Danmarkimi højskolit

Nalinginnaasumik paasissutissiineq 

Nunatsinni inuit kikkulluunniit ilinniagaqarnissamik periarfissaqartussaapput. Ilinniartitaaneq aqqutigalugu ilisimasanik atorsinnaalluakkannik pissarsiorsinnaavutit, inuunerup sinnerani atorsinnaasannik. Ilinniagaqarsimaguit suliffissatigut periarfissat aamma annertunerussapput. Nunatsinni Nunattalu avataani ilinniagaqarnissamut qinnuteqarsinnaavutit.

Nunatta avataani ilinniagaqarfiit ilaat tassaapput Danmarkimi højskolit. Højskole tassaavoq atuarfik sumulluunniit attuumassuteqarnani nalinginnaasumik atuarfik. Tamannalu ima paasisariaqarpoq aalajangersimasunik sammisanik imaluunniit atuagarsornikkut anguniagassanik peqartoqannginneranik. Matumani nammineq aalajangersinnaavat sammisat sorliit ingerlakkumanerlugit. Taamaammat sulerinissavit paasiniarnerani højskole aallartissutissat ilagisinnaavaat. Sulerinissat nalunngereersimagukku, ilinniagaqarnissamut ingerlaqqinnissamut piareersarfiuvoq pitsaasoq.

Højskolimiinneq qaammatinik arfinilinniit qulit tungaannut sivisussuseqarsinnaavoq aggustillu qaammataata qiteqqunnerani januaarilluunniit aallartinnerani nalinginnaasumik aallartittarluni. Højskolit ilaanni ataasiakkaani oktobarip qaammataata qiteqqunnerani aallartissinnaavutit.

Højskolini periarfissat 

Danmarkimi højskolit inuusuttunut højskolinut aamma nalinginnaasumik højskolinut aggulugaapput:
  • Inuusuttunut højskolit 16-it 19-illu akornanni ukiulinnik atuartuuteqartarput
  • Nalinginnaasumik højskolit 17 ½-it 25-illu akornanni ukiulinnik atuartuuteqartarput

Højskolit amerlasuut ilinniagaqarnissamut piareersaataasumik sammisanik neqerooruteqartarput, taakku ilinniarnermik ingerlatitseqqiinermi assersuutigalugu ilisimatusarfinni imaluunniit inuussutissarsiutitigut ilinniarfinni ilinniartunngornissannut piareersaataasinnaapput.

Ilinniagaqarnissamut piareersaataasumik sammisaqartitsinerup saniatigut højskolinit immikkut aallunneqartartut assersuutigalugu makkuupput:
  • Nipilersorneq
  • Eqqumiitsuliorneq
  • Timersorneq
  • Oqaatsit
  • Peqqissuseq

Danmarkimi højskolit pillugit paasissutissat amerlanerusut højskolit ataatsimut nittartagaanni atuarsinnaavatit.

Piumasaqaatit 

Danmarkimi højskolimi atualerniaraanni:
  • Atuartitsinermut malinnaasinnaassaguit qallunaat oqaasiinik oqalussinnaanissat atuarsinnaanissallu pisariaqarput
  • Atornerluinermik ajornartorsiuteqannginnissat pisariaqarpoq, assersuutigalugu imigassamik aanngajaarniutinilluunniit

Højskolernerpit nalaani atuarfimmi atuaqatit allat najugaqatigisussaavatit. Tamannalu ima paasisariaqarpoq, inuusuttut allat ulloq unnuarlu peqatigisartussaallugit. Taamaammat ilaquttat aamma illoqarfigisap nunaqarfigisalluunniit qimannissaat piareersimaffigisariaqarpatit. Aammattaaq højskolimi imminut akisussaaffiginissaq atuaqatigisallu akisussaaffiginissaat piareersimaffigisariaqarpatit.

Akigititat 

Ilinniarfiit allarpassuit assiginagit højskolimiinneq akeqarpoq. Najugaqarneq sapaatip-akunneranut 900 aamma 1700 koruunit akornanni akeqartarpoq. Taassuma saniatigut akilerneqartassapput:
  • Atuartitsinermi atortut assigiinngitsut
  • Paasisassarsiorluni aamma atuanngiffeqarnermi angalanerit
  • Qinnuteqarnermut atatillugu nalunaarnermi akiliut

Nammineerlutit aallarniaruit Danmarkiliarnermut angalaneq kiisalu højskolimiinnermut atatillugu aningaasartuutit tamakkerlugit nammineerlutit akilissavatit.

Piareersarfimmit innersuunneqarneq
Piareersarfik aqqutigalugu højskolerniaruit, makkununnga aningaasartuutit matussusertissinnaavatit:
  • Najugaqarneq ilinniarnersiutitit atorlugit akilerneqassaaq
  • Najugarisanni Piareersarfiup qinnuteqarnermut atatillugu nalunaarnermut akiliut akilissavaa
  • Sumiiffinni amerlanerni højskolernerpit nalaani sapaatip-akunneranut 300 koruuninik kaasarfimmiussannik pisassaatit. Kaasarfimmiunnit ilinniarnermi atortut suulluunniit nammineq akilertartussaavatit

Angalanissat sioqqullugu ilinniagaqarnermut siunnersuisartoq peqatigalugu isumaqatigiissutigissavarsi paasisassarsiorluni aamma atuanngiffeqarnermi angalanerit kiap akilissanerai. Matumani nammineq akilissagukkit, ilinniagaqarnerup aallartinnerata nalaani paasisassarsiorluni angalanissamut tapiiffigitinnissamut qinnuteqarsinnaavutit. Najugarisanni Piareersarfik aqqutigalugu qinnuteqarsinnaavutit.

Qinnuteqarneq 

Danmarkimut angalanissaq højskolimiinnissarlu nammineerlutit akilerniarukku, qinnuteqarnissamut højskolip immersugassaataa immersussavat højskolerfissatullu atuarfigerusutannut toqqaannartumik nassiullugu.

Danmarkimut angalanissaq højskolernissarlu nammineerlutit akilersinnaanngikkukku, najugarisanni Piareersarfimmut saaffiginnissutigisinnaavat. Piareersarfimmilu ilinniagaqarnermut siunnersuisartoq peqatigalugu højskolimiinnissamut iliuusissamik pilersaarut suliarissavarsi. Ilinniakkamik aallartitsiniaraanni iliuusissamik pilersaarummi allaaserisimasat naammasseqqaartariaqarpatit. Piareersarfiit aqqutigalugit højskoleriarlutik aallartussat amerlassusaat killeqartartut eqqumaffigisariaqarpatit, taamaammat højskoleriarniarluni aallarnissat qularnarsinnaavoq.

Malugiuk
Piareersarfik aqqutigalugu qinnuteqarniaruit, Danmarkimi højskolit tamaasa qinnuteqarfigisinnaanngilatit. Najugarisanni Piareersarfimmi siunnersuisartoq paasissutissiissaaq højskolit sorliit atuarfigisinnaaneritit.
Majoriaq – Majoriat siunnersuisarfiupput atuarfiillu, illoqarfinni annerni tamani nunaqarfimmilu ataatsimi inissisimasut.
Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikiin@nanoq.gl
Nittartagaq: www.naalakkersuisut.gl