Angajoqqaat pisinnaatitaaffii pisussaaffiilu

Nalinginnaasumik paasissutissiineq 

Angajoqqaat meeqqami 18-iliinissaasa imaluunniit oqartussaasunngorlutik namminiilersinnaanissaasa tungaannut pilersornissaannut pisinnaatitaallutillu pisussaaffeqarput. Meeqqat assersuutigalugu isumassorneqarnissamut, nerisaqartinneqarnissamut, nakorsamit nakorsarneqarnissamut aamma atuartinneqarnissamut pisariaqartitsipput.

Meeqqat annersaanermut aamma kinguaassiuutitigut kannguttaatsuliorfigitinnernut angajoqqaavisa illersornissaannut pisussaaffeqarput. Angajoqqaat meeqqaminnik isumaginnissinnaanngikkunik imaluunniit isumaginnikkusunngikkunik, kommune ikiuutissaaq.

Matumani illit angajoqqaatut kommunimut ikiortissarsiornissamut sunik periarfissaqarnerlutit takusinnaavat.

Kommune pisut ilaanni isumaqarsinnaasarpoq meeqqat ikiortariaqartoq, naak illit akerlerluinnaanik isumaqaraluartutit. Assersuutigalugu meeqqat angerlarsimaffiup avataanut piffissami sivikitsumi sivisunerusumiluunniit inissinneqarnissaa meeqqavit pisariaqartikkaa kommunimit nalilerneqarsinnaavoq. Taamatullu pisoqassappat, illit immikkut pisinnaatitaaffeqarputit makku eqqarsaatigalugit:
• Pinngitsaaliissummik angerlarsimaffiup avataanut inissiineq
• Tassanngaannartumik angerlarsimaffiup avataanut inissiineq
• Naammagittaalliuteqarneq

 

Imatut ikiortissarsiorsinnaavutit 

Illit angajoqqaatut kommunimut ikiortissarsiornissamut assigiinngitsunik periarfissaqarputit. Makkuusinnaapput assersuutigalugu meeqqavit isumassorneqarnissamut pisariaqartitaata tunniunnissaanut ajornakusoortitsiguit, imaluunniit meeqqat arlaatigut ajornartorsiuteqarsinnaasoq, soorlu atornerluinermut tunngasumik.

Illit assersuutigalugu:
• Meeqqerisumik oqaloqateqarsinnaavutit
• Meeqqerivimmi meeqqavit perorsaasua oqaloqatigisinnaavat
• Atuarfimmi meeqqavit ilinniartitsisua oqaloqatigisinnaavat
• Kommunimi sullissisoq attavigisinnaavat

Kommunimi sulisumik oqaloqateqarneq naammanngippat, illit meeqqallu qanoq ikiorserneqarsinnaanersusi nalilerniarlugu kommune misissuilluni aallartissinnaavoq. Imaassinnaasoq timersorneq meeqqavit pisariaqartikkaa, meeqqerivimmi immikkut ittumik inissamik pisariaqartitsisoq imaluunniit atuarfimmi immikkut tapersersorneqarnissamut pisariaqartitsisoq.

Imaassinnaasoq aamma illit imaluunniit ilissi angajoqqaatut ikiorneqarnissamut pisariaqartitsisusi. Aalakoornartutorpallaarsimagussi imaluunniit meerarsi aqukkuminaatsikkussiuk, ulluinnarni atorsaasumik inuuneqarniassagassi ajornartorsiummik kommune ikiuussinnaavoq.

 

Kommunimi najoqqutarineqartoq 

Kommune najoqqutassaqarpoq makkuninnga qulakkeerinnittussamik:
• Meeqqamik aamma meeqqap pisariaqartitaanik qitiutitsinissamik
• Meeqqap pisinnaatitaaffiinik ataqqinninnissaq
• Iluarsiissuteqarnissaq anguniarlugu inuit meeqqamut attuumassuteqartut ajornanngippat ikiuinissaannik
• Sapinngisamik angajoqqaat pisinnaatitaaffiinik ataqqinninnissamik

Kommune iliuuseqassaaq ima pisoqarpat:
• Meeraq imaluunniit inuusuttoq angajoqqaaminit isumagineqarusunngikkuni
• Angajoqqaat meeqqami isumaginissaanut nukissaqanngikkunik
• Angajoqqaat meerartik annersaasarnernut aamma kinguaassiutitigut kannguttaatsuliornernut illersunngippassuk
• Angajoqqaat meeqqaminnut annersaasarunik imaluunniit kinguaassiutitigut kannguttaatsuliortarunik

 

Pinngitsaaliissummik angerlarsimaffiup avataanut inissiinermi pisinnaatitaaffiit 

Meeqqat angerlarsimaffiup avataanut inissinneqartinnagu pisup qanoq innera ilinnut tunngasoq kommunimit paasiniaaffigineqaqqaassaaq. Aamma isumaginninnermut ataatsimiititaliamut oqaaseqaateqarnissat kommunimit periarfissaqartinneqassaaq.

Malittarisassat nukissaqarfiginiarneri ilaanni ajornakusoorsinnaasarpoq, imaassinnaavorli meeqqassi angerlarsimaffiup avataanut inissinniarneqarnerani kommunip naliliinera eqqarsaatigalugu kommunip ilissinnik sullisseriaasia naammagisimaarissi.

Taamaattumik ilinnik ikiuisinnaasumik illersortissamik peqarnissamut pisinnaatitaavutit. Illersorti tassaavoq ilinnik ikiuisinnaasoq siunnersuisinnaasorlu. Angajoqqaat aamma inuusuttut 15-ileereersimasut illersorteqarnissamut pisinnaatitaaffeqarput. Taamaattoqartillugu meeqqavit ikiornissaanut imaluunniit illit ajornartorsiutivit iluarsiiviginissaannut aallutaqassaatit.

Tamatuma saniatigut paasissutissat kommunimit atorneqartut illit takusinnaatitaavatit.

 

Tassanngaannartumik angerlarsimaffiup avataanut inissiinermi pisinnaatitaaffiit 

Meeqqat kommunimit tassanngaannartumik angerlarsimaffiup avataanut inissinneqarsimappat, pinerata kingorna kingusinnerpaamik 24 tiimit qaangiuppata aalajangiineq ilinnut nalunaarutigineqartussaavoq. Meeqqavit angerlarsimaffiup avataanut inissinneqarneranit kingusinnerpaamik ullut 14-it qaangiuppata meeqqat pillugu kommune iliuusissatut pilersaarusiortussaavoq.

Iliuusissatut pilersaarummi suliaq illit takusinnaatitaavat.

 

Naammagittaalliuteqarnissamut periarfissat 

Aalajangiineq tunngavilersorlugu naammagittaalliuteqarnissamut ilitsersuutitalik allakkatigut ilinnut tunniunneqarnissaanut pisinnaatitaaffeqarputit.

Isumaqaruit kommunip aalajangiinera eqqunngitsoq, naammagittaalliuteqarfiginissaanut pisinnaatitaaffeqarputit.

 

Isumaginninnermut, Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iian@nanoq.gl
Nittartagaq: www.naalakkersuisut.gl