tamatumani apeqqutaatillugu siusinaartumik sulisinnaajunnaarnersiutisiat qaffasinnerpaat, akunnattut imaluunniit appasinnerpaat pisartagarineqarnersut.

Naammagittaalliuuteqarneq 

Kommunip aalajangiinera Isumaginninnikkut Naammagittaalliuteqartarfimmut ingerlateqqinneqarsinnaapput.

Isumaginninnermi Naammagittaalliuteqartarfimmut imatut maalaaruteqassaatit

Kommunip sulisinnaassutsinnut tunngatillugu nalilersuisimaneranik (sulisinnaassutsip procentilersornera pillugu) naammaginngikkukku, Siusinaartumik Sulisinnaajunnaarnersiutisiat pillugit Naammagittaalliuteqartarfimmut maalaaruteqassallutit periarfissaqarputit.

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl