Meeqqat inuusuttullu ikiortariallit – Ikiorsiinermik suliniutit ataatsimut isigalugit

Meeqqat inuusuttullu ikiortariallit – Ikiorsiinermik suliniutit ataatsimut isigalugit 

Ikiorsiinermik suliniutit tassaapput, kommunip meeqqamut inuusuttumullu immikkut ittumik pisariaqartitalimmut tunniussinnaasai. Ikiorsiineq ilaqutariinnut tamanut imaluunniit meeqqamut inuusuttumulluunniit inuttut toqqaannartumik sammititamik atuutsinneqarsinnaavoq.

Meeqqap illersorneqarnissaa inuttullu atugai, kommunip ikiorsiinerani aallaavigineqartarput. Meeqqap illersorneqarnissaani pineqarput meeqqap atugarissaarnera, soqutigisai pisariaqartitaalu. Meeqqap assersuutigalugu atorfissaqartissinnaavaa meeqqanik allanik pinnguaqateqarneq aamma inuttut ineriartorsinnaaneq.

Meeqqap inuttut atugaani pineqarput, eqqarsartaatsikkut aamma timikkut peqqissuseqarnera. Meeqqap assersuutigalugu pisariaqartippai nerisassat, sinik, toqqissisimaneq, isumassuineq eqqortunillu atisaqarneq.

Meeraq tamatigut qitiusutut inissinneqartassaaq. Taamaammat meeqqamut pitsaanerpaamik taamalu meeqqap ukiuinut naleqquttumik nalinginnaasumik ineriartornissaa pisinnaaqqullugu, kommune tamatigut taamak iliortussaavoq.

Ilaqutariit akunnerminni suleqatigeeqqilersinnissaat ikiorsiinermi qitiutillugu aallaavigineqartarpoq. Taamaattoq ikiorsiineq ilaqutariittut sinaakkutit avataannut meeqqamik inissiinermik nassataqartoq kommunip toqqarsinnaavaa, taamatuttaaq angajoqqaat piumasaat pinnagu, ikiorsiilluni suliniutit kommunip atulersissinnaavai. Taamak pisoqartarpoq suliani, meeqqap inuttut atugai ulorianartorsiortinneqaraangata.


Ikiorsiinermik suliniutit aalajangersimasut
Ikiorsiinermik suliniutit ilaqutariittut sinaakkutit iluanni atorneqarneqarsinnaasut pigineqarput. Assersuutigalugu makku taaneqarsinnaapput:

  • Inunnut siunnersorti
  • Ulluunerani paaqqinnittarfimmik tassanngaannartumik inissamik tunineqarneq
  • Angerlarsimaffimmi ikiorti
  • Ilaqutariinnut katsorsaaneq
  • Avatangiisinut sullissisoq
  • Tapersersorti
  • Peqqissutsimut tunngasutigut suliniut
  • Tarnip pissusaanik ilisimasalimmit ikiorserneqarneq
  • Suliniuteqareernermi malinnaaneq
  • Aningaasaqarnikkut ikiorserneqarneq


Ikiorsiinermik suliniutit ilaqutariittut sinaakkutit avataanni atorneqarneqarsinnaasut aamma pigineqarput. Assersuutigalugu makku taaneqarsinnaapput:

  • Tassanngaannartumik inissiineq, pinngitsaaliissummik inissiineq aamma Kalaallit Nunaanni avataanilu nammineq piumassutsimik inissinneqarneq
  • Oqilisaanneqarluni najugaqarneq
  • Tarnikkut nappaatillit immikkoortortaannut unitsinneqarneq
  • Paaqqinnittarfimmut sillimaniarnikkut qularnaakkap ammasumik immikkoortortaanut inissinneqarneq
  • Ulloq unnuarlu paaqqinnittarfimmut imaluunniit angajoqqaarsiaagallartunut inissinneqarneq
  • Efterskole-rtinneqarneq


Malugiuk
Allattorneqarsimasut siuliini allassimasut saniatigut ikiorsiinermik suliniutit allat aamma pigineqarput. Tamanna ima isumaqarpoq, illit meeqqat imaluunniit ilissi ilaqutariittut ikiorsiilluni suliniutinik allanik kommunip neqeroorfigisinnaavaasi.

Ikiorsiinermik suliniutit pinngitsaaliinikkut ingerlanneqassasut kommune aalajangiippat, inummik illersuisumik peqarnissamut pisussaatitaaffeqarputit. Inuk illersuisoq tassaasoq, ilinnik ikiuisinnaallunilu siunnersuisinnaasoq. Angajoqqaat aamma inuusuttoq 15-it sinnerlugit ukioqalersimasoq, inummik illersuisumik peqarnissamut pisinnaatitaaffeqarput.

Paasissutissat kommunimit atorneqartut takunissaat pisinnaatitaaffigaat.

Aalajangiineq allaganngugaq, tunngavilersugaallunilu naammagittaalliuuteqarnissamut ilitsersuummik ilaqartoq, pissarsiarissallugu pisinnaatitaaffeqarputit.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl