Paasisassarsiorluni angalanerit

Nalinginnaasumik paasissutissiineq 

Paasisassarsiorluni angalaneq tassaavoq nunap angalaffigisap paasisassarsiorfiginissaanik siunertaqarluni angalaneq. Paasisassarsiorluni angalasartut tassaapput meeqqat atuartut allallu ilinniakkamik ingerlataqartut, atuakkamillu itinerusumik ilisimasaqarfigilernissaanik paasinissaanillu siunertaqarlutik angalasarput.

Atuartorpassuit ilinniarfinnilu ilinniartorpassuit paasisassarsiorlutik angalanissaminnut periarfissaqarput. Paasisassarsiorlunili angalanerit akeqarput taamaammallu aningaasalernissaa ilungersunarsinnaasarluni.

Aningaasalersuineq 

Atuaqatigiippassuit imaluunniit ilinniartut paasisassarsiorlutik angalanissatik assigiinngitsumik aningaasalersortarpaat:
• Peqataasussat akiligassap ilaa namminneq akilertarpaat
• Akiligassap ilaa aningaasannanniarnikkut, soorlu tuniniaanikkut eqquiniaatitsinikkulluunniit akilerneqartarpoq
• Akiligassap ilaa pisortanit aningaasaateqarfinnilluunniit tapiiffigitinnikkut akilerniarneqartarpoq

Paasisassarsiorlutik angalanissaminnut tapiiffigitikkusuttut arlaqartut kommunimut qinnuteqarniarlutik saaffiginnittarput.

Angalaniartut imaluunniit angalaqatigiinniartut tapiiffigitissinnaasut kikkuunissaannut nalinginnaasumik malittarisassaqanngilaq, aammalu qanoq amerlatigisunik pissarsisinnaanersut. Paasisassarsiorlutik angalaniartut tapiiffiginissaannut qanoq aningaasaliiffigineqartassanersut pillugit kommunit ataasiakkaat namminneq malittarisassaliortarput.

Tapiissutinut qinnuteqaatit 

Atuaqatigiinnut ilinniaqatigiinnulluunniit paasisassarsiorlutik angalarusuttunut ilaaguit, angalanissassinnullu kommunimit tapiiffigineqarnissarsi kissaatigigussiuk qinnuteqaasiussaasi.

Qinnuteqarnermi apeqqutit makkua akineqassapput:
• Paasisassarsiorluni angalanissap suna siunertaraa?
• Paasisassarsiorluni angalanissamut kikkut qassillu peqataaniarpat?
• Sumut angalaniarpisi?
• Angalanissarsi qanoq akeqarpa?
• Ilissi nammineq qanoq akiliuteqarniarpisi?
• Allanit tapiiffigineqarpisi?

Kommunissinni Kultureqarnermut Ingerlatsivimmut qinnuteqaat nassiutissavarsi. Aamma paasisassarsiorluni angalanissamut tapiissutinik qinnuteqartarneq pillugu ingerlatsivimmut siunnersoqqusinnaallusilu ilitsersuunneqaqqusinnaavusi.

Kikkut tapiiffigineqassanersut qanorlu amerlatigisunik tapiiffigineqassanersut kommunimit aalajangerneqartarpoq. Taamaattumik atuaqatigiillusi imaluunniit ilinniartoqatigiillusi kommunimit qinnuteqarfigisassinnit tapiiffigineqarnissarsi pinngitsoorsinnaavoq.

Qinnuteqareerussi 

Kommunimit tapiiffigineqarussi, paasisassarsiorlusi angalareerussi makkua tunniutissavasi:
• Angalanerup naatsorsuusiornera
• Angalanermit nalunaarusiaq inuttut suliatigullu sunik pissarsiaqarsimanissinnik oqaluttuartoq

Taamaalilluni pisortat tapiissutigisartagaasa atornerlunneqannginnissaat qulakkeerneqassaaq.

Malugiuk
Paasisassarsiorlusi angalanissarsi piviusunngunngitsuussagaluarpat, tapiissutisiasi kommunimut utertissavasi.