Inuussutissarsiutinik ilinniagaqalersinnaanissamut piareersarfik akuerisaasoq (AEU)

Nalinginnaasumik paasissutissiineq 

Nunatsinni inuit kikkulluunniit ilinniagaqarnissamik periarfissaqartussaapput. Inuussutissarsiutinik ilinniagaqalerumaguit ilinnialernissamulli akuerineqarnissamut piginnaasassat ilaannik inorsaateqaruit, Inuussutissarsiutinik ilinniagaqalernissamut piareersarfimmi akuerisaasumi (AEU-mi) piginnaanngorsarsinnaavutit.

AEU atuartitsinermik ingerlataqarfiuvoq Kalaallit Nunaanni inuussutissarsiutinik ilinniartitaanermut piareersarfigisinnaasat. Tassani inuussutissarsiutinik ilinniagaqalernissap aallartinnissaanut piginnaasassat pisariaqartikkumaakkatit angusinnaavatit.

Malugiuk
AEU-mik ingerlataqarneq Majoriap ilinniarfiini ingerlanneqartarpoq. Ulluunerani atuartitsinermi peqataasinnaanngikkuit, assersuutigalugu ulluunerani sulisaruit, taava nammineerlutit AEU-mi atuarneq ingerlassinnaavat.

Atuartitsinerup ingerlanneqarnera 

AEU immikkoortut marlunngorlugit aaqqissugaavoq ukiumillu ilivitsumik sivisussuseqarsinnaalluni, fag-illu ingerlariaqqinnissamut akuerineqaataasussat uku atuartitsissutigineqartarlutik:
  • Danskisut
  • Kalaallisut
  • Tuluttut
  • Matematikki

Immikkoortoq siulliup ingerlannerani ilinniartitsisuit nalilissavaa qaqugu immikkoortoq aappaata aallartinnissaanut piareersimanersutit. AEU-p immikkoortuata aappaa naammassigukku, fag-it ingerlariaqqinnissamut akuerineqaataasussat pillugit allattariarsornikkut misilitsissaatit.

Immikkoortoq siulleq aamma aappaa ilutigiillutik aggustimi imaluunniit kingusinnerpaamik septembarimi aallartittarput, nanginneqartarlutillu sumiiffiit amerlanerpaartaanni januaarimi imaluunniit februaarimi. Immikkoortut aappaat angusaqarfigereerukku inuussutissarsiutinik ilinniartitaanermi akuerineqarnissamut qinnuteqarsinnaalissaatit.

Malugiuk
Fag-it atuartitsissutigineqartartut Majoriamit Majoriamut nikerarsinnaapput.

Piumasaqaatit 

Kikkulluunniit 15-ileereersimasut AEU-p ingerlannissaanut akuerineqarsinnaapput, kisianni sumiiffiit ilaanni qassinik ukioqalersimanissamut allaanerusunik piumasaqaatitaqarsinnaapput. Maleruagassat suut atuunnersut pillugit najukkanni Majoriamut apeqqutigisinnaavatit.

Ilinniagaqarnersiutit 

Kikkulluunniit AEU-mik aallartitaqartut, maleruagassat malillugit ilinniagaqarnersiuteqarnissaminnut periarfissaqarput.

Qinnuteqarneq 

AEU-mi akuerineqarumaguit najukkanni Majoriamut saaffiginnissaatit. Tassani siunnersuisartoq peqatigalugu naliliiffigisinnaavat fag-it suut AEU-mi ingerlakkumanerlugit. Tamanna paasereerussiuk qinnuteqarnissamut immersuiffissaq immersussavat.

Illoqarfimmi najugaqarfigisanni taamaallaat ilinnialernissamut qinnuteqarsinnaavutit. Nunaqarfimmi Majoriaqanngitsumi najugaqaruit, Majoriami qaninnerpaami ilinnialernissamut qinnuteqassaatit.

Qinnuteqaat immersorukku eqqaamassavat ilanngutissagakkit:
  • Najugaqarnermut uppernarsaat
  • Kuisinnermut allagartaq
  • Meeqqat atuarfiannit karakteerit
  • Pikkorissarsimanermut uppernarsaatit
  • Sulisitsisunnit oqaaseqaat
  • Qitornaqaruit taakku kuisinnerannut allagartaat

Qinnuteqarnissamut immersuiffissaq immersoreerukku taanna Majoriamut atuarfigerusutannut nassiulluguluunniit tunniutissavat. Qinnuteqaat aamma najukkanni innuttaasunut sullissivimmut imaluunniit nunaqarfimmi kommunip allaffianut tunniussinnaavat, taakku Majoriamut ingerlateqqikkumaarmassuk.

Malugiuk
Majoriat ilarpassuini AEU-mi aallartittussanut atatillugu utaqqisut allattorsimaffigisaannik maannakkut peqartoqarpoq. Taamaammat qinnuteqaruit akuerineqarnissat qularnaareersimasinnaanngilat.

AEU-mi ingerlataqaleruit Majoriamut allamut nuunnissannik qinnuteqarsinnaavutit. Taamaattorli AEU-mi ingerlassani ataasiakkaani inissat killeqarput. Taamaammat allami inissaqarnissat qularnartoqarsinnaavoq.

Qinnuteqareernerpit kingorna 

Qinnuteqaatit Majoriap tigoreeruniuk aalajangerneqassaaq kikkut akuerisaassanersut. Qinnuteqaatillu naliliiffigineqareerpat allakkatigut nalunaarfigineqassaatit.

AEU-p ingerlannissaanut akuerineqarsimaguit misilitsissaatit. Nalilersuinermilu angusat tunngavigalugit Majoriamit naliliivigineqassaaq modulimi sorlermi aallartissanersutit. Assersuutigalugu imaassinnaavoq danskisut moduli 2-mi tuluttullu moduli 3-mi aallartittutit.

Piffissaliussat 

Najukkanni Majoriamut saaffiginnissuteqarnikkut paasiniarsinnaavat qaqugu kingusinnerpaamik ilinnialernissamut qinnuteqarsinnaanersutit.

Inaarutaasumik misilitsinneq 

AEU-p immikkoortuata tullia naammassigukku, ingerlariaqqinnissamut akuerineqaatigisassanni allattariarsornikkut misilitsissaatit. Imaappoq misilitsiffigisinnaasatit:
  • Kalaallisut
  • Danskisut
  • Tuluttut
  • Matematikki

Misilitsissutit ukiumut marloriarlugit neqeroorutigineqartassapput. Immikkoortut aappaanni misilitsinnerit angusaqarfigereerukkit inuussutissarsiutinik ilinniartitaanerni tamani akuerineqarnissamut qinnuteqarsinnaalissaatit, assersuutigalugu innaallagissiortutut, sanasutut imaluunniit isumaginninnermi ikiortitut. Meeqqat atuarfianni soraarummeerutaasartumut (FA) akuerineqarnissamik aamma qinnuteqarsinnaavutit, tassaasoq ilinniarnertuunngorniarluni ilinniartitaanermut piareersaataasumik ilinniartitaaneq.

Napparsimasimaneq pissutigalugu misilitsinneq
Napparsimaguit misilitsikkiartorsinnaanak, taava napparsimasimaneq pissutigalugu misilitsikkumasinnaavutit. Tamanna akuerineqassappat nakorsamit uppernarsaat najukkanni Majoriamut tunniutissavat, taanna uppernarsaataassammat ilumut napparsimasimasutit. Nakorsamit uppernarsaat nakorsamit pissarsiarisinnaavat.

Allaaserisat attuumassutillit

Majoriaq – Majoriat siunnersuisarfiupput atuarfiillu, illoqarfinni annerni tamani nunaqarfimmilu ataatsimi inissisimasut.
Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik
Imaneq 1A 301
Postboks 1601
3900 Nuuk

Oqarasuaat: (+299) 34 50 00
Fax: (+299) 34 63 64
E-mail: isiin@nanoq.gl
Inuussutissarsiorneq pillugu nittartagaq: businessingreenland.gl
Nittartagaq: www.naalakkersuisut.gl