Meeqqat inuusuttullu ikiortariallit – Pinngitsaaliissummik inissiineq

Meeqqat inuusuttullu ikiortariallit – Pinngitsaaliissummik inissiineq 

Angajoqqaat meeqqaminnik paarsinissamut pisinnaatitaaffeqarlutillu pisussaaffeqarput, assersuutigalugu isumassorlugu, nerisillugu, nakorsamit passunneqartillugu aamma persuttaanermut kiisalu kinguaassiutitigut atornerlunneqarnissamut illersorlugu. Angajoqqaatut isumagisassatik angajoqqaat isumagisinnaanagilluunniit isumagiumanngippatigit imaluunniit angajoqqaat meeqqamik ineriartornissaa ulorianartorsiortoq nalilersinnaanngippassuk, meeraq illersorumallugu kommune akuliunnissaminut pisussaatitaavoq. Tamatuma kingunerisaanik, pisuni immikkut ittuni angajoqqaat akuersiseqqaarnagit misissuinissaq aamma ikiorsiilluni iliuutsit kommunip aallartisissinnaavai.

Assersuutigalugu tassaasinnaavoq meeqqamik angerlarsimaffiup avataanut inissiineq imaluunniit angajoqqaat akuersiseqqaarnagit suliffeqarfittut paaqqinnittarfiup meeqqamik misissuinera.


Piumasaqaatit
Angajoqqaat akuersiseqqaarnagit kommune iliuuseqarniaruni, meeqqap inuusuttulluunniit ineriartornera inuttulluunniit atugai ulorianartorsiortinneqassapput. Tamanna ima paasisariaqarpoq, kommune pinngitsaaliinermik iliuuseqarsinnaavoq, ima pisoqarpat:

  • Angajoqqaat meeqqamut naammaginartumik paaqqutarinninngippata
  • Meeraq persuttarneqarsimappat imaluunniit kinguaassiutitigut atornerlunneqarsimappat
  • Meeraq pinerluttarpat, atornerluinermik ajornartorsiuteqarpat imaluunniit inuit akornanniinnermi allanik sakkortuunik ajornartorsiuteqarpat
  • Meeraq sakkortuunik pissusilersortarnermigut imaluunniit naleqqussarsinnaanerminik ajornartorsiuteqarpat


Illersuisoq iliuusissatullu pilersaarut
Meeqqap imaluunniit inuusuttup angajoqqaat akuersiseqqaarnagit angerlarsimaffiup avataanut inissinneqarnissaa pisariaqartoq inunnut isumaginninnermut ataatsimiititaliap nalilerpagu, inissiinermut patsisaasunut paasissutissanut tunngatillugu angajoqqaat imaluunniit meeqqap 15-it sinnerlugit ukiullip, illersuisup oqaaseqarnissaat kommunip neqeroorutigissavaa. Tamanna ima isumaqarpoq, inissiinissaq pillugu aalajangiinermut uppernarsaatit pingaaruteqartut tamaasa angajoqqaatut oqartussaassuseqartup takusinnaavai. Assersuutigalugu tassaasinnaapput, nalunaarutiginninnerit, ulluunerani paaqqinnittarfimmit oqaaseqaatit aamma misissuinermi nalunaarusiat.

Angajoqqaatut oqartussaassuseqartoq aamma meeraq inuttut siunnersorteqarnissamut pisinnaatitaaffeqarput, pisut ingerlaqqinneranni angajoqqaanut meeqqamullu tapersersuisinnaasumik. Meeqqap inissinneqarnissaa sioqqullugu, tassanngaannartumik inissiisoqarsimanngippat, iliuusissatut pilersaarummik suliaqartoqaqqaassaaq.

Tassanngaannartumik meeraq kommunimit inissinneqarpat, aalajangiinerup kingorna kingusinnerpaamik akunnerit 24-it qaangiunnerini angajoqqaatut oqartussaassusilik tamanna pillugu ilisimatinneqassaaq.

Kommunip isumagissavaa:

  • Suliami paasissutissat pillugit angajoqqaatut oqartussaassuseqartup oqaaseqarnissaanut periarfissiineq
  • Suliaq pillugu paasinneriaaseq pillugu meeqqat qulinik ukiulinniit aamma inuusuttut oqaluttuarnissamut periarfissiineq
  • Inuttut siunnersorteqarsinnaanermut (illersuisoq) pisinnaatitaaffeqarneq pillugu angajoqqaatut oqartussaassuseqartumut ilisimatitsineq aamma meeqqap inissinneqarnerata kingorna kingusinnerpaamik ullut 14-it qaangiunneranni iliuusissatut pilersaarummik suliaqarneq


Naammagittaalliuuteqarneq
Aalajangiinerup allaganngukkap tunngavilersorneqarlunilu naammagittaalliuteqarnissamut ilitsersuummik ilaqartup pissarsiarinissaanut angajoqqaatut oqartussaassuseqartoq pissarsinissamut pisinnaatitaaffeqarpoq. Kommunip aalajangiinera pillugu naammagittaalliuteqarnissaq kissaatigigukku, Isumaginninnermi Naammagittaalliuteqartarfimmut naammagittaalliussaatit. Allaaserisat attuumassutillit ataanni sukumiinerusumik Isumaginninnermi Naammagittaalliuteqartarfimmut qanoq naammagittaalliuteqassanersutit atuarsinnaavat.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl